Amanesoma Mak Aa Chwera Tɔn 2 - mzwDBL

Yeesu chah baa bɛl waa kuuɡa

¹ Tɔpere bɛl habɔɔ la, Yeesu berɔ la Kapeeneɔm. Belaa o waa perɛ bwɛɛ la ta kɛ o lɔ dem.

² Anomanta, nɛra cheme dem bela kɛrɛdɛ, dɛ bɔr toole doonyoa kwaraa, asɛ Yeesu bol waa baɡ ba.

³ Belaa nɛra banaarɛ bane kpɔ baa bɛl waa kuuɡa dɛɛ ba Yeesu be.

⁴ Bɔr aa fara la, ba ta wone kpɔ baa la ba o be. Anee ba teeh dea la dɛ forɛ sal la bela Yeesu aa cheɡa la, dɛ kpɔ baa la ne o kalaŋ waa chɔ o ta la dɛ che bela dɛ kpɔɔ bil Yeesu sie.

⁵ Belaa Yeesu aa naa kɛ ba yaradao kɛrɛdɛ la, o ŋɔ baa la waa kuuɡa la be ŋɔ, “N bie, n kpɔ he wechɔɡa kɛɛ.”

⁶ Tɔnjerema baa soɡe bela la lii ba nyu bini dɛ ŋɔ,

⁷ “Ɛrɛɛ o do dɛɛ bol waa ɡɛ nɔɔ? Korowii ɡboo won wechɔɡa kpɔe dɛ kɛ. Aa! O dɛ ɛ Korowii nɛnhɛla.”

⁸ Belaa Yeesu aa jemɛ waa baa liira la, asɛ o ŋɔ ba be ŋɔ, “Ɛrɛɛ hɛɛ lii ɡɛ nɔɔ?

⁹ Maa ŋɔ o be ŋɔ n kpɔ o wechɔɡa kɛo nɔ, ne kɛŋɔ maa ŋɔ o be ŋɔ ó ir dɛ́ kpɔ o kalaŋ valɛ, a bini umee kpeɡa ɔ?

¹⁰ Mɛɛ chaɡle heyaa kɛŋɔ Men Nɛn Bie dɔ kpeɡri harɛ nɔ ta kɛ ń kpɔ nɛra wechɔɡa kɛ ba.”

¹¹ Belaa o ŋɔ naate waa kuuɡa la be ŋɔ, “N dɛ ŋɔ he be! Ir dɛ́ kpɔ he kalaŋ kaa dem!”

¹² Asɛ baa la ir buɡ la ta, dɛ kpɔ o kalaŋ nɛra la bwa siwi ta bela dɛ kaa. A ɡelɔ nɛra la bwa nyoa kpo, asɛ ba kpɛɛ Korowii ŋɔ ba ta a dɔŋa nae bwa.

Gɛ Yeesu aa yerɛ Lewi

¹³ Yeesu berɔ la Galilia Moo la nyoa. Belaa nɛra warɛ dɛ ba o be, asɛ wɛɛ baɡ ba wa.

¹⁴ Waa vala baa kaa la, o na baa bɛl waa soɡe o toma ta dɛɛ lɛ toɔ, baa yerɔ Lewi, o mɛɛ ɡe sɔne Alfeɔs. Anee Yeesu ŋɔ o be ŋɔ, “Ba teŋɛ n nɛ.” Asɛ o ir dɛ teŋɛ o nɛ.

¹⁵ A habɔɔ la, Yeesu la Lewi dem dɛ ka so dɛɛ di kwa. Toɔ lɛɛra baa dɛ bɔ nɛra apoo ne wechɔɡ-ɛɛra yon warɛ teŋɛ Yeesu nɛ. Ba ne Yeesu ne o habɔteŋra la so tiɡ ta.

¹⁶ Anee Farisii tena Tɔnjerema la aa na Yeesu ne toɔ lɛɛra ne wechɔɡ-ɛɛra la aa pɛa dɛɛ di kwaa la, ba bɔɔ o habɔteŋra la ŋɔ, “Ɛrɛɛ o ne ɡɛ nɛra nɔ pɛ dɛɛ di kwaa nɔɔ?”

¹⁷ Yeesu aa no ɡɛ waa nɔ la, o ŋɔ ba be ŋɔ, “Weela tenaa hiah tɛɛɡa te, bokpeɡa tena laa.” Dɛ ŋɔ, “Nɛra baa dɛ lii ba te nɛndɛɛɡa waa laa n ba. Wechɔɡ-ɛɛra waa n ba, ásɛ ba charɛ ba liire.”

Nyoa vɔwa wepɛɛre

¹⁸ Awola bɛl, Jɔn waa dɛ sɔ nɛra Korowii nee la habɔteŋra ne Farisii tena vɔwɛ ba nyoa, asɛ nɛra bane ba Yeesu be dɛ ba bɔɔro ŋɔ, “Ɛrɛ waa Jɔn habɔteŋra ne Farisii tena habɔteŋra te ɛɛ vɔwɛ ba nyoa, asɛ he habɔteŋra nɔ te aa wola nyoa vɔwɛ nɔɔ?”

¹⁹ Anee Yeesu sɛɡ ba dɛ ŋɔ, “Baa aa lawɛ hanfale dɛ yerɛ o daamanar ŋɔ bá ba lɛ ba sie nɔ, baa berɔɔ so lɔr aa? Baa lɔree so.

²⁰ Kɛ tɔpere bɛl ɛɛ bao kɛŋɔ baa lawɛ hanfale jaa laanee le ba bini. Gɛ saŋ la te, baa vɔwɛ nyoaa.

²¹ Baa yafale yakwara kpɔe dɛɛ tɔ yabene bɔɔ. A ba ɡɛ naa, onfale la ɛɛ kɛɛroo le yabene la ta, ásɛ bɔɔ la berɛ do kan kohona.

²² Baa senfala kpɔe dɛɛ do loŋbena aa kɔɔhna bini dɛɛ tɔ a nyoa. Dɛ he ɛ ɡɛ naa, senfala la baa peraa, aa do kpeɡrii dɛ́ pere loŋa la á chɔɡ, ásɛ sen la fuɡe. Senfala chɛ loŋfala.”

Ona Tɔpere wepɛɛre

²³ Awola Ona Tɔpere bɛl, Yeesu ne o habɔteŋra kpɔ mea koo bɛl ta, asɛ o habɔteŋra la kuuɡi mea la ane.

²⁴ Anee Farisii tena bane aa naa la, ba ŋɔ Yeesu be ŋɔ, “Nyiŋi na! He habɔteŋra la dɛ ɛ toma dɛɛ koni ya Ona Tɔpere Mmara la.”

²⁵ Belaa Yeesu ŋɔ, “He ta ɡɛ ya naa Devid aa ɛa saŋ la Abiata aa ɛ Sɔfonomoa la kure kɛɛ? Gɛ saŋ la Devid nyao, asɛ lɔr ɛɛ kpo o ne nɛra baa ja o nɛɛ la.

²⁶ O la Korowii Dea dɛ ka di paanoo aa ɛ Korowii kwa, nomɛlbwa fe aa wola ŋwɛnɛ dɔe kɛ ó di la atane kɛ sɔfore la ɡbo, asɛ o di dɛ tɛ o nɛra baa ja o nɛɛ la ɡe ba di.”

²⁷ Anee Yeesu ŋɔ ba be ja ŋɔ, “Nɛn waa Korowii cheɡ Ona Tɔpere. Ona Tɔpere te waa laa o ta nɛn.

²⁸ Anomanta, Men Nɛn Bie dɔ Ona Tɔpere ɡba kpeɡri.”