Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -

Mmarare 30 - mzwDBL


Korowii be bala som nae

1 Mosis ŋɔ Israel tena be ja ŋɔ, “N tɛ heyaa webele anɛ, ɡɛ haa ɛ dɛ́ na som, ne waa aa ba taahna ne he nɛ. Dɛ anɔ bwa baa chiɡ asɛ Korowii lɔ heyaa peɡre harɛre ta naa, belaa hɛɛ ba webele anɛ maa kpɔa tɛ heyaa la liira.

2 Dɛ he ne he naanar berɔ ba Korowii haa dɛ tomɔ be, dɛ no o waa maa dɛ do heyaa fini nɔ ta he bambile bwa ne he hweera bwa ne naa,

3 ate Korowii haa dɛ tomɔ la ɛɛ dɔ tedomaa tɛ heya, dɛ le he ne harɛre waa lɔ heyaa peɡre a ta la ta, ásɛ he ba pɛ, dɛ́ berɛ ɡel he do wer.

4 Hale dɛ harɛ jaɡaa he peɡre ka do kwaraa naa, Korowii haa dɛ tomɔ nɔ ɛɛ boa he nyoa, dɛ́ berɛ ba he ne.

5 Ásɛ he berɛ ba kpɔ harɛ he naawa fa aa soɡe o ta wubwa la so ó ɛ he kon. Wɛɛ berɔɔ ɡel he do wer dɛ́ warɛ ɡwaa ɡɛ he naawa fa aa doa la.

6 Korowii haa dɛ tomɔ nɔ ɛɛ tɛ he ne he naanar bambidɛɛɡee, ásɛ hɛɛ nyinu he bambile bwa ne he hweera bwa ne, ásɛ dɛ ta so harɛ la ta dɛɛ la.

7 Korowii ɛɛ berɔɔ kpɔ taahna la bwaa ta he dɔma baa hah heyaa dɛɛ ɛ heyaa hɔhɔrɔwa la nɛ,

8 ásɛ he berɛ ba no Korowii waa maa kpɔa dɛɛ tɛ heyaa fini nɔ ta, dɛɛ teŋɛ o Mmarare la ta ja.

9 Wɛɛ ɡeloo he do wer wobɛlbwa haa ɛ ta, dɛ́ ɡel he dɔ bii ne kondɛɛra kohona, he koo kondikwaa ɡe ɛ kohona. Korowii sie ɛɛ lɛ he nɛɛ ja, ásɛ dɛ ɡel he do wer wobɛlbwa ta, ɡɛ o fe aa liira tɛ he naawa la,

10 dɛ he teŋɛ Korowii haa dɛ tomɔ nɔ waa aa lɔ o Mmarare Tɔn nɔ bini nɔ ta, dɛ kpɔ he bambile bwa ne he hweera bwa ba o be naa.

11 Korowii waa nɔ maa kpɔa dɛɛ tɛ heyaa nɔ aa kpeɡe kohona, a toole bojaŋ ɡe.

12 A toole nyundua ásɛ he bɔɔ ŋɔ, ‘Umee dɛ́ la nyundua dɛ́ ka kpɔ ba ya no dɛ́ teŋɛ a ta nɔ?’

13 Kɛɛ mpo baŋ ásɛ he bɔɔ ŋɔ, ‘Umee dɛ́ ka kpɔ ba tɛ yaa ásɛ ya teŋɛ a ta nɔ?’

14 Waa la pu heyaa tonɛ. A lɔ he nyoo hɛɛ bola kɛɛ he bambile ta kwara, anomanta, hɛ́ɛ teŋɛ a ta.

15 Fini tɔpere nɔ, n kpɔ wedɛɛɡa ne wechɔɡa, mkpa ne seo dɛɛ bil he sie, onɔ la bwa haa kpɔ.

16 Dɛ he teŋɛ Korowii haa dɛ tomɔ nɔ waa maa kpɔa dɛɛ tɛ heyaa fini nɔ ta, dɛɛ nyinu dɛɛ teŋɛ o waa ta kɛrɛdɛ naa, he wobɛlbwa ɛɛ do werii tɛ heya taeh. Wɛɛ swee andɛɛɡaa tɛ heya he dɔ mkpa harɛ haa dɛ la ka so o ta la ta.

17 Dɛ he ɛ deŋnekpeɡ dɛ vɛh noe yaa, he liire ɛɛ charɔɔ he ka tomɛ voɡa.

18 N dɛ ŋɔ he be kɛŋɔ sewaa hɛɛ ba sewa. Haa harɛ haa dɛ ba Jɔɔdan Moo ɡala dɛ́ ka so o ta nɔ taa biɡri.

19 Nyundua ne harɛ ɛ danseɛ fini kɛŋɔ n tɛ heyaa mkpa ne seo, dɛ som Korowii aa dɛ tɛ ne taahna. Kɛ hé kpɔ a bini bɛl. Hé kpɔ mkpa.

20 He nyin Korowii haa dɛ tomɔ nɔ, dɛ́ teŋɛ o waa ta kasinteŋ ne, dɛ́ kpɔ he te pɛlo, ásɛ he ne he naanar biɡri harɛ waa baɡɛ nyoa ŋɔ wɛɛ kpɔɔ tɛ he naawa Abraham ne Aesek dɛ Jekɔb la ta.”

© 2017, Ghana Institute of Linguistics, Literacy and Bible Translation. In cooperation with Wycliffe Bible Translators, Inc.

Wycliffe Bible Translators, Inc.
ကြှနျုပျတို့နောကျလိုကျပါ:



ကြော်ငြာတွေ