Amanesoma Luk Aa Chwera Tɔn 11 - mzwDBL

Gɛ Yeesu aa chaɡle Korowii soŋa wa

¹ Awola bɛl, dɛ Yeesu lɔ bobɛl dɛɛ soŋe Korowii. Waa tona la, o habɔteŋra la bɛl ŋɔ o be ŋɔ, “N Dɔɔ, baɡle yaa ɡɛ yaa soŋe Korowii, ɡɛ Jɔn aa baɡle o habɔteŋra la.”

² Anee Yeesu ŋɔ ba be ŋɔ, “Dɛ he dɛ soŋe Korowii aa, hé ŋɔ, ‘Ya Mɛɛ haa lɔ nyundua, henee chɛ duura. Baɡle he Kora dii harɛ nɔ ta.

³ Tɛ yaa ya fini kondikwa,

⁴ dɛ́ kpɔ ya wechɔɡa kɛ yaa, ɡɛ yaa kpɔ ya dɔŋa wechɔɡa dɛɛ kɛ ba la. Dɛɛ ke yaa wechɔɡa luɡri ta.’ ”

⁵ Ate, Yeesu ŋɔ o habɔteŋra la be ŋɔ, “Hé kpɔ kɛŋɔ he bini bɛl dɔ o dam, dɛ la ka chumu harambaŋa, dɛ ŋɔ o be ŋɔ, ‘N dam, kem mɛ pea atoro.

⁶ N dam bɛl le bobɛl ba choɡ mɛ taraken, n ɡe ta komɛlbwa dɔe dɛ́ tɛo ó di.’

⁷ Dɛ he soŋo ɡɛ naa, wɛɛ wonoo ŋɔ hé ɡelo ŋɔ he bɛ o dom chɔɡ ŋɔ o karɛ o ɡbera o ne o bii chɔ, anomanta, waa won ir dɛ́ tɛɛ komɛlbwa naa? Akai! Waa won ŋɔ ɡɛ.

⁸ Kasinteŋ, dɛ a ka darame la ɡbo wa aa, o fe aa ir dɛ́ tɛɛ komɛlbwa. Kɛ haa wola kaalɛ, dɛ ta che dɛɛ soŋo la nomanta, wɛɛ tɛɛ komɛlbwa haa dɛ nyin laanee.

⁹ Anomanta, ɡɛɛ a do, hɛ́ɛ soŋe Korowii, wɛɛ tɛ heyaa. Hɛ́ɛ nyin he konnyina o be, hɛɛ dɔɔ. Hé swɛɛ siwi dɛɛ lɔ ɡbera, wɛɛ ya heyaa.

¹⁰ Nomɛlbwa waa dɛ soŋo la dɛ dɔ, asɛ nomɛlbwa waa dɛ nyin o konnyina dɛɛ le o be la, o dɛ tɛo. Gɛɛ Korowii ɛɛ ba ɡbera yae dɛ́ tɛ nomɛlbwa waa dɛ lɔ la.

¹¹ He bini umee o bie ɛɛ nyin pɛŋe, ó ka lawɛ harɛkon ba tɛo wɔ?

¹² Kɛɛ dɛ o dɛ nyin jahal aa, ó ka lawɛ nɔm ba tɛo wɔ?

¹³ Dɛ he wechɔɡ-ɛɛra nɔ kwaraa jemɔ dɛ kpɔ kondɛɛɡa dɛɛ tɛ he bii aa, ɛrɛ waa he Mɛɛ waa lɔ nyundua la te aa wola nɛra baa dɛ soŋo o Domadɛɛɡe la tenee tɛo!”

Yeesu ne Bɛlsebul

¹⁴ Dɛ Yeesu dɛ doŋi kwaa aa lɔ baa bɛl nɛɛ o berɛ amumu. Kwaa la aa le baa la nɛɛ la, o bol wa. Nɛnlaa la aa lɔ bela la nyoa kpoo.

¹⁵ Bane te ŋɔ, “Kwaa aa dɛ ir nɛra nɛɛ bwa kooro baa dɛ yerɔ Bɛlsebul la, onee tɛo kpeɡri wɛɛ doŋi kwaa la.”

¹⁶ Dɛ bane ɡe dɛ nyin dɛ daahno na, dɛ ŋɔ o be ŋɔ ó ɛ we-ɛɛla ane, ásɛ a baɡle kɛ o le Korowii be kpela.

¹⁷ Yeesu aa jemɛ waa baa dɛ lii la, o ŋɔ ba be ŋɔ, “Dɛ harɛ bɛl ta tena bini pere anɛ ba ɡbo ɛɛ yo aa, harɛ la dɛ paɡre. Gɛɛ dɛ waane ba lolanar bane bini asɛ ba baah pere anɛ ba ɡbo ɛɛ yo aa, lola la aa won ɛ lola.

¹⁸ Anomanta, dɛ Bɔnsam kora bini pero baa yo aa, o kora la aa won ɛ kora. Heyaa ŋɔa ŋɔ Bɛlsebulee tɛ mɛ kpeɡri n won kwaa aa dɛ ir nɛra nɛɛ doŋa.

¹⁹ Dɛ Bɛlsebul nɛɛ n che dɛɛ doŋa aa, a wer. Aah dɛ he ɡe, umee tɛ he habɔteŋra nɔ kpeɡri ba won a doŋa ɔ? He ɡbaɡba habɔteŋra la we-ɛɛlaa dɛɛ baɡle kɛŋɔ he kono kwara!

²⁰ Korowii kpeɡri nee mɛɛ doŋi kwaa aa dɛ ir nɛra nɛɛ la. Anomanta, hé jemɛ kɛŋɔ Korowii Kora dii la telo tonɛ.

²¹ Dɛ bokpeɡa te kpɔ o dɔmkwaa dɛɛ daah o dem kɛrɛdɛ naa, o komɛlbwa aa chɔɡ.

²² Kɛ dɛ bɛl ɡe berɔ do kpeɡri ɡwaalo dɛ ka puu dɛ pɔ o nɛ aa, o dɛ kpɔ o dɔmkwaa waa kpɔ o sie dawɛ a ta la, dɛ́ kpɔ o kondɔɔh ja.

²³ Nomɛlbwa waa wola n nɛɛ jae la aa n waa nyin. Nomɛlbwa waa wola men chae dɛɛ boa n nɛra nyoa dɛɛ pɛ la lɔ ba dɛɛ peɡre.

Bɔnsam torome bera dɛ́ ba nɛn be ja

²⁴ Fini nɔ nɛra do kɛŋɔ nɛn Bɔnsam aa ɡela o torome bɛl do o nɛɛ dɛ chɔɡ o da. A habɔɔ la, naate charɛ o liire, asɛ Bɔnsam torome la le o nɛɛ dɛ kaa ka nyin bofale dɛ so. O ɡaaɡaa, o ta wone dɔ bɔr dɛ́ so onɛ, dɛ berɛ ŋɔ, ‘Mɛɛ kaa n buɡ ta bela maa lea ba laanee,’

²⁵ dɛ berɛ ka na kɛ baa la liire bini chaahnɔ kɛŋɔ dea baa chaaro dɛ kwaaro kɛrɛdɛ ba ta nɛn kpɔe do o ta dɛ ɡel o chɔ pɛɛ la.

²⁶ Gɛɛ o yon la ka kpɔ o bala anuanɛ aa ɡwaalo kwara. A bwa yon ba so naate la nɛ, dɛ́ chɔɡ o da ɡwaa ɡɛ o fa aa doa wubwa la. Gɛɛ aa ba doe fini nɔ nɛra baa ɛ nɛnchɔɡa nɔ nɛ.”

Som nae tenten wa

²⁷ Yeesu aa bol ɡɛ waa nɔ tonɛ la, haah bɛl bol waa o be takpeɡ ne nɛra la baah ta, dɛ ŋɔ, “Haah waa lolɛ dɛ dɛɛre la na som.”

²⁸ Anee Yeesu ŋɔ, “Nɛra baa dɛ no Korowii Waa dɛɛ teŋɛ a ta laanee na som.”

Ba soŋe Yeesu ŋɔ ó ɛ nyokpowa

²⁹ Nɛra la aa bar Yeesu cheme pirim la, o ŋɔ ba be ŋɔ, “Ɛrɛɛ fini nɔ nɛra ɛ nɛnchɔɡa ken?” Ba dɛ nyin nyokpowaa dɛ́ na mɔɔ dɛ́ yarada kɛ Korowii bee n le, kɛ baa dɔ na. Waa aa pu Korowii keame Jona la dɔŋa ɡboo dɛɛ ba n ɡe pui, ásɛ he che a ta jemɛ n nɛnsoo.

³⁰ Gɛ Korowii aa ɛ Jona dɛ baɡle Niniwe tena kɛ on tomɔ la, ɡɛ tentenee wɛɛ ba Men Nɛn Bie la ɡe ɛɛ dɛ́ baɡle fini nɔ nɛra kɛ on tom mɛ.

³¹ Awola nɛra bwa aa ir seo ta dɛ ba che Korowii sie ásɛ o bol ba waa dɛ́ pa bole la, Seeba kooro waa ɛ haah la ɛɛ bol waa bɔ fini nɔ tena, dɛkalkɛŋɔ o valɔ le harɛ jaɡa dɛ́ ba no Kooro Solomɔn wejemwa. Kɛ kasinteŋ, naate waa ɡwaa Kooro Solomɔn lɔ bonɔ, asɛ he ŋɔ haa o bee no.

³² Niniwe tena ɡba ɛɛ bol waa bɔ fini nɔ tena, dɛkalkɛ ba te no Korowii Waa Jona aa bola la mun dɛ charɛ ba liire le ba wechɔɡa ta. Kɛ kasinteŋ, naate waa ɡwaa Jona lɔ bonɔ, asɛ he ŋɔ haa o bee no.

Kandea waa dɛ chaah we-ɛɛla

³³ “Nomɛlbwa aa kandea choŋi asɛ dɛ kpɔ dɛɛ sɔh dea bini, bela nomɛlbwa aa wola on na, kɛɛ dɛ kpɔ kon pi o ta. Ba choŋi kandea aa, ba kpɔɔ dɛɛ chɔŋɛ kon ta, ásɛ wɛɛ chaah nomɛlbwa waa dɛ ba bela.

³⁴ Sibie do kɛ kandea dɛ tɛ nɛwɛnyini. He sibie wer aa, he dɛ na bɔr. Dɛ a chɔɡɔ ɡe aa, amɔ dɛ he lɔ biro ta. Gɛɛ a do, dɛ he sie beɡre Korowii waa ta naa, dɛ he wobɛlbwa chaahnɔ. Kɛ dɛ he sie beɡre harɛ nɔ ta kwaa ta naa, he lɔ biro ta.

³⁵ Anomanta, hé nyiŋi kɛrɛdɛ ásɛ he sie won chaah waa Korowii aa kpɔa tɛ heyaa la ta, he bɛ biro ta so.

³⁶ Dɛ he sie beɡre Korowii waa ta, asɛ he ɡel wetɔŋla ne dachɔɡe bɛlbwa dɛ lɛ Korowii wa aa, ɡɛɛ he sie ɛɛ ba chaahna kɛrɛdɛ Korowii waa la ta, kɛŋɔ baa choŋi kandea asɛ wɛɛ chaah bɔr kohona la.”

Yeesu chɛɡre Farisii ne Tɔnjerema

³⁷ Yeesu aa bol waa tonɛ la, Farisii te bɛl yerɔ ŋɔ ó ba di kwaa o dem. Anee o la baa la dem dɛ ka so dɛɛ ba kwaa dii.

³⁸ A ɛ Farisii te la nyokpoa kɛ waa dɛ ba kwaa dii la, o ta nɔɔra samɛ ɡɛ ba nawee wa aa dɛ baɡle la.

³⁹ Asɛ Yeesu ŋɔ o be ŋɔ, “He Farisii tena do kɛŋɔ baa loo numoli ne hɛne bwara dɛ ɡel a bini la. Nɛra sie ta waa ɡboo hɛɛ ɛ, kɛ he bambile bini te, wechɔɡa ne kwaa ta sibeɡra ɡboo he bwa.

⁴⁰ Gɛna! Korowii waa ta yaa nɔ, o laa ɛ ya bini ne ya baŋ bwa kɛɛ?

⁴¹ Hé kpɔ kwaa haa nyina cheɡ la dɛɛ kɛ nyaara he bambile bwa ne ásɛ komɛlbwa do wer tɛ heya.

⁴² He Farisii tena, hé bwɛɛlɛ kɛ haa dɛ tɛ Korowii o bɔr he par nyoa kondikonjeɡre kwaraa ta, kɛ dɛ vɛh kasinteŋ ne Korowii nyina te la. Anɔ nɔɔ chɛ kɛ hɛ́ɛ ɛ, kɛ he bɛ anɔ la aa jaa la ɡel.

⁴³ Farisii tena, hé bwɛɛlɛ kɛ haa dɛ nyin sobɔrdɛɛɡa cheremi deene bini, dɛɛ nyin kɛ baa duu heyaa nɛra baah ta nɔ.

⁴⁴ Hé bwɛɛlɛ! He do kɛŋɔ ŋwama nɛra aa wola a waa jemɛ dɛɛ valɛ a ta ken.”

⁴⁵ Belaa Tɔnjerema la bɛl ŋɔ Yeesu be ŋɔ, “Nomoa, dɛ he ŋɔ ɡɛ naa, dɛ he jo ya ɡba nɛ.”

⁴⁶ Anee Yeesu chaŋo ŋɔ, “He Tɔnjerema haa dɛ baɡle Korowii Waa la ɡe, hé bwɛɛlɛ. Hé kpɔ wekpeɡa aa do kɛŋɔ bone dɛ dawɛ nɛra nɛ, kɛ dɛ te berɛ laa nɔn kpɔ a ta.

⁴⁷ Hé bwɛɛlɛ. Heyaa ma kwaa chɔŋre Korowii keamere ŋwama ta la. Gɛ nɛra nɔ laa he naawa kpoo la aa?

⁴⁸ Kwaa haa maa chɔŋre Korowii keamere la ŋwama la ta la baɡlɔ kɛŋɔ he ɡbabir sɛh waa he naawa aa ɛa la ta.

⁴⁹ Anɔ waa Korowii bol o Tɔn la baa dɛ yerɔ Wejema la bini ŋɔ, ‘Mɛɛ tomɛ n keamere ne toroma ba bee, baa kpoo banee dɛ́ fiiɡi bane’ la.

⁵⁰ Anomanta, Korowii ɛɛ pɛɛ fini nɔ nɛra o keamere nɛra aa kpoo ba le harɛ mumpar la bwa waa.

⁵¹ Dɛ le Ebel kpoe ta ka tel Sekaria baa kpoo bela baa dɛ fuh kwaa dɛɛ tɛ Korowii ne Korowii Dea la tenten baah ta la. Kasinteŋ, n dɛ ŋɔ he be, Korowii ɛɛ pɛɛ fini nɔ nɛra ba bwa waa.

⁵² Hé Tɔnjerema ɡe bwɛɛlɛ! He do kɛŋɔ nɛra baa laa dea Korowii wejema aa lɔ o bini karɛ, dɛ laa koŋkare la kpɔ haa wola o binii jo, he ɡe aa nɛra ŋwɛnɛɛ tɛ bá jo dɛ́ ka hweli.”

⁵³ Yeesu aa le bela kaa la, Tɔnjerema la ne Farisii tena la muɡli o baah taeh, dɛ ɡel o bol waa kohona.

⁵⁴ Ba haɡro bela dɛ́ lawɛ o nyoa.