Lewi Dea Tena 9 - mzwDBL

Sɔfore pa ba toma ɛɛ mun

¹ Tɔpenuatoro wee baa do ba sɔfore toma ta tonɛ la, Mosis yerɛ Arɔn ne o bibaala ne Israel nomonome bwa cheme.

² Mosis ŋɔ Arɔn be ŋɔ, “Lawɛ nabale ne pebal a bini bɛlbwa aa wola kirihiah dii ba Korowii sie. Ásɛ nao la ɛ wechɔɡa kpɔe dɛ kɛ saraha kon, ásɛ pee la ɡe hé kpɔ ɛ saraha baa fuuh.

³ Ásɛ he ŋɔ Israel tena be ŋɔ bá nyin bombal ba ɛ wechɔɡa kpɔe dɛ kɛ saraha, ne nabale waa di benanyoa ne pee waa di benanyoa, a bɛlbwa aa wola kirihiah dii la ba ɛ saraha baa fuah,

⁴ ne nabal dɛ pebal ba ɛ deŋnesɔɔhna saraha tɛ Korowii. Bá kpɔ noo koo mea saraha ta dɛ́ kpɔa ja ba tɛ Korowii. Hé ɛ ɡɛ dɛkalkɛ fini Korowii dɛ́ ba he be.”

⁵ Ba kpɔ komɛlbwa Mosis aa do ba la bwa ba Korowii Dea Cheremibɔr la doonyoa, asɛ nɛra la bwa suuh tel dɛ ba che Korowii sie.

⁶ Anee Mosis ŋɔ, “Anɔ bwaa Korowii do heyaa ŋɔ hɛɛ ɛ á che a ta he won na o jirima.”

⁷ O berɔ ŋɔ Arɔn be ŋɔ, “Kpɔ he wechɔɡa kpɔe dɛ kɛ saraha kwa, ne saraha kwaa haa fuah la ba saraha kon la ta ba soŋe he ne nɛra la bwa wechɔɡa. Kpɔ nɛra la saraha kwaa la ɡe ba soŋe ba wechɔɡa tɛɛ ba ɡɛ Korowii aa ŋɔa la.”

⁸ Anomanta, Arɔn ba saraha kon la ta dɛ ba teŋe nabale la baŋa ɛ wechɔɡa kpɔe dɛ kɛ saraha, dɛ kpɔ soŋe o wechɔɡa.

⁹ Asɛ o bibaala kpɔ chal la ba tɛo, o kpɔ nonii do a ta dɛ ɛ ane ɛ kwaa aa paaɡe saraha kon la loŋkoni ta la ta. Dɛ fuɡe chal la kabora ta saraha kon la mun ta.

¹⁰ O fuh kon la noorare ne o kporombie dɛ o pwɛ bela waa wera la saraha kon la ta ɡɛ Korowii aa do Mosis la.

¹¹ Kɛ o ol la kar ne o tɔn la te, ó le ane bela baa soɡa la dahara dɛ ka fuah.

¹² Asɛ o teŋe o ɡbabir kon baa fuuh ɛ saraha la baŋa. O bibaala kpɔ chal la tɛo o kpɔa merɛ saraha kon baŋne anaarɛ la bwa ta.

¹³ Ba kper ol la dɛ kpɔ o nyu la ja dɛɛ tɛo beŋkpoŋa beŋkpoŋa, asɛ o fuh a bwa saraha kon la ta.

¹⁴ O yaɡle o tea bini kwaa bwa ne o nakpale, asɛ dɛ kpɔa ja dawɛ saraha kwaa baa dɛ fuah, a do saraha kon la ta la.

¹⁵ Belaa Arɔn kpɔ saraha aa ɛ nɛra la ɡe kwaa ba. O lawɛ booh waa ɛ wechɔɡa kpɔe dɛ kɛ saraha kon la, dɛ teŋe o baŋa ɛ saraha ɡɛ waa ɛ loɡla kon la.

¹⁶ O kpɔ saraha kon baa fuuh la ɡe ba, dɛ ba ɛo ɡɛ aa chɔ le kɛ baa ɛa la.

¹⁷ O berɔ kpɔ mea saraha la ɡe ba, dɛ ɛ nɔndel dɛ pɛ fuah kon baa dɛ ɛ saraha o ta la ta, ane saraha kwaa baa dɛ fuah chɔɔ bɛlbwa la bwa.

¹⁸ O teŋe nabal la ne pebal la baŋa dɛ kpɔ ɛ deŋnesɔɔhna saraha tɛ nɛra la. O bibaala ɛ a chale la ba tɛo, asɛ o ɛ merɛ saraha kon la baŋne anaarɛ la bwa ta.

¹⁹ Arɔn kpɔ nao la ne pee la noorare, ne o muŋɡo noo ne o noyal, ne o kporombie dɛ o pwɛ bela waa wera la,

²⁰ dɛ kpɔa dawɛ ola la bambili ta dɛ kpɔ ba, asɛ dɛ fuh a noorare la saraha kon la ta.

²¹ Arɔn berɔ kpɔ ola la bambili ne a nadiɡ hwie la, dɛ ɡɔɔra nyundua dɛ viiɡa Korowii sie ɡɛ Mosis aa do ba la.

²² Asɛ Arɔn ɡɔɔ o nɔɔra dɛ soŋe andɛɛɡa tɛɛ ba. Waa ɛ wechɔɡa kpɔe dɛ kɛ saraha ne saraha kwaa baa dɛ fuah ne deŋnesɔɔhna saraha la tonɛ la, asɛ o tu ba harɛ.

²³ Ate, Mosis ne Arɔn jo Korowii Dea Cheremibɔr la bini. Baa bera le buse la, ba soŋe andɛɛɡa tɛ nɛra la, asɛ Korowii jirima chaah nɛra la bwa nɛ.

²⁴ Belaa Korowii ɡel nii le dɛ ba fuh saraha kwaa la ne a noorare la bwa nyaam ken saraha kon la ta. Nɛra la bwa aa naa la, ba kpɔ silɛɛ dooɡe lɔŋɔre dɛ ɡuŋi dɛ kpɔ sie piiɡi harɛ.