Lewi Dea Tena 27 - mzwDBL

Koŋkɛɛla kpɔe ba tɛ Korowii Mmarare

¹ Korowii ŋɔ Mosis be ja ŋɔ,

² “Kpɔ waa maa dɛ ba bola nɔ tɛ Israel tena. Dɛ nomɛl kpɔ nɛn tɛ Korowii dɛ́ kpɔ pur nyobaɡa aa, suuɡa aa chɛ kɛŋɔ bá bɔ o nyu ta ó dɔ o te laanee

³ ɡɛ bɛlbwa baa sɛah kɛŋɔ bá bɔ. Baa waa di bene dɛ le fifraanɛ ka tel fifraanumɛl la, bá bɔ suuɡapoŋa fifraanue, ɡɛ baa maɡa bil Korowii Dea la.

⁴ Hanomoa ɡe, suuɡapoŋa fifraatoroo chɛ kɛŋɔ bá bɔ.

⁵ Ásɛ bibaa waa di bene dɛ le anue ka tel bene fifraanɛ la ɡe suuɡapoŋa fifraanɛ. Bihaahna ɡe suuɡapoŋa fi,

⁶ ásɛ baala bechajeɡre ɡe baa wola bene anue dɔe mɔɔ la suuɡapoŋa anue. Bechale baa ɛ haahna la, suuɡapoŋa atoro.

⁷ Banomonome ɡe baa ɡwaa bene fifraanumɛl la, suuɡapoŋa fi dɛ anue, ásɛ haahna baa ɡwaa bene fifraanumɛl la ɡe suuɡapoŋa fi.

⁸ Dɛ nɛn waa baɡɛ nyoa la ɛ nomɛl waa wola won dɔ suuɡa dɛ́ bɔ ɡɛ baa teŋa bil nɔ naa, ó lawɛ o nɛn la ba sɔfo sie, ásɛ o nyiŋi suuɡa aa chɛ kɛ ó bɔ la ta tɛo ó bɔ.

⁹ Dɛ naate nyobaɡa kon la ɛ kondɛɛre waa wera kɛ ba kpɔ ɛ saraha tɛ mɛ naa, a chɛ kɛ ɡɛ kondɛɛre la do ɡoroŋ.

¹⁰ Ba bɛ ondoŋ kpɔ charɛ ondɛɛɡe kɛɛ dɛ́ kpɔ ondɛɛɡe charɛ ondoŋ. A ba ɡɛ naa, dɛ a bwa berɛ Korowii kwa dɛ do ɡoroŋ.

¹¹ Kɛ dɛ o ɛ kondɛɛre waa wola were kɛ ba kpɔ ɛ saraha tɛ mɛ naa, a chɛ kɛ naate kpɔ ka chaɡle sɔfo.

¹² Onee dɛ́ nyiŋi dɛ́ baɡle o wer ne o wer bɛ doe bwa dɛ́ baɡle o yoɡ. Gɛ bwa waa baɡle la, dɛ o yoɡii.

¹³ Dɛ naate berɔ dɛɛ nyin kɛ ó yawɛ aa, a chɛ kɛ ó bɔ suuɡa la dɛ́ bɔne a bini bɔre anue dɛ́ bɔ bɔrbeŋkpoŋ ja a ta.

¹⁴ Dɛ nɛn kpɔ o dem tɛ ŋɔ o ɛ men Korowii kon aa, sɔfoo chɛ kɛŋɔ ó baɡle o wer ne o wer bɛ doe bwa dɛ́ baɡle o yoɡ. Gɛ bwa waa baɡle la, dɛ o yoɡii.

¹⁵ Naate waa kpɔ dem la tɛ mɛ la berɔ dɛɛ nyin o yawɛ aa, a chɛ kɛ ó bɔ yoɡ baa teŋa bil la, dɛ́ bɔne suuɡa la bini bɔre anue, dɛ́ bɔ bɔrbeŋkpoŋ ja a ta.

¹⁶ Dɛ nɛn kpɔ o harɛ pera tɛ men Korowii aa, kondwee baa du harɛ la taa baa ba cheɡa, dɛ́ chaɡle harɛ la yoɡ. Mea kuruware fi bɛlbwa ɛ suuɡapoŋa fifraanue.

¹⁷ Dɛ naate kpɔɔ tɛ mɛ a bena baa berɛ bɛlbwa kon dɛɛ tɛo la ta naa, a chɛ kɛ yoɡ la che ɡɛ.

¹⁸ Kɛ dɛ a habɔɔ, o berɔ kpɔ tɛ mɛ naa, sɔfo la chɛ kɛ ó na bene aa kaa mɔɔ ba berɛ bɛlbwa kon dɛɛ tɛo o ta la, dɛ́ ɡel o yoɡ ba harɛ tama.

¹⁹ Dɛ naate la berɔ dɛɛ nyin o kon aa, a chɛ kɛ ó bɔ yoɡ la, ásɛ dɛ bɔne yoɡ la bini bɔre anue, dɛ́ bɔ bɔrbeŋkpoŋ ja a ta dɛ́ berɛ lɛ.

²⁰ Kɛ dɛ o yoɡo tɛ nɛmpɛɛ dɛ men Korowii nɔn ta laa o do kpa aa, o ta ŋwɛnɛ dɔe dɛ́ yawɔ kpa.

²¹ Benanyoa baa berɛ bɛlbwa kon dɛɛ tɛo la telo aa, wɛɛ do ɡoroŋee dɛ́ berɛ n kon dɛ́ do sɔfore la nɔn ta.

²² Dɛ nɛn yawɛ harɛ waa wola ba dem kon pera ɛɛ dɛ kpɔ tɛ mɛ naa,

²³ sɔfo la chɛ kɛ ó na yoɡ waa chɛa dɛ́ teŋe, dɛ́ ka tel a bena baa berɛ bɛlbwa kon dɛɛ tɛo la ta, ásɛ naate la bɔ yoɡ baa teŋa la awola tɔpere la tenten. Suuɡa waa bɔ la ɛ men Korowii kwa.

²⁴ A ɡɛ benanyoa la ta la, a chɛ kɛ naate berɛ harɛ la tɛ kon te waa yawa dɛ le o be la.

²⁵ Gɛ baa maɡa bil Korowii Dea a ɛ suuɡa bwejeɡre fifraanɛ la taa baa ba nyiŋa, dɛ́ baɡle komɛlbwa yoɡ.

²⁶ Nomɛlbwa bɛ kondɛɛre biloɡle kpɔ ba tɛ mɛ, dɛkalkɛ a ɛ n kwaa wubwa. Dɛ nao kɛɛ peerii yoo, o ɛ n kon.

²⁷ Dɛ kondɛɛre waa wola were ne dii yaa, kon te la ɛɛ berɔɔ won yawɔ ɡɛ baa teŋe o yoɡ la, dɛ́ bɔne yoɡ baa teŋa bil la bini bɔre anue dɛ́ bɔ bɔrbeŋkpoŋ ja a ta. Dɛ kon te la ta berɛ won yawɛ aa, nɛnfale ɛɛ won yawɛ ɡɛ baa teŋe o yoɡ bil la.

²⁸ Nomɛlbwa ta chɛ kɛ ó yoɡ kɛɛ dɛ berɛ yawɛ kon waa kpɔa ba tɛ mɛ dɛ ku n nɔn la. Dɛ nɛnee kɛɛ kondɛɛre kɛɛ harɛɛ yoo, o do ɡoroŋ dɛ tɛ mɛ, dɛ ɛ n kon pi.

²⁹ Dɛ nɛn kwaraa ba kpɔ ba tɛ mɛ ɡɛ ŋwɛnɛ la ta naa, nɛn aa won berɛ yawɔ kpa. Kpoe dena chɛ kɛ bá kpoo.

³⁰ Kondikwaa bɛlbwa aa le harɛ la ta dɛ ɛ mea kɛɛ daa nɔna la, a chɛ kɛ he bɔne a bɛlbwa bini bɔre fi, dɛ́ kpɔ bɔrbeŋkpoŋa ba tɛ men Korowii. A ɛ kwaa aa do ɡoroŋ dɛ tɛ mɛ.

³¹ Dɛ nomɛl dɛ nyin kɛŋɔ ó berɛ yawɛ a bini bɛlbwa naa, a chɛ kɛ ó bɔ yoɡ baa teŋa bil la, ásɛ dɛ bɔne yoɡ la bini bɔre anue, dɛ́ bɔ bɔrbeŋkpoŋ ja a ta.

³² Kondɛɛre bɛlbwa bini onɔ la waa ja fi la do ɡoroŋ, dɛ ɛ men Korowii kon. Haa dɛɛ kura la, hé kpɔ konswɛm pe o bwara á chaɡle kɛ o ɛ n kon.

³³ A ta chɛ kɛ kondɛɛre te la chale a bini, dɛ́ kpɔ bɛl charɛ o dɔŋ. O ɛ ɡɛ naa, kondɛɛre anɛ la bwa ɛɛ berɔ ɛ men Korowii kwa dɛ́ do ɡoroŋ, ásɛ nomɛlbwa aa won berɛ yawa kpa.”

³⁴ Mmarare nɔɔ Korowii che Mosis nɛɛ Sinai Bwejen ta, dɛ kpɔ tɛ Israel tena.