Lewi Dea Tena 25 - mzwDBL

Bennuanɛ baa wola harɛ ta parɛ wa

¹ Korowii berɔ bol waa Mosis be Sinai Bwejen la ta dɛ ŋɔ

² ó ŋɔ Israel tena be ŋɔ, “He baa tel harɛ maa kpɔa dɛɛ ba heyaa tɛɛ la ta naa, hé koh men Korowii wa, dɛ́ ɡel harɛ la ɡbabir dɔ ona saŋ bɛl tɛ mɛ.

³ Hé dɔ bene anumɛl dɛ́ parɛ, dɛ́ kuu he ɡrepo daa nyoo ásɛ a won nɔnɛ, dɛ́ boa he koo kondikwaare nyoa.

⁴ Kɛ bena waa teŋa nuanɛ ta te, a chɛ kɛ hé ɡel he harɛ la onɛ dɛ tɛ mɛ. A ta chɛ kɛ he parɛ kooni kɛɛ dɛ́ kuu he ɡrepo daa nyoo. Hé ɡel tɛ men Korowii.

⁵ Kondikwaa a ɡbo aa le he kooni ta he ɡbabir aa wola an due la, hé dɔ ŋwɛnɛ dɛ́ ka kpɔ tama ba di, kɛ he bɛ an komɛ. Hé dɔ ŋwɛnɛ dɛ́ ka tɔɔ ɡrepo daa haa wola a nyoo kuure la nɔna tama, kɛ he bɛ an chaa. Harɛ la chɛ kɛ ó onɛ ɡɛ bena la ta.

⁶ Anɔ la haa ka kpɔa le kooni ta ba di a bena laanee dɛ́ ɛ kondikwaa tɛ he ne he yoma baala ne haahna, ne nɛra baa ɛ toma hɛɛ bɔ ba kem, ne hɔɔhra baa baa so he bini tama,

⁷ ne he kondɛɛre dɛ kpɔɡ bini ola aa lɔ harɛ la ta te bwa dɔ ŋwɛnɛ dɛ́ dia. Komɛlbwa aa le harɛ la ta bwa, ba won a dii.

Benanyoa baa berɛ kwaa dɛɛ tɛ a tena

⁸ Dɛ he kure Ona Tɔpera anuanɛ bele anuanɛ naa, aa ɛ bene fifraanaarɛ dɛ anuanaarɛɛ.

⁹ A ɡɛ bene fifraanaarɛ dɛ anuanaarɛ la habɔɔ, korobie anuanɛ tɔpera fi ta la, hé ɡel ba hoh bɛla harɛ la ta bobɛlbwa. O ɛ Wechɔɡa Soŋa Korowii Be Ó Kpɔ Kɛ Tɔpejen, a chɛ kɛ bá hoh bɛla harɛ la ta.

¹⁰ Benanyoa waa teŋa fifraanue la te, hé le cheɡ kɛ bena waa do ɡoroŋ, dɛ́ ɡel nomɛlbwa waa lɔ harɛ la ta no kɛŋɔ bɛlbwa won o nyu dii name. O ɛ bena komɛlbwa kɛɛ nomɛlbwa aa bera dɛɛ kaa bela waa lea. Dɛ nomɛl fa yoɡ o kon kɛŋɔ, harɛ waa ɛ o dea kondɔɔh tɛ o dɔŋ aa, o berɛ kaa kon tena be. Ásɛ nomɛlbwa ɡe baa yoɡu o ɛ yom la berɛ kaa o nɛra be, dea waa le o ta.

¹¹ A ɡɛ benanyoa waa teŋa fifraanue nɔ, a ta chɛ kɛ hé du komɛlbwa he kooni ta, kɛɛ hé komɛ anɔ la a ɡbo aa lea, kɛɛ dɛ́ chaa ɡrepo daa nɔna haa wola a nyoo kuure dɛ kwaara cheɡ.

¹² O ɛ bena komɛlbwa kɛɛ nomɛlbwa aa bera dɛɛ kaa bela waa lea. A chɛ kɛ ó do ɡoroŋ tɛ heya. Hɛɛ di kondikwaa haa dɔa le kooni ta la ɡbo.

¹³ A ɡɛ bena nɔ ta, nomɛlbwa kon waa yawa le o dɔŋ be chɛ kɛ ó berɛ kaa o dɔɔ be.

¹⁴ Anomanta, dɛ he yoɡ harɛ kɛɛ dɛ yawɛ le he dɔŋ be naa, a ta chɛ kɛ he den kpɔ berɛ he kon kwara.

¹⁵ Dɛ he dɛ yoɡ harɛ kɛɛ dɛ yawɛ dɛɛ le he dɔŋ be naa, nyiŋi bene haa dɔa dɛ́ kpɔ parɛ harɛ la mɔɔ dɛ́ di o yoɡ. Gɛ del haa parɛ la taa chɛ kɛ hé nyiŋi dɛ́ yawɛ.

¹⁶ Dɛ naate dɛ yawɛ harɛ la ó biɡri o nɔn ta naa, a chɛ kɛ yoɡ la kaa nyundua, kɛ dɛ tɔpere la aa jaŋne doe ba naa, amɔ yoɡ la chɛ kɛŋɔ ó ba harɛ. Dɛkalkɛ kondikwaa aa le harɛ la ta ɡboo o yoɡ dɛɛ tɛɛ.

¹⁷ Hɛ́ɛ ɔmɛ Korowii dɛ́ɛ berɛ dɔŋa faahra. Men Korowiirii bola.

¹⁸ Hɛ́ɛ nyiŋi kɛrɛdɛ, dɛ́ɛ teŋɛ me Mmarare bwa ta, ásɛ dɛ won so sodɛɛɡa harɛ nɔ ta he bwara sɔɔh heya.

¹⁹ Harɛ la ɛɛ ɛ kondikwaa tɛ heyaa he di ɡɛ haa dɛ nyin, dɛ́ so bosɔɔhna ta.

²⁰ Bɛl ɛɛ bɔɔro ŋɔ, ‘Bena waa teŋa nuanɛ yaa wola komɛlbwa kooni ta due kɛɛ yaa wola daa nɔna chaa nɔ, dɛ bɔkwaa yaa ba dɔe dɛ diɔ?’

²¹ Mɛɛ ɡeloo harɛ la do wer kohona bennumɛl la ta, ásɛ kondikwaa aa le o ta ba la won tel heya bene atoro.

²² Haa parɛ bennuatoro ta la, bennumɛl kondikwaa la ane ta ɛɛ kao, dɛ́ tel heyaa ka tel saŋ haa berɛ ba komɛ bennuanaarɛ kwa.

²³ Hɛ́ɛ berɛ harɛ yoɡa tɛ nɛn o den ɛ o kon kwara, dɛkalkɛ he ɡbabir kon laa. Men Korowii konee. He do kɛŋɔ hɔɔhra dɛɛ nyiŋi o ta.

²⁴ Nomɛlbwa baa yoɡ harɛ tɛo la, ó jemɛ kɛŋɔ harɛ te la dɔ ŋwɛnɛ kɛŋɔ ó berɛ ba lɛ o kon.

²⁵ Dɛ he bini bɛl nyao dɛɛ yoɡ o kondɔɔh kon bɛl aa, o lole tenten lɛ yawɛ.

²⁶ Naate la ta lole bɛlbwa dɔe o yawɛ kon la dɛ berɛ ba dɔ suuɡa aa, ó kpɔ kon la ɛ o ɡbabir kon.

²⁷ Dɛ nɛmpɛɛ yawa aa, a chɛ kɛŋɔ ó bɔɔ kem, dɛ harɛɛ yaa, ɡɛ naate fe aa parɔ ka tel mɔɔ bodia benanyoa tel la, ó bɔɔ o kem ɡɛ.

²⁸ Kɛ dɛ kon te la aa suuɡaa dɔ dɛ́ kpɔ lɛ o kon la tenaa, ó do naate nɔn ta ka tel bodia benanyoa la ta mɔɔ kon te la lɛ o kon.

²⁹ Dɛ nomɛl yoɡ dem waa lɔ bwɛjen baa ma danjwɛjen baro ta naa, o berɔ dɔ ŋwɛnɛ dɛ berɛ bɔ o kem, dɛ́ lɛ o kon benanyoa beŋkpoŋ ta.

³⁰ Kɛ dɛ naate ta wone bɔ kem la dɛ lɛ dem la benanyoa beŋkpoŋ la tenten ta naa, o ta ŋwɛnɛ dɔe kɛŋɔ ó won lɛ kpa. O berɛ naate waa yawa la ne o naanar kon, baa wola berɛ kpɔ kon te kon tɛo kpa. Hale bodia bena la ta.

³¹ Deene aa lɔ bwɛjeɡre ta baa wola danjwɛjen bɛlbwa mae bara la tena te dɔ ŋwɛnɛ, dɛ́ bɔ a kem dɛ́ berɛ lɛ. Bodia bena la ɡe telaa, naate la won kon te kon kpɔe dɛ tɛo.

³² Lewi dea tena te dɔ ŋwɛnɛ saŋ bɛlbwa, dɛ́ bɔ ba deene baa yoɡa ba bwɛɛre ta kem dɛ́ lɛ.

³³ Dɛ Lewi dea te dɔ dem bwɛjena nɔ bɛlbwa ta dɛ yoɡ, o ta wone berɛ bɔ o kem dɛ lɛ aa, naate waa yawa la chɛ kɛ ó berɛ kon la tɛ bodia benanyoa la ta. Dɛkalkɛ deremi baa dɔa ba bwɛjena ta laanee ɛ ba ɡe kondɔɔh tenten Israel tena bini.

³⁴ Kondɛɛra dibɔra aa bar Lewi dea tena bwɛɛre dahare la ta chɛ kɛ ba yoɡa. A ɛ ba kondɔɔh aa wola chɛɛ kɛŋɔ a le ba nɔn ta saŋ bɛlbwa bwa.

³⁵ He dɔŋ Israel te soɡe he baah dɛ nya o ta suuɡa dɔe dɛ́ cha o te naa, hé chao kɛŋɔ haa cha hɔɔh he ne waa soɡa, ɡɛ aa ɛ ásɛ o ta won so he baah ta.

³⁶ Hɛɛ berɛ a nee bɛlbwa kpɔe dɛ́ chɔŋɛ a ta, he ɔmɛ Korowii ásɛ o won so he baah ta.

³⁷ Suuɡa bɛlbwa haa kemɔ la, hɛɛ berɛ a nee bɛlbwa kpɔe dɛ́ chɔŋɛ a ta, ɡɛɛ aa wola chɛɛ kɛŋɔ hé kpɔ yoɡ dawɛ kondikwaa haa yoɡ tɛo ta.

³⁸ Men Korowiirii bola, menee le he ne Ijipt harɛ ta, dɛ kpɔ Keenan harɛ tɛ heyaa o ɛ he kon, dɛ ɛ Korowii haa dɛ tom mɛ.

³⁹ He dɔŋ Israel te nyao dɛɛ nyin o yoɡ o te tɛɛ kɛŋɔ yom aa, a ta chɛ kɛ hé ɡel o ɛ toma kɛŋɔ yom.

⁴⁰ Gel ó so kɛŋɔ nɛn waa ba dɛ ɛ toma hɛɛ bɔɔ kem, kɛɛ hɔɔh waa bala dɛ ba so tama, dɛɛ tomɛ ka tel bodia benanyoa la ta.

⁴¹ Gɛ saŋ nɔɔ naate ne o bii ɛɛ ba ba lolanar be kaala, dɛ́ ka so ba kondɔɔh ta.

⁴² Israel tena aa ɛ n bonɔɔna n kpɔ ba le Ijipt harɛ ta ba nomanta, a ta chɛ kɛ bá yoɡ ba kɛŋɔ yoma.

⁴³ Hé ɔmɛ Korowii haa dɛ tomɔ, ásɛ dɛ bɛ ban fiiɡi.

⁴⁴ Dɛ he dɛ nyin yoma aa, hɛɛ won yaɡ ba le harɛre aa bar heyaa la ta.

⁴⁵ Hɛɛ won yawɛ nɛŋhɔɔhra baa baa so he bini tama, dɛ́ loɡle he harɛ ta bii bá ɛ he nɛndɔɔla. Ásɛ dɛ kpɔ ba ɛ he kondɔɔh,

⁴⁶ dɛ́ kpɔ ba do he bii ɡe nɔn ta kɛŋɔ he kapɛrɛ kwa, ásɛ baa tom ba dɛ ka tel saŋ baa ba serewe. Kɛ hɛɛ berɛ he bala Israel tena fiiɡa.

⁴⁷ Dɛ nɛŋhɔɔh waa soɡe he bini dɔ suuɡa, asɛ he bini bɛl nya dɛ yoɡ o te tɛo kɛŋɔ yom kɛɛ dɛ tɛ nɛŋhɔɔhra la lolanar bini bɛlbwa naa,

⁴⁸ o ta dɔ ŋwɛnɛ kɛŋɔ bá lɛo ba o nɛra bini. O lolanar bini bɛl ɛɛ won bɔ o nyu kem la dɛ́ lɛo.

⁴⁹ O naara kɛɛ o naara ɡe bie, kɛɛ o lole tenten bini bɛlbwa ɛɛ won bɔ o nyu kem dɛ́ lɛo. Dɛ o ɡbabir ɡee bera ba dɔ suuɡa aa, wɛɛ won bɔ o nyu kem la, dɛ́ lɛ o te.

⁵⁰ O ne naate waa yawɔ la kure saŋ waa yoɡ o te tɛo dɛ ka tel bodia benanyoa la ta. A chɛ kɛŋɔ ó bɔɔ ɡɛ haa kpɔ nɛn o ɛ toma tɛɛ bene waa ɛ toma, he yon bɔɔ kem la.

⁵¹ Dɛ bene aa kaa la ta kan aa, a chɛ kɛ ó nyin suuɡa baa kpɔa yawɔ la pera tɛo, dɛ́ le ɡɛ bene aa kaa la aa doa.

⁵² Dɛ a ka tama mɔɔ bodia benanyoa la tel aa, he nyiŋi dɛ́ bɔ suuɡa tama aa chɛa tɛo dɛ́ lɛ o te.

⁵³ Nɛŋhɔɔh la nyiŋi naate kɛ o bonɔɔ waa kpɔɔ dɛɛ bɔɔ kem benanyoa bɛlbwa ken. Nyiŋi kɛŋɔ haa on fiiɡa bɛlbwaa fiiɡi.

⁵⁴ Anɔ bwa habɔɔ, o ta wone lɛ o te dɛ ta do nɛn waa yawɔ la lɔɡa aa, o ne o bii bwa dɛ dɔ ba te bodia benanyoa la ta,

⁵⁵ dɛkalkɛ n bonɔɔnaa Israel tena n laɡ ba le Ijipt harɛ ta. Menee Korowii haa dɛ tom mɛ la.”