Lewi Dea Tena 24 - mzwDBL

Ɔleve noo ne paanoo aa cheɡɛ Korowii sie

¹ Korowii ŋɔ Mosis be ŋɔ ó bol Israel tena la be ŋɔ,

² bá kpɔ ɔleve nodɛɛɡa baa harama kɛrɛdɛ ba tɛo ó kpɔ dɛɛ do kandea daa la bini, ásɛ o kandere che le dɛɛ hɔ dɛ bɛ dime bwa.

³ Arɔn chɛ kɛ o che pateesan la sie Korowii Dea Cheremibɔr la bini, Korowii Ne Nɛwɛnyina Fɔo Daka la habɔɔ bela dɛɛ nyiŋi a ta. Aa che n sie bela jɔmɔraa dɛɛ hɔ tɔɔ ba per chɔɔ saŋ bɛlbwa. A ɛ waa aa chɔ le tɛ he ne he naanar baa ka ba bwa.

⁴ Kandere aa lɔ kandea daa la baa kpɔ suuɡaswɛm ɡbo ɛo o che Korowii sie la chɛ kɛŋɔ bá nyiŋa aa hɔ tɔpere bɛlbwa.

⁵ Kpɔ men aa kpera kɛrɛdɛ ɛ paanoo fi dɛ anɛ. Kuruware anɛɛ chɛ kɛ hé kpɔ ɛ paanoo la beŋkpoŋ bɛlbwa.

⁶ Kpɔ paanoo la bil teebur waa cheɡɛ Korowii sie ba kpɔ suuɡaswɛm tenten ɛo la ta. A chɛ kɛ hé bila bɔre anɛ, anumɛl teŋɛ dɔŋa nɛ do baŋ bɛl, ásɛ anumɛl ɡe do baŋ bɛl ɡɛ tenten.

⁷ Baŋ bɛlbwa ta la, ɛ daawiile a sɔɔh aa soma bil a jwɛh a ɛ saraha kwaa baa fuh cheɡ paanoo la naa ta tɛ Korowii.

⁸ Arɔn che Israel tena naa ta, dɛ́ kpɔ paanoo la baa bil Korowii sie Ona Tɔpere bɛlbwa ta. Ó teŋɛ dɛ́ kpɔa baa bil Korowii sie ɡɛ, á ɛ fɔo Korowii ne Israel tena aa fɔwa o do n ne ba baah ta saŋ bɛlbwa dɛɛ la.

⁹ Paanoo la ɛ Arɔn ne o bibaala kwa aa chɛ kɛ bá dia bela waa do ɡoroŋ, dɛkalkɛ paanoo laanee ɛ saraha kwaa aa do ɡoroŋ kohona, dɛ le saraha kwaa baa fuah dɛɛ tɛ Korowii dɛ ɛ Arɔn ne o bibaala dibɔr la ta.

Nɛnhɛl we-ɛɛla te bwea foɡra

¹⁰ Baa bɛl fa lole o mɛɛ ɛ Ijipt te, asɛ o nya ɡe le Israel. O iro awola bɛl, dɛ la bela Israel tena aa soɡa, asɛ yoi ka chole o ne Israel te bɛl baah.

¹¹ Dɛ o nya sɔne Sɛlomet, Dibri waa le Dan dea biee on. Sɛlomet bie la ɛ nɛnhɛlwa dɛ taah Korowii, asɛ ba lawɔ ba Mosis sie,

¹² dɛ lawɔ do dea dɛɛ kpa waa Korowii aa ŋɔ bá ɛo.

¹³ Belaa Korowii ŋɔ Mosis be ŋɔ,

¹⁴ “Hé lawɛ baa waa bol nɛnhɛlwobol la le kaa bela haa soɡa la dahara. Nomɛlbwa waa noa kɛŋɔ o bol mɛ nɛnhɛlwobol la, bá kpɔ nɔn dawɛ o nyu ta, ásɛ nɛra la bwa foɡro bwea kpo.

¹⁵ Berɛ ŋɔ Israel tena be kɛŋɔ, ‘Nomɛlbwa waa taah men Korowii waa dɛ tom mɛ la chɛ kɛ ó dɔ deŋnetɛra.

¹⁶ A chɛ kɛ bá kpo nomɛlbwa waa bol men Korowii nɛnhɛlwobol la. Israel tee kɛɛ nɛŋhɔɔhree yoo, a chɛ kɛŋɔ nɛra la bwa foɡre naate bwea kpo.

¹⁷ Nomɛlbwa waa kpo o dɔŋ la chɛ kɛ bá kpo o ɡe,

¹⁸ ásɛ nomɛlbwa ɡe waa kpo o dɔŋ kondɛɛre la chɛ kɛŋɔ ó nyin bɛl ba chiɡ o naa ta tɛ kon te. Kondɛɛre o siwi taa lolee chɛ kɛ ó lawɛ ba chiɡ onɔ la waa kpoo la naa ta.

¹⁹ Nomɛlbwa waa do o dɔŋ bol la chɛ kɛŋɔ bá do o ɡe bol bɔ kem.

²⁰ Dɛ naate la hoɡii o ku aa, bá ku o ɡe kon, o siwi beŋkpoŋii o fome aa, bá fome o ɡe kon ɡɛ. O nyenee o fome aa, bá fome o ɡe nyen. Gɛ bwa naate aa do o dɔŋ bol laanee chɛ kɛ bá ɛ o ɡe bɔ kem.

²¹ Nomɛlbwa waa kpo o dɔŋ kondɛɛre la chɛ kɛ ó nyin bɛl ba chiɡ o naa ta. Kɛ nomɛlbwa waa kpo o dɔŋ la te chɛ kɛ bá kpo o ɡe.

²² Mmara beŋkpoŋii chɛ kɛ ó chɔ le tɛ deela ne hɔɔhra bwa. Menee Korowii haa dɛ tom mɛ la.’ ”

²³ Mosis aa bol anɔ baɡle Israel tena la, ba kpɔ baa la le kaa bela baa soɡa la dahara, dɛ ka foɡro bwea kpo. Gɛɛ a do Israel tena la ɛ ɡɛ Korowii aa do Mosis la.