Lewi Dea Tena 22 - mzwDBL

Saraha kwaa ɡoroŋ doe wa

¹ Korowii ŋɔ Mosis be ja ŋɔ,

² “Ŋɔ Arɔn ne o bibaala be kɛŋɔ, bá nyiŋi Israel tena saraha aa do ɡoroŋ ba yon kpɔ baa tɛ mɛ la ta kɛrɛdɛ, ásɛ dɛ bɛ n sɔndɛɛɡe waa do ɡoroŋ la chɔɡ. Men Korowiirii bola.

³ Berɛ ŋɔ ba be kɛŋɔ, ba naanar baa ka ba la bini bɛlbwa waa kah doŋa dɛ ɡarɛ ba Israel tena saraha aa do ɡoroŋ ba kpɔ baa tɛ mɛ la jwɛɛh la, bá bara naate n sie bala. Men Korowiirii bola.

⁴ Arɔn naanar bini bɛlbwa bwadabii weebuula aa lɔ o nɛ, kɛɛ o bwara aa won bala saŋ bɛlbwa la ta chɛ kɛ ó di saraha kwaa aa do ɡoroŋ la, nemenɛ a ɡɛ doŋa le o nɛɛ mɔɔ. O berɔ leɡe komɛlbwa konlale aa kpɔ doŋa kaoh, kɛɛ nomɛlbwa o bwara aa won bala saŋ bɛlbwa,

⁵ kɛɛ dɛ leɡe kontuuɡi waa ɡela o kah doŋa, kɛɛ dɛ nɛnee yoo, kɛɛ komɛlbwa waa ɡel ó kah doŋa bwa la, nemenɛ doŋa la le o nɛɛ mɔɔ.

⁶ Sɔfo bɛlbwa waa leɡe a ɡɛ kon nɔ bɛlbwa la kah doŋa ka tel jɔmɔra. Waa berɛ won di saraha kwaa aa do ɡoroŋ la bɛlbwa, nemenɛ ó sɔ nee mɔɔ.

⁷ Wee aa le harɛ la, dɛ naate doŋa bwa le o nɛ, ásɛ mɔɔ o won di saraha kwaa aa do ɡoroŋ la, dɛkalkɛ a ɛ sɔfo la kondikwa.

⁸ A ta chɛ kɛ ó di konlale waa kaa piu, kɛɛ onɔ la kpɔɡ bini olchɔɡe aa lawɔ á che a ta ó kah doŋa. Men Korowiirii bola.

⁹ Sɔfore bwa chɛ kɛŋɔ bá teŋɛ dɛɛ ɛ anɔ la maa do ba a ta, dɛ bɛ sie laa kpɔ a ta, dɛ́ di bolchɔɡe dɛ́ ba sewɛ. Menee Korowii, menee lee ba cheɡ dɛ ɡel ba do ɡoroŋ.

¹⁰ Nomɛlbwa waa wola sɔfore dea leɛ la ta ŋwɛnɛ dɔe kɛ ó di saraha kwaa aa do ɡoroŋ nɔ. Hɔɔh waa baa choɡo, kɛɛ nɛn waa lɔ o be dɛɛ ɛ toma wɛɛ bɔɔ kem ɡe ta ŋwɛnɛ dɔe kɛŋɔ ó di.

¹¹ Kɛ dɛ sɔfo yawɛ yom aa, o won ɡɛ kwaa la dii, ɡɛɛ nɛndɔɔle baa lolɔ dem bela ɡe won a dii.

¹² Sɔfo bɛlbwa bihaah waa ka yalɛ nɛmpɛɛ waa wola sɔfo ɛɛ la, ta ŋwɛnɛ dɔe kɛ ó di saraha kwaa aa do ɡoroŋ nɔ.

¹³ Kɛ sɔfo bɛlbwa bihaah o jaa aa sewa kɛɛ dɛ vɛoh dɛ o ta bii dɔe, asɛ dɛ berɛ ba so o mɛɛ be wɛɛ nyiŋu kɛ o bechale saŋ la, o dɔ ŋwɛnɛ kɛ ó di kondikwaa bɛlbwa aa ɛ o mɛɛ kwaa la. Kɛ nɛmpɛɛ waa wola ŋwɛnɛ dɔe la te ta chɛ kɛŋɔ ó dia.

¹⁴ Nomɛlbwa waa koni di saraha kwaa aa do ɡoroŋ nɔ la chɛ kɛ ó nyin a nachiɡe ba tɛ sɔfo. Dɛ́ berɛ kpɔ ane ja. Ba bɔne o bini bɔre anue naa, ó kpɔ bɔrbeŋkpoŋ ja tɛ sɔfo la.

¹⁵ Sɔfore la ta chɛ kɛ bá kpɔ doŋa kah Israel tena saraha aa do ɡoroŋ ba kpɔ ba ɛ saraha dɛɛ tɛ mɛ la,

¹⁶ dɛ́ ɡel nɛra baa wola ŋwɛnɛ dɔe kɛ ba dia la di. Sɔfore baa laa sie kpɔ ɡɛ waa nɔ ta la ɛɛ ɡeloo nɛra di bolchɔɡe, dɛ́ dɔ deŋnetɛra. Menee Korowii, men ɡela a do ɡoroŋ.”

¹⁷ Korowii berɔ ŋɔ Mosis be ŋɔ,

¹⁸ ó bol Arɔn ne o bibaala dɛ Israel tena bwa be ŋɔ, “He bini bɛlbwa, kɛɛ hɔɔh bɛlbwa waa soɡe he bini kpɔ saraha kwaa baa fuah la, dɛɛ ba ba tɛ mɛ dɛ nyobaɡa chuɡra saraha kɛɛ saraha aa le o bambile taa yaa,

¹⁹ a chɛ kɛ náate lawɛ kondɛɛre waa wola kirihiah bɛlbwa dii, ombal waa ɛ nao kɛɛ pee kɛɛ booh waa maɡra dɛ tɛ saraha la, ásɛ n won lɛ dɛ́ ɛ waa naate aa dɛ nyin tɛo.

²⁰ Nomɛlbwa bɛ kon waa di kirihiah kpɔ ba ɛ saraha tɛ men Korowii, dɛkalkɛ maa lɛ dɛ́ kpɔ ɛ waa waa dɛ nyin tɛo.

²¹ Nomɛlbwa lawɛ kondɛɛre ba ɛ deŋnesɔɔhna saraha dɛɛ ba bá tɛ men Korowii aa, dɛ nyobaɡa chuɡra kɛɛ saraha aa le o bambile taa yoo, naate ɡel a ɡɛ kondɛɛre la su siwi dɛ bɛ kirihiah bɛlbwa di.

²² Nomɛlbwa bɛ kondɛɛre waa nyoŋa kɛɛ dɛ kuuɡi, kɛɛ baa doo bol kɛɛ waa kwaɡa, ne onɔ la ŋwɛra aa lɔ o nɛɛ dɛɛ wi ne, kpɔ ba ɛ saraha tɛ mɛ. Kondɛɛre waa do ken nɔ bɛlbwa ta chɛ kɛ, ó kpɔ ba saraha kon la ta ŋɔ, bá fuh tɛ men Korowii.

²³ Saraha aa le he bambile ta la te, hɛɛ won kpɔ nao kɛɛ pee o bobɛl aa di kirihiah kɛɛ dɛ mule ba. Kɛ waa were tɛ nyobaɡa chuɡra saraha.

²⁴ Kondɛɛre lur waa mala, kɛɛ dɛ paɡraa ba paɡra kɛɛ teŋa ba teŋo woo, he bɛ kwaa aa do ɡɛ nɔ kpɔ ɛ saraha he harɛre ta.

²⁵ He bɛ ɡɛ kondɛɛre nɔ bɛlbwa lɛ le nɛŋhɔɔh be ba ɛ saraha tɛ men Korowii haa dɛ tom mɛ. Waa were dɛɛ su men Korowii siwi kɛ ń lɛo, o bobɛl aa di kirihiah la nomanta.”

²⁶ Korowii berɔ ŋɔ Mosis be ja ŋɔ,

²⁷ “Dɛ nao, pee kɛɛ booh lolɔ aa, o bie la chɛ kɛ ó do o nya lɔɡa tɔpera anuanɛ. Le tɔpenuatoro wee dɛɛ kaa la, o wer kɛŋɔ he won kpɔ ɛ saraha ba fuuh tɛ men Korowii.

²⁸ He bɛ nao kɛɛ pee ne o bie bwa pɛ teŋe a baŋa tɔpebeŋkpoŋ.

²⁹ Hé kpɔ jam kwaa dɛɛ ba saraha ɛɛ tɛ mɛ naa, hé ɛa ɡɛ aa chɛa dɛ́ won su siwi ń lɛa.

³⁰ A chɛ kɛ hé di o bwa awola tenten. Hɛ́ɛ berɛ o pera ɡela tɔɔ per o ta. Men Korowiirii bola.

³¹ Hɛ́ɛ teŋɛ me Mmarare maa kpɔa tɛ heyaa la ta. Men Korowiirii bola.

³² He bɛ n sɔndɛɛɡe waa do ɡoroŋ la chɔɡ. A chɛ kɛ Israel tena bwa jem mɛ kɛŋɔ n do ɡoroŋ. Menee Korowii, menee ɡela hɛɛ do ɡoroŋ,

³³ dɛ lawɛ heya le Ijipt harɛ ta, dɛ ɛ Korowii haa dɛɛ tom mɛ. Men Korowiirii bola.”