Lewi Dea Tena 21 - mzwDBL

Mmarare aa chɔ le tɛ sɔfore

¹ Korowii berɔ ŋɔ Mosis be ŋɔ ó bol Arɔn bibaala sɔfore la be kɛŋɔ dɛ bɛl lole sewaa, o bɛ o te kpɔ dɛɛ jo o lole la lwe we-ɛɛla ta, dɛ́ kah doŋa,

² nemenɛ o lole tenten kɛŋɔ nya ne mɛɛ, ne o bihaah kɛɛ bibaa, dɛ nime bibaa kɛɛ dɔɔ,

³ kɛɛ nimambihaah waa wola yalɛ mɔɔ o ne o ta so dembeŋkpoŋ ta wɛɛ nyiŋu.

⁴ A ta chɛ kɛ ó kpɔ o te jo o lolanar baa yala we-ɛɛla ta dɛ́ kah doŋa.

⁵ Sɔfo bɛlbwa bɛ o nyu fonɛ kɛɛ dɛ kuu o tampona dɛ́ mɔne o bwara á baɡle kɛ o dɛ ɛ lwe.

⁶ A chɛ kɛŋɔ ó do ɡoroŋ dɛ́ che tɛ Korowii dɛ bɛ o sɔndɛɛɡe la chɔɡ. Dɛkalkɛ onee kpɔ saraha kwaa baa fuah a ɛ kondikwaa aa do ɡoroŋ dɛ ɛ Korowii kwaa la baa tɛo.

⁷ A ta chɛ kɛ sɔfo mo haah waa bɔ jwamane dɛ kah doŋa kɛɛ haah o jaa aa vɛoh. Dɛkalkɛ sɔfore ɛ nɛra baa do ɡoroŋ.

⁸ Nɛra la ɛɛ nyiŋi sɔfore kɛŋɔ nɛra baa do ɡoroŋ, banee kpɔ saraha kondikwaa aa do ɡoroŋ baa tɛ Korowii baa dɛ tomɔ la. Onee Korowii, o do ɡoroŋ dɛ ɡel o nɛra ɡe ɛɛ do ɡoroŋ.

⁹ Dɛ sɔfo bihaah dɛ bɔ jwamane dɛ kah doŋa aa, dɛ o mɛɛ wɛɛ do sihiih la. A chɛ kɛ bá fuuh.

¹⁰ Sɔfo baa leo o bala bini dɛ fuɡe noo do o nyu ta, dɛ ɛo Sɔfonomoa dɛ doo laala la ta chɛ kɛŋɔ ó ɡel o nyumpona loromi kɛɛ ó kɛɛ o laala á baɡle kɛ o lɔ lwe ta.

¹¹ Sɔfonomoa la bɛ bela nɛn aa sewa dɛ chɔ la jo. O ta ŋwɛnɛ dɔe hale dɛ o mɛɛ kɛɛ o nyaa sewa oo, ó ka jo o be dɛ́ kah doŋa,

¹² kɛɛ dɛ́ le Korowii waa dɛ tomɔ Dea ta, kɛɛ dɛ́ ɡel o kah doŋa, dɛkalkɛ ba fuɡe noo do o nyu ta dɛ ɛo Sɔfonomoa tɛ Korowii waa dɛ tomɔ. Korowiirii bola.

¹³ Haah waa wola baa jemɛ bwa laanee chɛ kɛ ó mo.

¹⁴ O bɛ luhaah kɛɛ haah o jaa aa vɛoh, kɛɛ haah waa ɛ jwamane te dɛ kah doŋa mo. O dea waa le o ta haah waa wola baa jemɛ bwa laanee chɛ kɛ ó mo.

¹⁵ Gɛɛ dɛ ɡel o bɛ doŋa kpɔ kah o bii o nɛra bini. Korowiirii leo o do ɡoroŋ.

¹⁶ Korowii berɔ ŋɔ Mosis be ŋɔ,

¹⁷ ó bol Arɔn be kɛŋɔ, o naanar baa ka ba bini bɛlbwa waa di kirihiah la ta chɛ kɛ o kpɔ saraha kondikwaa ba tɛ Korowii waa dɛ tomɔ la saŋ bɛlbwa bwa.

¹⁸ Baa bɛlbwa waa di kirihiah ta a ɡɛ ŋwɛnɛ dɔe. Nomɛlbwa waa ɛ nyoŋe kɛɛ boobi, kɛɛ o bobɛl aa di kirihiah,

¹⁹ ne onɔ la o nɔn kɛɛ o nakpala aa sewa,

²⁰ ne chacha te kɛɛ kiribi te, ne nɛn waa dɔ siweela te bwa soo siwi kɛɛ bwadabii weela kɛŋɔ ŋwɛra aa dɛ wi ne, kɛɛ o lure aa chɔɡa.

²¹ Arɔn naa te bɛlbwa waa di kirihiah la ta chɛ kɛ ó kpɔ saraha kwaa ba Korowii sie dɛ́ ba fuah. O di kirihiah, anomanta, a ta chɛ kɛ o kpɔ saraha kwaa ba n sie ba tɛ Korowii waa dɛ tomɔ.

²² Kɛ wɛɛ won di saraha kwaa baa kpɔa ba tɛo la, anɔ la aa do ɡoroŋ kohona dɛ ɛ o kwaa la ne anɔ la aa do ɡoroŋ la bwa,

²³ kɛ o kirihiah dii nomanta, a ta chɛ kɛŋɔ ó suuh tel pateesan la á ba ɛ kɛŋɔ wɛɛ bɛne saraha kon laanee, dɛ́ ba kpɔ doŋa kah o bɔr waa do ɡoroŋ la. Korowiirii ɡela a do ɡoroŋ.

²⁴ Gɛ waa nɔɔ Mosis bol Arɔn ne o bibaala dɛ Israel tena bwa be.