Lewi Dea Tena 18 - mzwDBL

Kii aa lɔ nɛn kɛɛ ol lawa dɛ chɔ wa

¹ Korowii berɔ ŋɔ Mosis be ŋɔ,

² ó bol Israel tena la be ŋɔ, “Menee Korowii haa dɛ tom mɛ la.

³ He bɛ ɛ kɛŋɔ Ijipt tena he fa aa soɡe ba bini la, ne Keenan tena maa dɛ kaa he ne ba bini nɔ. He bɛ ba we-ɛɛla la kpɔ.

⁴ Hé nyiŋi kɛrɛdɛ dɛɛ teŋɛ me Mmarare ne waa maa dɛ do heyaa bwa ta. Men Korowiirii bola.

⁵ Hɛɛ teŋɛ me Mmarare ne waa maa dɛ do heyaa a ta la bwa ta. Nomɛlbwa waa dɛɛ teŋɛ waa aa lɔ Mmara la bwa ta la, wɛɛ dɔ mkpaa le Mmara la ta teŋa ta. Men Korowiirii bola.

⁶ Nomɛlbwa, dɛ baa kɛɛ haahnee yoo, o ta chɛ kɛ o ne o lole tenten ka chɔ baa ne haah. Men Korowiirii bola.

⁷ Bɛ he nya lawɛ ka chɔ dɛ do he mɛɛ sihiih. O ɛ he nya, anomanta, a ta chɛ kɛ he lawɔ chɔ.

⁸ Bɛ he mɛɛ haah lawɛ chɔ. A ba ɡɛ naa, dɛ duure bɛlbwa toole he ne he mɛɛ baah ta.

⁹ Dɛ́ɛ berɛ he nime kɛɛ nahaah lawa ka chɔ. Dɛ he mɛɛ, kɛɛ nya bie ɡboo ba pɛ lolɛ he ne on dembeŋkpoŋ ta kɛɛ dɛ bobɛlee ba lolɔ kwaraa noo.

¹⁰ Dɛ́ɛ berɛ he bibaa bihaah kɛɛ he bihaah ɡe bihaah lawɛ chɔ. A ɛ sihihwa dɛ tɛɛ.

¹¹ A ta chɛ kɛ he lawɛ he mɛɛ haah bihaah waa ɛ he mɛɛ bie ka chɔ. He ne o bwa pɛ mɛɛ o ɛ he nimambie.

¹² Bɛ he nyaana lawɛ chɔ. O ɛ he mɛɛ lole tenten.

¹³ Dɛ́ɛ berɛ he nyawee kɛɛ nyajen lawa ka chɔ. He nya lole tentenee.

¹⁴ Bɛ he mɛnjen kɛɛ mɛnwee haah lawɛ chɔ. A ɛ sihihwaa tɛ he mɛnjen kɛɛ mɛnwee la. Dɛ́ɛ lii kɛŋɔ o ɛ he nya.

¹⁵ Bɛ he bie haah lawɛ chɔ. A chɛ kɛ he jemɛ kɛ he helaa. Aa were kɛ he lawɔ chɔ.

¹⁶ Bɛ he nime kɛɛ he dɔɔ haah lawɛ chɔ, a ɛ sihihwaa tɛ he dɔɔ kɛɛ nime la.

¹⁷ Bɛ haah nyin dɛ berɛ ka nyin o bie ɡe. Dɛɛ berɛ o bibaa bihaah, kɛɛ o bihaah ɡe bihaah nyina. Ba ɛ haah la lolanar tenten. A ɛ wedoŋa.

¹⁸ Dɛ he haah ta soɡe le o ta sewɛ mɔɔ naa, dɛɛ berɛ o nime kɛɛ nahaah moe dɛ́ ja o nɛ dɛ́ lawɔ chɔ, a ba ɡɛ naa, baa toŋroo.

¹⁹ Bɛ haah lawɛ chɔ o bochɔɡa saŋ. Gɛ saŋ dɛ o ta lɔ doŋa ta.

²⁰ Bɛ he dɔŋ haah lawɛ chɔ dɛ́ kpɔ doŋa kah he bwa.

²¹ Bɛ he bie bɛlbwa lawɛ tɛ bá kpo ɛ saraha tɛ voɡ Molɛk. Dɛɛ berɛ men Korowii haa dɛ tom mɛ nɔ sɔn chɔɡ ɡɛ. Men Korowiirii bola.

²² Bɛ he bandɔŋ lawɛ chɔ baa ne haah. A ɛ waa baa kia.

²³ Baa bɛlbwa bɛ ol lawɛ chɔ dɛ́ kpɔ doŋa kah o te. Haah bɛlbwa ɡe ta chɛ kɛ o ne ol chɔ baa ne haah, a ɛ waa aa wola were kɛ nɛn ɛ.

²⁴ He bɛ he te kpɔ do ɡɛ waa nɔ bɛlbwa ta dɛ́ kah doŋa. Gɛɛ nɛra baa soɡe harɛ maa dɛ ba kpɔe tɛ heyaa nɔ ta ɛ, asɛ dɛ kah doŋa mɛɛ ba ba doŋa le o ta la.

²⁵ Ba we-ɛɛla chɔɡ harɛ la ɡba o doŋ dɛ ba deŋnetɛra ne o ta asɛ o lee ba tɛ.

²⁶ Hɛ́ɛ teŋɛ me Mmarare ne n waa maa dɛ do heyaa la bwa ta. Hé ne nɛŋhɔɔhra bwa baa soɡe he bini ta chɛ kɛ he teŋɛ waa baa kia nɔ ta dɛɛ ɛa,

²⁷ dɛkalkɛ ɡɛɛ nɛra baa tɔ sie ba so harɛ nɔ ta la we-ɛɛla chɔɡ harɛ la o doŋ la.

²⁸ Hé ɡe baa chɔɡ harɛ la aa, wɛɛ le heyaa tɛ ɡɛ waa le nɛra baa tɔ he sie tɛ la.

²⁹ Nomɛlbwa waa ɛ ɡɛ waa nɔ bini bɛlbwa baa kia nɔ la chɛ kɛ bá pero le o nɛra bini.

³⁰ Hɛɛ ɛ waa maa dɛ nyin, dɛ bɛ nɛra baa tɔ sie ba so harɛ nɔ ta la we-ɛɛla maa kia la ta teŋɛ, dɛ́ kpɔ doŋa kah he te. Menee Korowii haa dɛ tom mɛ la.”