Lewi Dea Tena 14 - mzwDBL

Doŋa laa dɛ́ kpɔ bwadabii weebuula te nɛ

¹ Korowii ŋɔ Mosis be ja ŋɔ,

² “Dɛ bwadabii weebuula lɔ nɛn nɛ ba chaoh dɛ la o ne sɔfo be naa, waa aa chɔ le ó laa doŋa bɛlbwa kpɔ o nɛɛ laanee nɔ.

³ Sɔfo la ɛɛ le bwɛɛ la daharaa dɛ́ ka nyiŋu na, o nao kɛŋɔ a toole o nɛɛ kpa aa,

⁴ ó ŋɔ ba nyin jumbii anɛ aa wera ne dii, ne peleme daa ne jiseswɛm, dɛ hesɔp daa ba tɛ weela te baa dɛ ba o doŋa laa dɛ kpɔ o nɛɛ la.

⁵ Sɔfo la ɡel ba dɔ nee waa dɛ palɛ do vii bini, ásɛ dɛ kpɔ jumbii la bɛl ba chaɡɛ vii la ta dɛ́ kpoo.

⁶ Ó kpɔ onɔ la waa wola on kpoe la ne peleme daa la, ne jiseswɛm la ne hesɔp daa la bwa pɛ su jumbie baa kpoo la chal la ta,

⁷ ásɛ dɛ ɛ chal la merɛ naate weebuula aa lɔ o nɛɛ baa ba o doŋa laa dɛ kpɔ o nɛɛ la kera anuanɛ, dɛ́ ŋɔ o be ŋɔ doŋa toole o nɛɛ kpa. Ásɛ dɛ kpɔ jumbie waa wola on kpoe la ta kpɔɡ bini ó ir kaa.

⁸ Nɛn baa laa doŋa kpɔ o nɛɛ la chɛ kɛ ó chɛɡɛ o laala, dɛ́ fonɛ o pona bwa ta dɛ́ sɔ ne, ásɛ o doŋa le o nɛ. Anɔ habɔɔ, wɛɛ wono berɛ ba bela baa soɡa la, kɛ a chɛ kɛ o so o tɛnte dea dahara tɔpera anuanɛ mɔɔ.

⁹ Tɔpenuanɛ wee la telaa, a chɛ kɛ ó berɛ fonɛ o nyu, ne tampona ne sikoŋpona dɛ o bwara pona te bwa. Ó chɛɡɛ o laala dɛ́ sɔ ne, ásɛ doŋa la bwa den le o nɛɛ kwaraa.

¹⁰ Tɔ aa per tɔpenuatoro wee la, ó lawɛ pebali anɛ ne pelor aa di benanyoa, a bɛlbwa aa wola kirihiah dii la, ne men baa nama a kper kɛrɛdɛ kuruware atoro noo aa koo a ta, dɛ noo pɛrɛntoa fah.

¹¹ Sɔfo waa baɡle kɛŋɔ doŋa toole naate nɛɛ la ɛɛ kpɔ o ne ɡɛ kwaa nɔ bwaa ba men Korowii sie, n Dea Cheremibɔr doonyoa bela.

¹² Ásɛ sɔfo la lawɛ pebali la bɛl dɛ́ kpɔ noo pɛrɛntoa fah la ja, dɛ́ kpɔ ɛ bolchɔɡe dii saraha. Ó ɡɔɔra nyundua dɛ́ viiɡa n sie.

¹³ Ó teŋe pee la baŋa boɡoroŋ bela baa dɛ kpoo wechɔɡa kpɔe dɛ kɛ saraha kwaa ne saraha kwaa baa fuah dɛɛ tɛ mɛ la. Gɛɛ chɛ kɛŋɔ ó ɛ, dɛkalkɛ bolchɔɡe dii saraha ne wechɔɡa kpɔe dɛ kɛ saraha kwaa la ɛ sɔfo la kwa. A ɛ kwaa aa do ɡoroŋ kohona.

¹⁴ Sɔ́fo la kpɔ bolchɔɡe dii saraha pee la chal la ane ɛ naate baa laa doŋa dɛɛ kpɔ o nɛɛ la diɡ deŋne nyoa, ne o diɡ nonibal dɛ o nadiɡ nanibal ta.

¹⁵ Sɔ́fo la berɛ kpɔ noo la ane dɛ́ fuɡe do o ɡbabir ɡal nɔmpaa ta,

¹⁶ dɛ́ kpɔ o diɡ noni do a ta, dɛ́ ɛ ane merɛ n sie bela kera anuanɛ.

¹⁷ Ó kpɔ noo aa ka o nɔmpaa bini la ane dawɛ chal o fa aa kpɔa ɛ naate la diɡ deŋne nyoa, ne o diɡ nonibal dɛ o nadiɡ nanibal ta la ta.

¹⁸ Ásɛ sɔfo la kpɔ noo la kabora aa lɔ o nɔn ta la do naate baa dɛ ba doŋa laa dɛ́ kpɔ o nɛɛ la nyu ta. Gɛɛ wɛɛ ba ɛɛ dɛ́ soŋe naate wechɔɡa tɛo men Korowii sie ásɛ n kpɔ kɛo.

¹⁹ A habɔɔ sɔ́fo la kpo wechɔɡa kpɔe dɛ kɛ saraha kon la dɛ́ kpɔ soŋe naate la wechɔɡa, ásɛ o doŋa la le o nɛ. A chɛ kɛ ó teŋe saraha kon baa fuuh la baŋa.

²⁰ Dɛ́ kpɔ o ne mea saraha la pɛ ka fuah saraha kon la ta, dɛ́ kpɔ soŋe o wechɔɡa n be. Gɛɛ sɔfo la ɛɛ ba ɛɛ ásɛ o doŋa le o nɛ.

²¹ Dɛ naate la ɛo kɛŋɔ o nyao waa won dɔ a ɡɛ koŋkwaa nɔ naa, a chɛ kɛ ó lawɛ pebie waa ɛ ombal ba ɛ bolchɔɡe dii saraha, dɛ́ ɡɔɔro nyundua dɛ́ viiɡu n sie soŋe o wechɔɡa tɛo. Dɛ́ kpɔ men baa nama a kper kɛrɛdɛ kuruwa del noo aa koo a ta, ásɛ a ɛ mea saraha ne noo pɛrɛntoa fah,

²² dɛ́ berɛ kpɔ borɔnomare anɛ kɛɛ kulukukure anɛ a bini bɛlbwa waa dɛ ba wona dɔ ba, dɛ́ kpɔ beŋkpoŋ ba ɛ wechɔɡa kpɔe dɛ kɛ saraha, ásɛ bɛl la ɡe che tɛ saraha kon baa fuah.

²³ A chɛ kɛ naate kpɔa ba sɔfo be tɔpenuatoro wee la ta n Dea Cheremibɔr doonyoa bela n sie, ásɛ o kpɔ laa o doŋa kpɔ o nɛ.

²⁴ Sɔfo la ɛɛ kpɔ pebie waa ɛ bolchɔɡe dii saraha kon la, ne noo pɛrɛntoa fah laanee dɛ́ ba ɡɔɔra nyundua dɛ́ viiɡa n sie.

²⁵ Ásɛ dɛ teŋe bolchɔɡe dii saraha pee la baŋa, dɛ́ kpɔ chal la ane ɛ naate la baa dɛ ba doŋa laa dɛ́ kpɔ o nɛɛ la diɡ deŋne nyoa, ne o diɡ nonibal dɛ o nadiɡ nanibal ta.

²⁶ Sɔ́fo la fuɡe noo la ane do o ɡbabir ɡal nɔmpaa ta,

²⁷ ásɛ dɛ kpɔ o diɡ nonii ɛ ane merɛ n sie bela kera anuanɛ.

²⁸ Ó berɛ ɛ noo la ane dawɛ bɔra o fa aa ɛ bolchɔɡe dii saraha kon chal merɛ la ɡɛ tenten. Naate la diɡ deŋne nyoa ne diɡ nonibal dɛ o diɡ nanibal ta.

²⁹ Ásɛ dɛ kpɔ noo la kabora aa lɔ o nɔmpaa bini la do naate baa dɛ ba o doŋa laa dɛ́ kpɔ o nɛɛ la nyu ta, dɛ́ kpɔ soŋe naate la wechɔɡa tɛo men Korowii sie ń kpɔ kɛo.

³⁰ O ɛ ɡɛ tonaa, wɛɛ won kpɔ borɔnomare la kɛɛ kulukukure naate la aa dɛ ba wona kpɔ ba ɛ saraha la,

³¹ beŋkpoŋ che tɛ wechɔɡa kpɔe dɛ kɛ saraha, ásɛ dɛ kpɔ bɛl la ɡe ɛ saraha baa fuah, dɛ́ kpɔ mea saraha la ja a ta. Gɛɛ sɔfo la ɛɛ ba ɛɛ dɛ che naate baa laa doŋa dɛɛ kpɔ o nɛɛ la naa ta soŋe o wechɔɡa n sie ń kpɔ kɛo.”

³² Anee ɛ Mmarare aa chɔ le dɛ tɛ nɛn waa dɔ bwadabii weebuula waa wola won dɔ kwaa waa kpɔ ɛ saraha ɡɛ aa chɛa, ásɛ doŋa bɛlbwa le o nɛ.

Konfɔɔla aa lɔ deremi ta

³³ Korowii berɔ ŋɔ Mosis ne Arɔn be ŋɔ,

³⁴ “Dɛ he jo Keenan harɛ maa kpɔa dɛɛ ba heyaa tɛɛ ó ɛ he kon la ta, asɛ nomɛl na kɛŋɔ n kpɔ konfɔɔla aa won bui ta dem bɛl danjwɛɛ ta naa,

³⁵ dem te la chɛ kɛŋɔ ó la sɔfo be ka ŋɔ o na konfɔɔla ane o dem.

³⁶ A ba ɡɛ naa, sɔfo la chɛ kɛŋɔ ó ɡel ba pa laala aa lɔ dem bela bwa le mɔɔ o ba nyiŋi konfɔɔla la, ɡɛ aa ɛ komɛlbwa sese aa lɔ dem bela la bɛ doŋa ba kah. Ba dɔɔ pa le tonaa, sɔfo la chɛ kɛŋɔ ó la ka nyiŋi dem bela.

³⁷ A chɛ kɛ ó nyiŋi konfɔɔla la danjwɛɛ ta dɛ́ na, dɛ a ɛo kɛŋɔ papo-lwɛɛ kɛɛ dɛ swɛɛ dɛ di jo danjwɛɛ la ta naa,

³⁸ a chɛ kɛ sɔfo la le dem la bini dɛ́ ba laa o doonyoa ɡbera tɔ tɔpera anuanɛ.

³⁹ Tɔpenuanɛ wee la telaa, sɔfo la berɛ ba nyiŋi dem la. O baa nyiŋi dɛ konfɔɔla la diu jo danjwɛɛ la ta kaa sie kohona naa,

⁴⁰ ó ɡel ba laa bwea la konfɔɔla la aa jo a ta la kpɔ ka ta bwɛɛ la dahara bela baa pa kondoŋa kaa ta.

⁴¹ Anɔ habɔɔ, a chɛ kɛ ó sɛh dem la bini danjwɛɛ bwa ta, ásɛ dɛ chea ka ta bwɛɛ la dahara bela.

⁴² Ásɛ dɛ kpɔ bwefala ba su anɔ la baa cheɡa ka ta la naa ta, dɛ́ kpɔ tefala kwaa maa o bwa.

⁴³ Dɛ bwea baa kpɔa le dɛ sɛh danjwɛɛ la dɛ kwaa maalo la habɔɔ, konfɔɔla la berɔ ba dem la ta naa,

⁴⁴ a chɛ kɛ sɔfo la berɛ la dɛ́ ka nyiŋi na. O kaa nyiŋi dɛ a berɔ dawɛ danjwɛɛ la sie ta naa, dɛ a ɛ konfɔɔla dɛɛ chɔɡ dem la, anomanta, dem la kah doŋa.

⁴⁵ A chɛ kɛ bá kuuɡi dem la te bwa, o bwea ne daa ne teera baa kpɔa maalo bwa, dɛ́ paa le bwɛɛ la dahara bela.

⁴⁶ Nomɛlbwa waa jo dem baa koh konfɔɔla la wa dɛ tɔ o ɡbera la kah doŋa ka tel jɔmɔra.

⁴⁷ Nomɛlbwa ɡe waa ka chɔ kɛɛ dɛ́ di kondikwaa dem la bini la chɛ kɛ ó chɛɡɛ o laala.

⁴⁸ Kɛ dɛ ba maa dem la asɛ a habɔɔ sɔfo la ba nyiŋi dɛ na kɛŋɔ konfɔɔla la ta dii jo aa, wɛɛ ŋɔɔ doŋa toole o ta, dɛkalkɛ konfɔɔla la toole o ta kpa.

⁴⁹ Kwaa waa kpɔ laa dem la doŋa laa kpɔ laanee jumbii anɛ, ne peleme daa ane ne jiseswɛm dɛ hesɔp da.

⁵⁰ Sɔfo la ɡel ba dɔ nee waa dɛ palɛ do vii bini, ásɛ dɛ kpɔ jumbii la bɛl chaɡɛ vii la ta dɛ́ kpoo.

⁵¹ Ó kpɔ onɔ la waa wola on kpoe la, ne peleme daa la ne jiseswɛm ne hesɔp daa la bwa pɛ su jumbie baa kpoo la chal ne nee la ta, dɛ́ ɛ merɛ dem la ta kera anuanɛ.

⁵² Gɛɛ wɛɛ ba ɛɛ dɛ́ kpɔ jumbie la chal ne nee la, ne jumbie o siwi taa lole, ne sida ne hesɔp daa la dɛ jiseswɛm la laa doŋa bɛlbwa aa lɔ dem la ta kpɔ.

⁵³ Ásɛ dɛ kpɔ jumbie o siwi aa lole la le ka ta kpɔɡ bini ó ir kaa. Gɛɛ wɛɛ ba ɛɛ dɛ́ laa doŋa bɛlbwa kpɔ dem la ta ó berɛ do wer.”

⁵⁴ Anɔɔ ɛ Mmarare aa chɔ le tɛ bwadabii weebuula bɛlbwa

⁵⁵ ne konfɔɔla aa jo yal kɛɛ dem ta,

⁵⁶ ne ɔɡra kɛɛ kure dɛ anɔ la aa dɛ lɛɡre bwadabii ta bwa.

⁵⁷ Anee ɛ waa aa chɔ le nɛn che a ta jemɛ kondoŋa kaeh ne o wer doe. A ɡɛ waa nɔ chɔ le dɛ tɛ bwadabii weebuula ne konfɔɔla te bɛlbwa.