Lewi Dea Tena 13 - mzwDBL

Bwadabii weechɔɡa Mmarare wa

¹ Korowii berɔ ŋɔ Mosis ne Arɔn be ŋɔ,

² “Bwadabii weela kɛŋɔ ɔr kɛɛ kure, kɛɛ wee foɡra aa dɛ ba wona ɛ weela aa bu lawɛ nɛn aa, bá kpɔ naate ka baɡle Arɔn kɛɛ o bibaala baa ɛ sɔfore la bini bɛl.

³ Sɔfo la nyiŋi ŋwɛr la dɛ pona aa lɔ o ta la too, asɛ ŋwɛr la yɛ kaa bini naa, amɔ dɛ bwadabii weechɔɡa aa dɛ buu. Sɔfo la ɛɛ ŋɔ weela la ɛ weela aa dɛ bu nomanta, naate la kah doŋa.

⁴ Kɛ dɛ ŋwɛr la bini too dɛ o ta yɛɛ kaa bini pona la ɡe ta toe yaa, ate sɔfo la chɛ kɛŋɔ ó pere naate le o bala bini tɔpera anuanɛ.

⁵ Tɔpenuanɛ wee la baa tel aa, sɔfo la berɛ ba nyiŋu ja. O baa nyiŋi dɛ na kɛŋɔ ŋwɛr la ta do ɡɛ o fa aa doa, o ta yɛɛ kaa sie naa, ó pero le o bala bini tɔpera anuanɛ ja.

⁶ Tɔpera anuanɛ la baa tel ja o ba nyiŋu dɛ na kɛŋɔ o sie chɔɔ kɛrɛdɛ o ta yɛɛrɛ ɡe aa, sɔfo la ɛɛ ŋɔɔ doŋa bɛlbwa toole o nɛɛ kpa, kur pɛɛpɛɛ. A ɡɛ nɛn la ka chɛɡɛ o laala, ásɛ o doŋa bwa le o nɛ.

⁷ Kɛ dɛ sɔfo la baa nyiŋi dɛ ŋɔ doŋa toole o nɛɛ kpa, asɛ a habɔɔ kur la berɛ yɛ aa, a chɛ kɛ ó berɛ kpɔ o te ka chaɡle sɔfo la ja.

⁸ O berɔ ba nyiŋu dɛ kur la yɛo waa, ó ŋɔ naate kah doŋa. A ɛ weechɔɡa aa dɛ bu.

⁹ Nomɛlbwa bwadabii weebuula aa lɔ o nɛɛ la chɛ kɛŋɔ bá lawɔ ba sɔfo sie.

¹⁰ O baa nyiŋu na dɛ ɔr la too asɛ pona aa lɔ o sie la ɡe to o bini la beɡre ŋwɛr aa,

¹¹ dɛ a ɛ bwadabii weechɔɡa dɛ do o bwadabii ta. Sɔ́fo la ŋɔ o be ŋɔ o kah doŋa. A ta chɛ kɛ ó pero le o bala bini dɛ́ nyiŋu mɔɔ, dɛkalkɛ doŋa dɔɔ do o nɛ.

¹² Dɛ sɔfo la nao kɛŋɔ weela la lɔ naate bwadabii bwa ta, le o nyundua ba ta harɛ naa,

¹³ wɛɛ berɔɔ nyiŋu. Dɛ o nao kɛŋɔ weela la lawɛ o bwadabii bwa kpelaa, ó ŋɔ naate be ŋɔ doŋa toole o nɛ. O bwadabii bwa aa toa nomanta, amɔ dɛ doŋa bɛlbwa toole o nɛ.

¹⁴ Kɛ a habɔɔ o berɛ ŋwɛr aa, dɛ o kah doŋa.

¹⁵ Sɔfo la berɛ ba nyiŋu, dɛ o na ŋwɛr kpelaa, ó ŋɔ o be ŋɔ o kah doŋa. Ŋwɛr waa pila la dɛ́ chaɡle kɛŋɔ a ɛ weechɔɡa aa dɛ bu.

¹⁶ Kɛ dɛ ŋwɛr la sewɔ o buɡ la berɛ to aa, náate la berɛ kpɔ o te ka chaɡle sɔfo la

¹⁷ ásɛ o kwaa nyiŋu ja. Dɛ ŋwɛr la buɡ too waa, ásɛ sɔfo la ŋɔ o be ŋɔ doŋa bɛlbwa toole o nɛɛ kpa.

¹⁸ Dɛ ɔr ɔrɛ nomɛl dɛ ba tonɛ,

¹⁹ asɛ o buɡ la to kɛɛ dɛ swɛɛraa, a chɛ kɛ naate kpɔ o te ka chaɡle sɔfo.

²⁰ Sɔfo la nyiŋu dɛ́ na kɛŋɔ o buɡ la kaa bini asɛ pona aa lɔ o bini ɡe to aa, ó ŋɔ o be ŋɔ o kah doŋa. A ɛ weebuula dɛ ba ɛ ɔr la buɡ ta.

²¹ Kɛ dɛ sɔfo la nyiŋi naate dɛ pona aa toa toole o ta, o ta berɛ kaa bini o sie chɔ kɛrɛdɛ naa, a chɛ kɛ ó pero le o nɛra bini tɔpera anuanɛ.

²² Dɛ o buɡ la berɔ yɛɛraa, sɔfo la ŋɔ o be ŋɔ o kah doŋa. A ɛ weebuula.

²³ Kɛ dɛ buɡ la ta, do ɡɛ waa doa o ta yɛɛraa, dɛ ɔr la pɛl la ɡboo. Sɔ́fo la ŋɔ o be ŋɔ doŋa bɛlbwa toole o nɛ.

²⁴ Dɛ nii ɡee fuh nomɛl asɛ o ŋwɛr la chɛchɛr dɛ to kɛɛ dɛ swɛɛraa,

²⁵ sɔfo la nyiŋu. O baa nyiŋu dɛ na kɛŋɔ pona aa lɔ o ta la too asɛ o buɡ la kaa bini naa, amɔ dɛ weebuula baa jo o ta. Sɔ́fo la ŋɔ o be ŋɔ o kah doŋa.

²⁶ Kɛ dɛ pona aa lɔ o ta la ta toe asɛ o buɡ la ɡe ta bini kaalɛ o sie chɔ kɛrɛdɛ naa, a chɛ kɛ sɔfo la pero le o nɛra bini tɔpera anuanɛ.

²⁷ Tɔpenuanɛ wee la telaa, sɔfo la berɛ ba nyiŋu. O baa na kɛŋɔ ŋwɛr la yɛo waa, ó ŋɔ o be ŋɔ o kah doŋa. A ɛ bwadabii weebuula.

²⁸ Kɛ dɛ buɡ la ta, do ɡɛ waa doa, o ta yɛɛrɛ o sie chɔ kɛrɛdɛ naa, amɔ dɛ nii laanee ɡela a ba ɡɛ. Sɔ́fo la ŋɔ naate be ŋɔ doŋa bɛlbwa toole o nɛ. O ɛ nii la fuih pɛl ɡbo.

²⁹ Baa bɛlbwa kɛɛ haah ŋwɛr aa ɛ o nyu kɛɛ o taŋɡbaɡre la,

³⁰ a chɛ kɛŋɔ sɔfo ba nyiŋu na ɡɛ waa doa. Ŋwɛr la kaa bini asɛ o bini pona ɛ solmen a ta berɛ warɛ kpa aa, dɛ bwadabii weebuula kɛŋɔ masakurkur aa dɛ we nyu kɛɛ taŋɡbaɡre laanee. Sɔ́fo la ŋɔ o be ŋɔ o kah doŋa.

³¹ Kɛɛ dɛ sɔfo la baa nyiŋu dɛ na kɛ ŋwɛr la ta bini kaalɛ, o pona sie chɔ kɛrɛdɛ naa, ó pere naate le o nɛra bini tɔpera anuanɛ.

³² Tɔpenuanɛ wee la telaa, sɔfo la berɛ ba nyiŋi ŋwɛr la. O baa nyiŋi dɛ o ta yɛɛrɛ, o pona ɡe ta solmen ɛɛ dɛ kaa bini naa,

³³ naate la chɛ kɛŋɔ bá fonɛ o ŋwɛr la bɔr bar. Sɔfo la ɛɛ berɔɔ pero le o nɛra bini tɔpera anuanɛ ja.

³⁴ Tɔpera anuanɛ la baa tel ja aa, sɔfo la chɛ kɛ ó nyiŋi ŋwɛr la ja. O nao kɛŋɔ o ta yɛɛrɛ kaa bini bɛlbwa naa, ó ŋɔ o be ŋɔ o ta doŋa bɛlbwa kaeh. Náate la chɛɡɛ o laala, dɛ doŋa bɛlbwa toole o nɛɛ kpa.

³⁵ Kɛ dɛ ŋwɛr la berɔ yɛ a habɔɔ baa ŋɔ o be ŋɔ doŋa toole o nɛɛ la aa,

³⁶ sɔfo la berɛ nyiŋu ja. Dɛ ŋwɛr la yɛo kpela aa, sɔfo la bɛ berɛ nyiŋi na kɛŋɔ pona aa ɛ solmen lɔ o ta kɛɛ a toole o ta kpa. Ó den ŋɔ o be ŋɔ o kah doŋa.

³⁷ Kɛ dɛ sɔfo la liiree kɛŋɔ ŋwɛr la ta yɛɛrɛ, asɛ pona aa dɛ chaɡle kɛŋɔ o dɛ tonɛ ba o ta naa, amɔ dɛ o tonɔ. Sɔ́fo la ŋɔ naate la be ŋɔ doŋa toole o nɛɛ kpa.

³⁸ Dɛ akaba lɔ baa kɛɛ haah nɛ aa,

³⁹ sɔfo la chɛ kɛ ó nyiŋi naate dɛ́ na. Dɛ kompoŋa la ta denɛ to kpelkpel ɡɛ naa, amɔ dɛ bwadabii weepɛɛ, doŋa toole naate nɛ.

⁴⁰ Dɛ baa nyu ɡbao o nyumpona bwa tonɛ kwaraa naa, doŋa bɛlbwa toole o nɛ.

⁴¹ Dɛ o tile bɔr ɡe ɡboo ɡbaa aa, doŋa toole o nɛ.

⁴² Kɛ dɛ ŋwɛr waa swɛɛra dɛ to lɔ o nyu bela waa ɡbaa la ta kɛɛ o tile ta naa, amɔ dɛ weebuulaa.

⁴³ Sɔfo la chɛ kɛŋɔ ó nyiŋi ŋwɛr la. O baa nyiŋi dɛ na kɛŋɔ o swɛɛrɔ dɛ to kɛŋɔ weebuula aa,

⁴⁴ weela la ɡelɔ naate kah doŋa. Sɔ́fo la ŋɔ o be ŋɔ o kah doŋa, weechɔɡa lɔ o nyu ta.

⁴⁵ Nɛn waa dɔ ɡɛ weebuula nɔ la chɛ kɛŋɔ wɛ́ɛ do laalajɛɡle, dɛ bɛ o nyumpona lee dɛ́ kpɔ kon tɔ o nyoa ásɛ dɛɛ dooɡe lɔŋɔre ŋɔ, ‘N kah doŋa! N kah doŋa!’

⁴⁶ Weela la taa lɔ o nɛɛ nɔ, ɡɛɛ doŋa ɡe ɛɛ ba o nɛɛ doe. A chɛ kɛ ó le nɛra bini, dɛ́ ɡbo ka so bela baa soɡa la dahara.

Kwaa aa fɔɔla Mmarare

⁴⁷ Dɛ kwaane le yatɔɔle kɛɛ yal baa wola on nyarɛ mɔɔ ta dɛ fɔɔlo,

⁴⁸ dɛ pee pona nee ba sɔɔh kɛɛ jisepondɛɛɡe kɛɛ oltɔn ne komɛlbwa soo siwi baa kpɔ oltɔn ɛo ta naa,

⁴⁹ dɛ a ɡɛ konfɔɔla nɔ le yal, kɛɛ kon baa kpɔ oltɔn ɛo, kɛɛ yal baa sɔɔh dɛ lɛɡre o ta kɛ papo-lwɛɛ, kɛɛ konswɛɛma aa, dɛ a ɛ kombuula. A chɛ kɛ bá kpɔa ka chaɡle sɔfo.

⁵⁰ Sɔ́fo la nyiŋi kon la na, dɛ́ kpɔ le nɛra bini tɔpera anuanɛ.

⁵¹ Tɔpenuanɛ wee la, o baa nyiŋi ja dɛ kwaa la ta lɔ kon la ta dɛ yɛɛraa, a ɛ konchɔɡa dɛ ɡel kon la kah doŋa.

⁵² A chɛ kɛ sɔfo la fuh kon la, konfɔɔla aa yɛɛra jo o ta la wa.

⁵³ Kɛ dɛ sɔfo la baa nyiŋi dɛ konfɔɔla la ta kon la ta yɛɛraa,

⁵⁴ ó ŋɔ bá ka chɛɡɛ kon la dɛ́ kwaaro bil bokɛre tɔpera anuanɛ ja.

⁵⁵ A habɔɔ baa chɛɡɛ kon la, sɔfo la ɛɛ nyiŋuu na ja. Dɛ o ta do ɡɛ waa doa, hale dɛ o ta yɛɛrɛ kwaraa ɡe aa, doŋa ta lɔ o ta. Dɛ o sie kɛɛ o habɔɔ bɛlbwa taa a lɛɡre aa, fuih chɛ kɛ ba fuuh.

⁵⁶ Kɛ dɛ kon la chɛɡa habɔɔ sɔfo la nyiŋo dɛ na kɛŋɔ konfɔɔla la ta lɔ kon la ta tama aa, ó kɛɛ baŋ bela konfɔɔla la aa lɛɡra la le o ta.

⁵⁷ Ba berɔ naa kon la ta naa, amɔ dɛ yɛɛraa a yɛɛ. Fuih chɛ kɛ bá den fuh kon la.

⁵⁸ Ba chɛɡɛ kon la asɛ konfɔɔla aa lɔ o ta la bwa kaalaa, a chɛ kɛ bá kwaa chɛɡɔ nɛɛtena, dɛ doŋa bɛlbwa toole o ta kpa.”

⁵⁹ Gɛɛ mmarare aa chɔ le tɛ konfɔɔla aa won yatɔɔle kɛɛ yal baa wola on nyarɛ mɔɔ, kɛɛ pee pona nee ba sɔɔh kɛɛ jisepondɛɛɡe, kɛɛ komɛlbwa soo siwi baa kpɔ oltɔn ɛo ta joe la, ne ɡɛ baa jemɛ kɛŋɔ doŋa bɛlbwa toole a ta, ne doŋa aa lɔ a ta la bwa waa do.