Lewi Dea Tena 11 - mzwDBL

Ola aa wera ne anɔ la aa wola were ne dii

¹ Korowii ŋɔ Mosis ne Arɔn be ja ŋɔ,

² bá ŋɔ Israel tena be ŋɔ, “Ola aa chɛ kɛŋɔ hé di laanee nɔ.

³ Ola a nafikoko aa pera, a di kwa dɛ berɛ won uɡa dɛ dia la, anee wera ne dii.

⁴ Ane lole dɛ uɡe dɛɛ di, kɛɛ a nafikoko ɡbo pere, ane ɡe lole a nafikoko pere kɛ aa kwaa uɡe dɛɛ di. He bɛ an di. Nyoɡma uɡe o kondikwa dɛ berɛ dɛɛ dia kɛ o nafikoko ta pere, waa were ne dii.

⁵ He bɛ aah di. A lole kɛŋɔ o uɡo dɛ berɛ dɛɛ dia te, kɛ o nafikoko ta anɛ pere. Waa were tɛ heyaa kɛŋɔ he diu.

⁶ Chooma ɡe di kwa aa, o berɔ uɡa dɛɛ di, kɛ o nafikoko ta pere. Waa were tɛ heyaa kɛ he di.

⁷ Parako ɡe aa were tɛ heyaa ne dii. A lole kɛŋɔ o pere nafikoko, kɛ waa won kwaa uɡe dɛɛ di.

⁸ He bɛ nɔn kpɔ leɡe a ola a ba ɛ kɛŋɔ hɛɛ dia. A sewɔ kwaraa naa, he bɛ an leɡe.

⁹ Koŋkwaa aa lɔ nee bini ɡe la, hɛɛ won di anɔ la aa dɔ kena ne pɛɡa.

¹⁰ Pɛŋa aa lɔ nee bini dɛ ja anɔ la aa dɛ tuuɡi tea ta, ne anɔ la aa dɛ huuh te bɛlbwa aa wola kena ne pɛɡa dɔe la chɛ kɛ hé kia.

¹¹ Aa chɛ kɛ he kia nomanta, he bɛ nɔn kpɔ leɡa a ba ɛ kɛŋɔ hɛɛ dia.

¹² Kwaa aa lɔ nee bini aa wola pɛɡa ne kena dɔe la te bɛlbwa chɛ kɛŋɔ hé kia.

¹³ Jumbii ane lole a chɛ kɛŋɔ hé kia dɛ bɛ an dɛɛ di. A ɡɛ jumbii nɔɔ kɔla ne kɔkɔsaki,

¹⁴ ne ɛɡre ne a soo siwi bwa,

¹⁵ ne ɡaahɡaah te bwa soo siwi,

¹⁶ ne kwiu bwa soo siwi, ne jumbijen waa lɔ mpo ta dɛ kɔla te bwa soo siwi,

¹⁷ ne kwiujeɡa ne seralɛŋhaah dɛ kwiujen,

¹⁸ ne kwiu bwa soo siwi, ne anɔ la bwa aa lɔ pua hɛŋle ɡbo harɛ ta dɛ kee,

¹⁹ ne nyeŋɡboŋ ne bambaŋkɔɡre bwa soo siwi ne lalakpale dɛ jem.

²⁰ Koŋɡaahla aa dɔ naa anaarɛ kɛɛ dɛ dawɛ la aa wera tɛ heya. Hé kia.

²¹ Nemenɛ anɔ la aa dɛ jah ɡboo wera tɛ heya kɛ hé di.

²² A bini anɔ la haa di laanee, tontombɛ te bwa soo siwi, ne pom kɛɛ hɔɔhre.

²³ Ate habɔɔ, koŋɡaahla aa dɔ naa anaarɛ dɛ dawɛ la te bɛlbwa chɛ kɛ hé kia.

²⁴ Nomɛlbwa dɛ hɛlɛ a ta naa, o kah doŋa. Bɛlbwa leɡe a lala kwaraa naa, o kah doŋa ka tel jɔmɔra.

²⁵ Bɛlbwa waa ka kpɔ a bɛlbwa lale la chɛ kɛŋɔ ó chɛɡɛ o laala. O kah doŋa ka tel jɔmɔra.

²⁶ Ol bɛlbwa waa ɛ nafeate o nafikoko baah aa wola pere kɛrɛdɛ, kɛɛ waa wola berɛ uɡe kwaa dɛɛ dia la aa were tɛ heya ne dii. Nomɛlbwa waa leɡe a lala la kah doŋa.

²⁷ Ola aa wola nafea tena ɛɛ dɛ dɔ nanie la aa were tɛ heya ne dii. Nomɛlbwa waa leɡe a lala la kah doŋa ka tel jɔmɔra.

²⁸ Nomɛlbwa ɡe waa kpɔ bɛl lale la, a chɛ kɛ ó chɛɡɛ o laala. Dɛ naate kah doŋa ɡe ka tel jɔmɔra. Aa were tɛ heya.

²⁹ Ola ane ɡe lole aa wola were tɛ heyaa ne dii. Ola ane kɛŋɔ damɡboŋri te bwa soo siwi, mare ne baah bɛlbwa soo siwi,

³⁰ ne ɡer ne taŋɡar ne deabie, ne sɛɡrɛbɛdom dɛ karaŋɡboŋa.

³¹ Anee ɛ ola aa dɛ huuh kɛɛ dɛɛ tuuɡi tea ta aa wola were tɛ heyaa ne dii. Nomɛlbwa bɛl aa sewɛ o ka leɡo la, kah doŋa ka tel jɔmɔra.

³² Dɛ a bini bɛl sewɔ dɛ le ba le komɛl waa do wer bɛlbwa ta naa, dɛ a ɡɛ kon la kah doŋa. Dɛ daa ba kpɔ ɛo kɛɛ yal, kɛɛ oltɔn kɛɛ dɛ yakwara taa o le aa, o kah doŋa ka tel jɔmɔra. A chɛ kɛ hé kpɔ do nee ta ásɛ jɔmɔra mɔɔ o berɛ do wer.

³³ A bini bɛl le vii bini naa, komɛlbwa aa lɔ vii la bini la kah doŋa. A chɛ kɛ hé paɡre vii la ɡe.

³⁴ Kondikwaa bɛlbwa baa dia a ɡɛ vii nɔ bini nee bɛlbwa ane aa leɡa la, dɛ a kah doŋa. Asɛ komɛlbwa aa ɛ nee kwaa dɛɛ jo nyoa la ɡe kah doŋa.

³⁵ Komɛlbwa sese o ol aa leɡo la kah doŋa. Dɛ kon baa dɛ mar nii o bini kɛɛ vii baa dɛ daa o ne kondikwa kwaraa yoo, a chɛ kɛ bá paɡre a bwa. A ɛ kwaa doŋa aa lɔ a ta dɛ tɛ heya.

³⁶ Dɛ nee nyuune ta kɛɛ kɔlɔŋ bini nee yaa, a ɡbo wer. Kɛ nomɛlbwa waa leɡe kon la lale la, o kah doŋa.

³⁷ Dɛ kon la lale leɡe kondwee aa, dɛ a ta wer, doŋa bɛlbwa toole a ta.

³⁸ Kɛ dɛ ba kpɔ kondwee la senɛ nee ta, asɛ kon la lale la bɛl le a ta naa, dɛ aa were tɛ heyaa kpa.

³⁹ Dɛ ol waa wera kɛ he diu la ɡee sewa aa, nomɛlbwa waa leɡe o lale la kah doŋa dɛ ka tel jɔmɔra.

⁴⁰ Nomɛlbwa waa di ɡɛ konlale la ol la, a chɛ kɛ ó chɛɡɛ o laala. Naate kah doŋa ka tel jɔmɔra. Asɛ nomɛlbwa ɡe waa ka kpɔ o lale la chɛ kɛ ó chɛɡɛ o laala, o kah doŋa ka tel jɔmɔra ɡe.

⁴¹ Koŋkwaa bwa aa dɛ huuh kɛɛ dɛɛ tuuɡi tea ta la chɛ kɛ hé kia. He bɛ an di.

⁴² Anɔ la aa dɛ huuh kɛɛ dɛɛ tuuɡi tea ta kɛɛ dɛ dɔ nakpale anaarɛ kɛɛ nakpale aa wara la bwa, hé kia.

⁴³ He bɛ ɡɛ kwaa nɔ bɛlbwa di, dɛ́ ba kah doŋa. He bɛ a nɛɛ che kɛɛ dɛ koh a wa, dɛ́ ba kah doŋa.

⁴⁴ Hé do ɡoroŋ dɛkalkɛ men Korowii haa dɛ tom mɛ la, n do ɡoroŋ.

⁴⁵ Menee Korowii haa dɛ tom mɛ n lawɛ heyaa le Ijipt harɛ ta hé ba ɛ n nɛra, anomanta, hé do ɡoroŋ ɡɛ maa do ɡoroŋ la.

⁴⁶ Mmarare aa chɔ le tɛ ola ne koŋkwaa aa lɔ nee ta ne anɔ la aa lɔ harɛ ta dɛɛ huuh, kɛɛ dɛɛ tuuɡi tea ta dɛ jumbii laanee la.

⁴⁷ Hé pere kwaa aa wera ne dii le anɔ la aa wola were ne dii ta. Ola ane lole dɛ do wer ne dii ane ɡe aa were ne dii.”