Kolosi 3 - mzwDBL

¹ Dɛ he ne Yeesu Kristo bwaa pɛa ir seo ta te naa, amɔ te hé swɛɛ siwi dɛ́ ɡel he bambile che kwaa aa lɔ nyundua la ta. Belaa Yeesu do dɛ so nomombɔr Korowii diɡ ta.

² Hé ɡel he liire bwa do kwaa aa lɔ nyundua la ta, dɛ́ ɡel kwaa aa lɔ harɛ nɔ ta,

³ dɛkalkɛŋɔ he do kɛŋɔ nɛra baa serewa a bɔr, he toole a ta kpa. He mkpa lɔ Yeesu Kristo be, o ɡe do Korowii be.

⁴ Awola Yeesu Kristo he mkpa aa lɔ o be aa ba harɛ ta la, he ne o bwa ɛɛ pɛo dɛ ba ɡɛ saŋ, dɛ ba dɔ jirima o bala la ta.

Dabene ne dafale

⁵ Anomanta, hé ɡel he harɛ nɔ ta dor bwa ta kwaraa. He bɛ he bwadabii kpɔ do jwamane, ne wedoŋa, ne kayɛɡlɛ, ne pɛlchɔɡa, dɛ kwaa ta sibeɡra ta. Kwaa ta sibeɡra do kɛŋɔ voɡa toma ken.

⁶ A ɡɛ waa nɔ, Korowii bwaawee dɛ ir a ta taeh. Wɛɛ kpɔ wahalaa ta nɛra baa dɛ ɛ deŋnekpeɡ dɛɛ ɛ ɡɛ la nɛ.

⁷ He ne ba bwaa fa lɔ a ta dɛɛ ɛ.

⁸ Kɛ a chɛ kɛŋɔ hé ɡel a bwa sekwaraa taraken te. Hé laa bandia kpɔ he waa ta, he baah bɛ dɛɛ di saɡasaɡa, hé ɡel meesɔhwa, he bɛ dɔŋa dɛɛ chɛɡre, he bɛ ɡel wobochɔɡa ɛɛ le he nyoo.

⁹ He bɛ nyosone teŋe dɛɛ tɛ dɔŋa, dɛkalkɛŋɔ he laa he dabene la ne o we-ɛɛla la bwa kpɔ he nɛ,

¹⁰ dɛ́ charɛ dafale. Korowiirii ɡela he do ɡɛ la. Onee dɛɛ kwaa he dafale la saŋ bɛlbwa ásɛ he do kɛrɛdɛ ɡɛ waa doa la, dɛ́ won jemɔ kɛrɛdɛ ka tonɛ.

¹¹ Anomanta, nɛra Korowii aa ɡela ba do ɡɛ dofale nɔ la, ba ta dɔe kɛ ba peɡri dɔŋa bini kpa kɛŋɔ onɔ ɛ Juu te kɛɛ onɔ nɔ ta Juu te ɛɛ nɔ. Nɛra bini peɡra toole kpa, kɛŋɔ onɔ teŋe o pen, kɛɛ onɔ nɔ ta o pen teŋe nɔ. Hɔɔh kɛɛ daamun te kɛɛ yom kɛɛ nɛn waa dɔ o te toole kpa, ba bwa ɛ beŋkpoŋ. Yeesu Kristo ɡbo waa hiah o nɛra.

¹² Heyaa Korowii bidɛɛɡa waa le heyaa tɛ o te, dɛ laa he doŋa bwa kpɔ he nɛ, dɛɛ nyin heyaa kɛrɛdɛ. Anomanta, hé kpoŋe dadɛɛɡe dɛ́ dɔ tedoma, dɛ́ ta tea dɛ́ɛ tɛ dɔŋa, dɛ́ɛ pwɛr he te, dɛ́ɛ tɛ nɛra sie, dɛ́ dɔ bambile tɛɛ ba.

¹³ Dɛ he bini bɛlbwa ne o dɔŋ dɔ waa aa, ó lawɛ bambile dɛ́ kpɔ kɛo. Gɛ Korowii aa kpɔ he wechɔɡa kɛ heyaa la, ɡɛɛ chɛ kɛ he ɡe kpɔ dɔŋa kwaa dɛ́ɛ kɛ ba.

¹⁴ Anɔ nɔ habɔɔ, hɛ́ɛ nyin nɛn. Nɛnnyinii dɛ́ won ɡel he dɔ nyopɛo dɛ́ ɛ anɔ bwa kɛrɛdɛ ka tonɛ.

¹⁵ Hé ɡel nyopɛo waa aa le Yeesu Kristo be la do he bambile bini wobɛlbwa ta, dɛkalkɛŋɔ Korowiirii yerɛ heyaa ŋɔ hé bwa ɛ beŋkpoŋ dɛ́ dɔ nyopɛo. Hé ɡel he sie ɛɛ su waa waa ɛa tɛ heya, hɛ́ɛ jaamo.

¹⁶ Hé ɡel Yeesu Kristo waa la do he bambile bini kɛrɛdɛ hɛ́ɛ baɡle dɔŋa, dɛ́ɛ ja ba wejema bwa ne, dɛ́ ɡo wesoŋa yela ne kpɛɛra yela dɛ́ɛ jam Korowii he bambile bwa.

¹⁷ Wobɛlbwa haa dɛ ɛ ne anɔ la bwa haa dɛ bol la, hɛ́ɛ ɛa ya Dɔɔ Yeesu sɔn ta, dɛ́ che o nɛɛ dɛ́ɛ jam o Mɛɛ Korowii.

Mmarare aa chɔ le tɛ Kristo tena deremi

¹⁸ Haahna, hɛ́ɛ no he jaranar wa, dɛkalkɛŋɔ ɡɛɛ a chɛ kɛŋɔ nɛra ba ne ya Dɔɔ Yeesu aa pɛa ɛɛ ɛ.

¹⁹ He baala ɡe, hɛ́ɛ nyin he haahna kɛrɛdɛ dɛ bɛ ban dɛ́ɛ panya.

²⁰ Bechale, hɛ́ɛ no he nyare ne he mɛɛnanar waa saŋ bɛlbwa, dɛkalkɛŋɔ ɡɛɛ dɛɛ lɛ Korowii sie.

²¹ Mɛɛnanar, he bɛ he bii dɛ́ɛ do bandia ne, ásɛ ba bambile ba chɔɡ.

²² Bonɔɔna ne toli ɡe, hɛ́ɛ no nɛra haa dɛ tom ba harɛ nɔ ta la waa saŋ bɛlbwa. He bɛ ba siebɔr na mɔɔ dɛ́ɛ tom ba dɛ́ɛ nyin baa kpɛɛ heya. Hé ta tea dɛ́ɛ tom ba ɔma haa dɛ ɔmɛ he Dɔɔ Yeesu Kristo nomanta.

²³ Wobɛlbwa haa dɛɛ ɛ la, hɛ́ɛ ɛa bambile bwa ne kɛŋɔ he Dɔɔ Yeesu Kristoo he ɛ dɛɛ tɛ. Nɛn laa he ɛ dɛɛ tɛ.

²⁴ He Dɔɔ Yeesu Kristoo he ɛ dɛɛ tɛ. He jemɛ kɛŋɔ o bee hɛɛ ba kembɔr waa kpɔa cheɡ o nɛra la dɔe.

²⁵ Nomɛlbwa waa dɛ ɛ wechɔɡa la, wɛɛ dɔ o wechɔɡa kembɔree. Korowii aa bane siwii nyiŋi ɡwaa bane.