Josua 6 - mzwDBL

Bwɛjen Jeriko paɡra

¹ Bwɛjen Jeriko tena koh Israel tena waa dɛ laa ɡbeni baa kpɔ a ta dɛɛ jo bwɛɛ la ta kaɡre tɔ ba nɛ. Nomɛlbwa aa won le bwɛɛ la ta kɛɛ dɛ́ jo bela.

² Korowii ŋɔ Josua be ŋɔ, “N kpɔ bwɛjen Jeriko ne o kooro ne o laa tena bwa do he nɔn ta.

³ He ne he laa tena la valɛ dɛ́ bar bwɛjen la bwa cheme kera beŋkpoŋ, tɔpere bɛlbwa ɡɛ tɔpera anumɛl.

⁴ Gel sɔfore banuanɛ kpɔ pebal nyeɡle bɛle tɔ Korowii Ne Nɛwɛnyina Fɔo Daka la sie. Tɔpenuanɛ wee la, he ne he laa tena valɛ bar bwɛjen la kera anuanɛ, ásɛ sɔfore la ɛɛ hoh bɛle la.

⁵ Bɛlhoohla la ɛ dɛ́ hoh ba bɛle la kohona, ásɛ nɛra la bwa ɛɛ dooɡe lɔŋɔre kohona. Danjwɛɛ baa mao bar bwɛɛ la ɛɛ choɡluu, ásɛ nomɛlbwa den jo bwɛjen la ta.”

⁶ Asɛ Nun bibaa Josua yerɛ sɔfore la dɛ ŋɔ ba be ŋɔ, “Hé kpɔ Korowii Ne Nɛwɛnyina Fɔo Daka la che, ásɛ he bini banuanɛ ɡe kpɔ bɛle tɔ o sie.”

⁷ Asɛ o berɛ ŋɔ nɛra la be ŋɔ, “Hé pa sie dɛɛ kaa! Hé valɛ dɛɛ bar bwɛjen la, laa tena la kpɔ ba dɔmkwa dɛ́ tɔ Korowii Ne Nɛwɛnyina Fɔo Daka la sie.”

⁸ Josua aa bol waa la baɡle nɛra la tonɛ la, sɔfore banuanɛ bɛlbwa waa kpoŋe bɛla la den ka tɔ Korowii Ne Nɛwɛnyina Fɔo Daka la sie dɛɛ hoh, asɛ banɔ la ɡe baa cheɡɛ Korowii Ne Nɛwɛnyina Fɔo Daka la teŋɛ ba nɛ.

⁹ Laa tena la kpɔ ba dɔmkwaa tɔ sɔfore baa dɛ hoh bɛle la sie, asɛ laa tena la baa lɔ habɔɔ la ɡe teŋɛ Daka la nɛ, dɛ bɛlhoohla la ɡe teŋɔ dɛ hoh dɛɛ do.

¹⁰ Dɛ Josua kah ba ŋɔ, “He bɛ lɔŋɔre do, hé hel, hɛ́ɛ berɛ wobɛlbwa bola ka tel kɛŋɔ tɔpere maa ŋɔ he be ŋɔ hé do lɔŋɔre mɔɔ he do!”

¹¹ Gɛɛ Josua do sɔfore la, asɛ ba che Korowii Ne Nɛwɛnyina Fɔo Daka la dɛ bar bwɛjen la cheme kera beŋkpoŋ, dɛ berɛ laa berɛ kaa bela baa baŋre ba tɛnte deene la dɛ ka chɔ.

¹² Tɔ aa pera la, Josua felo ir, asɛ sɔfore la kpɔ Korowii Ne Nɛwɛnyina Fɔo Daka la che.

¹³ Sɔfore banuanɛ baa kpoŋe bɛle anuanɛ la kaa tɔ Daka la sie, dɛ valɛ dɛɛ hoh ba bɛle la. Laa tena baa tɔ ba sie, asɛ laa tena baa lɔ habɔɔ la teŋɛ, asɛ bɛle la sii ɛɛ le.

¹⁴ Tɔpenɛɛte ta la, ba berɔ valɛ bar bwɛjen la kera beŋkpoŋ, dɛ berɛ kaa bela baa baŋre ba tɛnte deene la. Ba valɔ baro ɡɛ tɔpera anumɛl.

¹⁵ Tɔpenuanɛ te la ta la, ba iro valɛ bar bwɛjen la ɡɛ ba yon dɛɛ ɛ la. Awola ɡboo ba valɛ bar bwɛjen la kera anuanɛ.

¹⁶ Baa bara kera anuanɛ ta la, sɔfore la hoh ba bɛle la, asɛ Josua ŋɔ nɛra la be ŋɔ, “Hé do lɔŋɔre! Korowii kpɔ bwɛjen nɔ do he nɔn ta!

¹⁷ Hé paɡre bwɛjen la kwaraa, ásɛ dɛ le komɛlbwa aa lɔ o ta cheɡ tɛ Korowii. Hanjwamane Rahab ne o nɛra baa lɔ o dem te, he bɛ ban wobɛlbwa ɛ. Onee lɛ nɛra yaa tom ba ŋɔ bá ba sɔh nyiŋi bwɛjen nɔ la sɔh.

¹⁸ Hé laa nɔn kpɔ kwaa haa lea cheɡ tɛ Korowii la ta, ásɛ a bɛ heyaa bichɔɡe ba lolɛ. Dɛ ɡɛ laa aa, chɔɡa tentenee he nyin baa dawɛ he Israel tena nɛɛ bela haa baŋre he tɛnte deene la.

¹⁹ Kwaa baa kpɔ suuɡapoŋa ne suuɡaswɛm ne ayaawa dɛ bune ɛa la te, a do ɡoroŋ kohona tɛ Korowii kɛŋɔ hé kpɔ ba tɛo o Dea bela baa dɛ cheɡ laala a yoɡ aa kpeɡa.”

²⁰ Bɛle la aa sia la, nɛra la do lɔŋɔre kohona asɛ danjwɛɛ baa maa bar bwɛjen la den kuuɡi kwaraa. Ate, laa tena la den jo bwɛjen la ta dɛ lɛ bwɛɛ la bwa dɔɔh.

²¹ Ba kpoo baala ne haahna, ne bechale ne nomonome, ne nae ne peera dɛ keeɡore aa lɔ bwɛɛ la ta, dɛ lea cheɡ tɛ Korowii.

²² Josua ŋɔ baala banɛ baa laŋa dɛ ka sɔh nyiŋi harɛ la be ŋɔ, “Hé la hanjwamane la dem, dɛ́ ka kpɔ o ne o nɛra bwa baa ja o nɛɛ le, ɡɛ haa baɡɔ nyoa la.”

²³ Anee ɡɛ baala la baa sɔah ka nyiŋi harɛ la la hanjwamane la dem, dɛ kpɔ o ne o nya ne o mɛɛ, ne o dɔɔranar ne o nimanar, ne o nɛra baa ja o nɛɛ bwa, dɛ kpɔ ba ka so bela Israel tena aa baŋre ba tɛnte deene la dahara.

²⁴ Asɛ ba fuh bwɛjen la ne komɛlbwa aa lɔ o ta. Kɛ suuɡapoŋa ne suuɡaswɛm ne kwaa baa kpɔ ayaawa ɛa la ne bune kwaa la te, ba paa ka cheɡ Korowii Tɛnte Dea bela baa dɛ cheɡ laala a yoɡ aa kpeɡa.

²⁵ Hanjwamane Rahab ne o lolanar dɛ o dem tena te, Josua lɛ ba nyu, dɛkalkɛ o lɛ o nɛra baa kaa sɔh nyiŋi bwɛjen Jeriko la sɔh. O naanar ta lɔ Israel harɛ ta ba le fini.

²⁶ Bwɛjen Jeriko paɡra bini la, Josua ŋwɛɛ ntam kɛŋɔ Korowii taah nomɛlbwa waa berɛ ba vɔrɔwe Jeriko ja. “Nomɛlbwa waa ba pe bwɛjen la mun la, o bibanloɡle sewɛ. Nomɛlbwa waa ba cheɡ o doonyoo la, o bibambechala sewɛ.”

²⁷ Gɛɛ Korowii ja Josua nɛ dɛ ɡel o sɔn le harɛ la ta bwa.