Jona 2 - mzwDBL

Jona wesoŋa

¹ Jona aa lɔ pɛŋe la tea bini la, o soŋe Korowii waa dɛ tomɔ la.

² O ŋɔ, “N Naa Korowii, maa lɔ wekpeɡa ta dɛ do lɔŋɔ tɛɛ la, he no n wesoŋa. Maa lɔ lalabwɛɛ dɛ do lɔŋɔ tɛɛ la, he no n wii.

³ He ɡɔɔ mɛ viɡri mpo vil ta, n chɔ nee bini, wɛɛ kile n ne, asɛ nehɛma bwa bɔle n nɛ.

⁴ N liiro kɛ he doŋ mɛ le he sie, dɛ ŋɔ maa he Dea waa do ɡoroŋ laanee na kpa.

⁵ Nee bɔle n nɛ, n hweera pi, n do vil bini, asɛ mpo bini kpɔɡa laa n nyu bwa.

⁶ N sirimo ka chɔ bwejena lɔɡre, a do kɛŋɔ baa huɡ mɛ maa wola bɔree dɔ le dɛ́ dɔ n nyu. Kɛ n Naa Korowii le n ne seo ta.

⁷ N naa Korowii, maa naa kɛŋɔ n fe dɛ ba sewa la, n lii he wa, n siwi swɛɛ he soŋa ta, a tel he be, he Dea waa do ɡoroŋ la ta.

⁸ Nɛra baa daŋre voɡsale toma ne, ba siwi ɛɛ sua la, ba paŋɛ chae he fe aa cha ba la.

⁹ Kɛ n te, mɛɛ jaame yel nee, anee dɛɛ ba saraha ɛɛ. Nyoo maa baɡa bwa, mɛɛ chuɡraa. Korowiirii dɛɛ lɛ nɛwɛnyini.”

¹⁰ Belaa Korowii bol waa pɛŋe la be, asɛ o ka uɡe Jona ta nee la nyoa.