Job Tɔn 34 - mzwDBL

Elihu wobol nɛɛtena

¹ Elihu berɔ ŋɔ,

² “Nɛra haa ɛ wejerema, hé no n waa nɔ, hé no, nɛra haa jemɛ wa.

³ Deŋnee dɛɛ no wa, asɛ nyondoŋe ɛɛ daɡɛ kondikwa.

⁴ Hé ɡel ya kpɔ waa aa toɡra dawɛ ya nɛ, hé ɡel ya pɛ hweli waa aa wera.

⁵ Job te ŋɔ, ‘N ta bolchɔɡe dii, kɛ Korowiirii vɔm mɛ bole pae.

⁶ A lole kɛ n waa toɡrɔ, kɛ ba dɛ lii mɛ nyosonteŋni, a lole kɛ n ta bolchɔɡe dii, Korowii do mɛ bol, asɛ mɛɛ ba sewa.’

⁷ Nɛn besoo Job, waa wola duure kpɔe tɛ Korowii nɔɔ?

⁸ O ne wechɔɡ-ɛɛraa pɛa, o ne nyubinikpeɡ tena ɛɛ valɛ.

⁹ Kɛ Job te bolɔ ŋɔ, ‘Tɔnɔ bɛlbwa toole dɛ tɛ nɛn kɛŋɔ o ne Korowii pɛ.’

¹⁰ Anomanta, hé no men Elihu be, he nɛra haa dɛ no waa mun. Nomɛlbwa jemɔ kɛ Korowii aa wechɔɡa ɛ, On Waa Ɛ Kpeɡri Bwa Dɔɔ la aa won ɛ wechɔɡa.

¹¹ O dɛ bɔ nɛwɛnyini waa waa ɛa kem, dɛɛ ba waa ne o nɛɛ ɡɛ o we-ɛɛla aa doa.

¹² Kpelaa, haa lii kɛ Korowii ɛɛ ɛ wechɔɡaa, On Waa Ɛ Kpeɡri Bwa Dɔɔ la aa bole pa aa ɡole.

¹³ Umee kpɔ harɛ nɔ do o nɔn ta nɔ? Umee ŋɔa wɛɛ nyiŋi harɛ nɔ bwa ta nɔ?

¹⁴ Dɛ Korowii fe saahnɔ ŋɔ, wɛɛ laa o hweeraa kpɔ nɛn bini naa,

¹⁵ nɛwɛnyina bwa fe ɛɛ pɛo serewe, dɛ́ bwa berɛ kaa teera bini.

¹⁶ Job, he dɛ no waa mun aa, no waa nɔ, cheɡ deŋne no waa maa dɛ bol.

¹⁷ Nɛn waa hah kasinteŋ la ɛɛ won nyiŋi nɛra nɛ aa? Hɛɛ won pwah Korowii waa kana o waa toɡre la aa?

¹⁸ O laa dɛɛ bol koranar be ŋɔ, ‘He waa ɛ wesale,’ dɛɛ bol nomonjena ɡe be ŋɔ, ‘He nyu bini kpeɡri’ la aa?

¹⁹ Waa koranar siebɔr nyiŋi, waa suuɡa tena kpɔe dɛɛ ɡwaa nyaara, dɛkalkɛ, onee ta ba bwa.

²⁰ Gɛ nɛmbele banɛ la bwa piɡro dɛɛ sewɛ harambaŋa, Korowii lɔ ba dɛɛ bil baa serewe, o dɛ le nomonjena la ne sɛmɛlɛŋ ken.

²¹ O sie lɔ nɛra we-ɛɛla ta, dɛɛ na ba naɡale bɛlbwa.

²² Bɔr bira toole, biro toole bobɛlbwa, dɛ́ tɔ wechɔɡ-ɛɛra nɛ ba kpɔ ba te sɔh Korowii.

²³ A ta hiaih kɛ Korowii nyiŋi nɛra waa bini la sie, mɔɔ ba ba o be o bol ba waa dɛ́ pa bole.

²⁴ Waa nomonjena waa bini nyiŋi mɔɔ dɛɛ ir ba, dɛ kpɔ bane dɛɛ chiɡ ba naa ta.

²⁵ Waa dɛ nyiŋi ba we-ɛɛla bini nomanta, o dɛ le ba ne jwaana dɛɛ lɛ ba nomonome ba be.

²⁶ O dɛ tɛr ba deŋne ba wechɔɡa wa, ásɛ nomɛlbwa na ba,

²⁷ dɛkalkɛ ba laa ba te kpɔ, dɛ vɛh o nɛɛ teŋa, baa sie aa o Mmarare la ta do.

²⁸ Ba ɡelɔ nyaara wi dɛɛ no Korowii, asɛ wɛɛ no yera baa dɛ yerɔ ŋɔ ó cha ba.

²⁹ Kɛ dɛ Korowii helɔ aa, umee dɛ won pwaoh wɔ? O kpɔ sie sɔh aa, umee dɛ nao wɔ? Kɛ o dɛ nyiŋi nɛmbeŋkpoŋ ne nɛra baa lɔ harɛ nɔ ta bwa kɛrɛdɛ,

³⁰ Korowii ta ɡelɛ nɛn waa wola on tomɛ ɛɛ di kora, dɛ́ haɡre nɛra la bela.

³¹ Dɛ nɛn ŋɔ Korowii be ŋɔ, ‘N ɛ wechɔɡa, maa ɡɛɛ ɛ kpa.

³² Chaɡ mɛ waa maa wola an nae, dɛ n ɛ wechɔɡa aa, maa an ɛ kpa.’

³³ Job, a chɛ kɛ Korowii tɛɛ ɡɛ haa dɛ nyin kembɔr, haa vɛh he liire chara nɔ naa? Henee chɛ kɛŋɔ he lii, n laa, bol anɔ la haa jema baɡ mɛ.

³⁴ Nɛra baa dɛ no waa mun dɛ sɛh ɡɛ, wejerema baa dɛ no n be la dɛ ŋɔ,

³⁵ ‘Job dɛ bol waa aa, wejema toole a ta, o wobol ta mun dɔe.’

³⁶ Dɛ he nyiŋi Job waa bini ka tonaa, hɛɛ nao kɛ o dɛ bol waa kɛŋɔ wechɔɡ-ɛɛ.

³⁷ O kpɔ deŋnekpeɡ dɛɛ ja wechɔɡa ta, ya bini kwaraa la, o mamɔ dɛɛ lɔ kpaŋa, dɛ teŋɛ bol waa kohona dɛɛ yaɡɛ Korowii.”