Job Tɔn 29 - mzwDBL

¹ Job teŋɔ dɛ bol o waa la ŋɔ,

² “Gɛ n fe aa dɛ nyin kɛ n berɛ do kɛ ɡɛ saŋ Korowii aa nyiŋi n nɛɛ,

³ ɡɛ saŋ waa ɡela n ŋwɛnɛre chaah dɛ ɡel n won valɛ biro ta!

⁴ Gɛ saŋ n fa aa cheɡɛ n naa ta, dɛ kpɔ Korowii ɛ n dam tenten, o kpɔ nɔn tɔ n ne n dem tena nɛ.

⁵ Dɛ ɡɛ saŋ Korowii Waa Ɛ Kpeɡri Bwa Dɔɔ la ja n nɛ, asɛ n bii bar mɛ cheme,

⁶ ɡɛ saŋ n fa aa ɛ kondɔɔh dɛ n dɔ ɔleve noo taeh!

⁷ Dɛ n dɛ la bwɛjen la doonyojen la ta, dɛ́ ka so bela nomonome bwa aa dɛ so la,

⁸ ásɛ bonɔɔna na mɛ dɛ́ kɛrɛ che, banjeni ir che dɛ́ kpɔ duure tɛ mɛ,

⁹ nomonome ɡel wobol, dɛ́ kpɔ nɔɔra tɔ nyoo.

¹⁰ Hale nomonjena dɛ hel, baa wola waa bol.

¹¹ Nomɛlbwa waa no n wobol dɛ́ bol n bwara wedɛɛɡe, banɔ la baa na mɛ kpɛɛ mɛ,

¹² lɛɛ maa dɛ lɛ nyaara baa wia dɛɛ nyin nɛra bá cha ba la wa, ne bilalbii baa wola nomɛlbwa dɔe ó lɛɛ ba.

¹³ Nɛra baa cheɡɛ seo nyoa soŋe andɛɛɡa tɛ mɛ, n ɡel luhaahna baah sɔɔh ba.

¹⁴ Toɡra n wa aa toɡra do kɛŋɔ maa tɔ yal, kasinteŋ bola ɡe do kɛŋɔ maa do batakaare dɛ kpɔ yal vɔwɛ nyu.

¹⁵ Menee fa dɛ tɔ nyoŋa sie, dɛɛ cha boobie.

¹⁶ N do kɛŋɔ mɛɛ dɛ tɛ nyaara, dɛɛ cha hɔɔhra ba wa aa lɔ kɔɔto.

¹⁷ N dɛ sɔɔh nyubinikpeɡ tena nyoa, dɛ́ lɛ nɛra baa dɛ di kpeɡri ba nɛɛ la ta.

¹⁸ N liiro kɛŋɔ ń dɔ mkpajaŋ, dɛ́ chɔ n dem sewɛ sɔnɔnɔɔ.

¹⁹ N do kɛŋɔ daa o lune aa kaa nee ta, asɛ mɛn ɛɛ ta o kpala ta jwaana.

²⁰ N nyanyini aa tonɛ bwa, n bwara ɛɛ do kpeɡri saŋ bɛlbwa.

²¹ Nɛra dɛ kpa dɛ́ no n wa, ba dɛ hel jeiih ken, dɛ́ no n wejaala.

²² N bol waa tonaa, baa waa bol kpa, n waa dɛ jo ba nyuune bini.

²³ Ba dɛ kpaa mɛ kɛŋɔ nɛra yon dɛɛ kpa bwaala la, kɛŋɔ paara aa dɛ kpa yoo saŋ bwaala ken.

²⁴ N mamɛ ba be naa, a dɛ ɛɛ ba wepiɡra, dɛkalkɛ baa ɡɛ lii, n pur sie ba be naa, ba dɛ dɔ bokpeɡa.

²⁵ N ɛ ba nyu te dɛɛ tɔ ba sie, n soɡe ba bini kɛŋɔ kooro ne o laa tena, dɛ do kɛ nɛn waa dɛ larawe nɛra ba loo aa kua bwara.”