Job Tɔn 10 - mzwDBL

¹ Job berɔ bol Korowii be ŋɔ, “N soɡa bini pe mɛ, mɛɛ bol waa maa wola ɔmɛ. No n tebinichɔɡ waa nɔ.

² N Naa Korowii, Bɛ men bolchɔɡe pa, ɡel ń jemɛ waa aa bala n ne he dɔ.

³ A wer he be kɛŋɔ he fiɡ mɛ, dɛ́ vɛh kon he ɡbabir aa tao wa aa? Hɛɛ sɛh waa wechɔɡ-ɛɛra aa dɛ vɔrɔwe taa yaa?

⁴ Nɛn sibie he dɔ dɛɛ nyiŋi waa kɛ nɛwɛnyini aa dɛ nyiŋi naa?

⁵ He tɔpera do kɛŋɔ nɛwɛnyini waa won sewa kwa aa? He bene haa di do kɛŋɔ nɛwɛnyini kwa aa?

⁶ Dɛ ɡɛɛ a do aa, ɛrɛɛ hɛɛ nyin he na n wechɔɡa dɛɛ nyin he jemɛ wechɔɡa bɛlbwa maa ɛa nɔɔ?

⁷ He ɡbabir jemɔ kɛŋɔ n ta wechɔɡa ɛɛ, nomɛl aa won lɛɛ mɛ le he nɔn ta.

⁸ Men he ɡbabir aa kpɔ nɔɔra ma nɔ, hɛɛ berɔ chɔɡ mɛ naa?

⁹ Lii kɛŋɔ choh nee he ma mɛ, hɛɛ berɔ chɔɡ mɛ ń berɛ teera aa?

¹⁰ Hen tɛ n mɛɛ bokpeɡa o lol mɛ, he ɡelɔ n kpeɡ n nya tea bini.

¹¹ Henee kpɔ dɛɛhne choŋri n hoɡa, dɛ kpɔ ol ne tɔn bɔla.

¹² He nyin mɛ dɛ tɛ mɛ mkpa, dɛ nyiŋi n nɛɛ kɛrɛdɛ n ta do le.

¹³ Kɛ n nao kɛŋɔ anɔ bwa lɔ he bini, asɛ n jemɛ kɛŋɔ ɡɛɛ lɔ he nyu bini.

¹⁴ Dɛ he dɛ nyiŋi kɛ n fee ɛ wechɔɡa, ásɛ he fe bɛ kpɔ kɛ mɛ.

¹⁵ N ɛ wechɔɡa aa, n fe na wa! N waa toɡrɔ ɡe aa, n fe aa won ir nyu ne, ásɛ sihiih fe kpo mɛ wenaale ɡwaala aa ɡwaa n nɛɛ nomanta.

¹⁶ N ɛ wedɛɛɡa n baŋa pa kwaraa naa, he dɛ bɛɛ mɛ kɛŋɔ nyujente, dɛɛ aah mɛ dɛ́ do mɛ bol he nyokpowe-ɛɛla ne.

¹⁷ Saŋ bɛlbwaa he kpɔ wefala dɛɛ dawɛ n nɛ, he bandia teŋɛ dɛɛ ɡwaa n nɛ, dɛ na vɔrɔwe wefala dɛ́ ba yoo mɛ.

¹⁸ N Naa Korowii, bɔkwa waa he ɡel ba lol mɛ nɔ? N dɛ nyin kɛ n fe aa sewa, nomɛlbwa bɛ men na.

¹⁹ Dɛ ba ta men lolɛ, n fe den sewɛ tea bini bɔ kɛ baa lol mɛ nɔ.

²⁰ N tɔpera aa kaa ta tama kae yaa? Gel mɛ n so dɛ́ lɛ n sie tama,

²¹ ásɛ n berɔ kaa laa, maa wola berɛ ba kpa. N dɛ kaa bela bochaah naa wola toole, bela biro ne suna ɡbo aa lole,

²² bela ɛ biro ɡbo dɛ do kɛŋɔ harambaŋa o ta mar dɔe, dɛ do saɡasaɡa.”