Amanesoma Jɔn Aa Chwera Tɔn 10 - mzwDBL

Peteɡre bɛl sɛɡla

¹ Yeesu ŋɔ, “Kasinteŋ, n dɛ ŋɔ he be, dɛ nomɛlbwa jo peera leɡ bini, dɛ o ta doonyoa cheɡɛ jo dɛ ka che baŋ bɛl dɛ teeh jo a be naa, dɛ ŋwɛɛree on.

² Kɛ peteɡre waa dɛ teɡɛ peera la te, doonyoaa o che dɛɛ jo a be.

³ Dɛ o balaa, onee naate waa dɛ daah doonyoa la ɛɛ ba pila tɛ o dɔ bɔr jo a be. Peera la ɛɛ no o taa, ásɛ o yerɛ anla aa ɛ o kwaa la sɔna á teŋɛ o nɛɛ ó le a ne kaa.

⁴ O le o ɡbaɡba kwaa la ne naa, o dɛ tɔ a sie ásɛ a teŋɛ o nɛ, dɛkalkɛ a jemɛ o taa.

⁵ Aa nɛŋhɔɔh nɛɛ teŋɛ bwa. Aa chwao, dɛkalkɛ aa nɛŋhɔɔhra taa jemɛ.”

⁶ Sɛɡlaa o kpɔ dɛ baɡ ba ɡɛ waa nɔ, kɛ ba ta a mun noɛ.

⁷ Yeesu berɔ ŋɔ ba be ja ŋɔ, “Kasinteŋ, n dɛ ŋɔ he be, n do kɛŋɔ peera leɡ doonyoa la.

⁸ Nɛra baa tɔ n sie dɛ ba la bwa, peera la ta deŋne ba be doe, dɛkalkɛ ba ɛ ŋwɛɛra.

⁹ Menee doonyoa la, ɡɛ peera aa cheɡɛ doonyoa dɛ jo dɛɛ le, dɛ dɔ kwaa dɛɛ di la, ɡɛɛ nomɛlbwa waa yarada mɛ la ɛɛ ba mkpa dɔe.

¹⁰ Ŋwɛɛ balaa, o balɔ dɛ́ ba ŋwɛ dɛ́ kpo dɛ́ chɔɡ kwa. Wedɛɛɡa waa laa wɛɛ ba. Kɛ n te balɔ dɛ ba tɛ heyaa mkpa ásɛ he dɔɔ kɛrɛdɛ.

¹¹ Menee Peteɡredɛɛɡe la. Dɛ seo kwaraa yaa, mɛɛ kpɔ n nyuu charɛ n peera.

¹² Nɛn waa dɛ nyiŋi peera ta dɛɛ lɛ suuɡa la, o ta do kɛ peteɡre peera la aa ɛ o kwa. Paa te la na ɡbolo bala aa, wɛɛ chwao ɡela, ásɛ o jo a bini dɛ́ lawɛ ane, dɛ́ lɔ a kar peɡre.

¹³ Wɛɛ chwao ɡela, dɛkalkɛ o ɡbabir kwaa laa, o waane laa a wa. O kembɔr ɡbo waa wɛɛ ɛ.

¹⁴ Menee Peteɡredɛɛɡe la. Gɛ maa jemɛ n peera la, ɡɛɛ a ɡe jem mɛ,

¹⁵ kɛŋɔ n Mɛɛ aa jem mɛ asɛ n ɡe jemɔ la. Dɛ seo kwaraa yaa, mɛɛ kpɔ n nyuu charɛ dɛ lɛa.

¹⁶ N peera ane ta lɔ leɡa ane bini. Mɛɛ nyin a ɡe bɔree dɛ́ tɔ a sie dɛ́ kpɔa ba ja anɔ ta, ásɛ aa no n taa dɛ́ bwa ɛ beŋkpoŋ, dɛ́ pɛ dɛɛ teŋɛ n nɛ.

¹⁷ Maa sɛah kɛŋɔ mɛɛ koh n peera waa dɛ́ sewɛ dɛ́ berɛ ir seo ta la nomanta, n Mɛɛ la dɛ nyin mɛ taeh.

¹⁸ Lao seo laa mɛɛ ba sewa nɔ. N tetoosewee mɛɛ ba sewa. N dɔ kpeɡri kɛ ń kpɔ n te tɛ dɛ́ sewɛ, dɛ́ berɛ dɔ kpeɡri kɛŋɔ ń ir seo ta. Gɛɛ n Mɛɛ ŋɔ ń ba ɛ.”

¹⁹ Yeesu aa bol ɡɛ la, Juu tena la nyoa ta pɛɛ baa tɔŋle dɔŋa ja.

²⁰ Asɛ ba bini kɛrɛdɛ bwa ŋɔ, “Komɛlee ɡale o sie ta le! O nyu toole! Ɛrɛɛ hɛɛ do deŋne onɔ ɡe be dɛɛ no o waa nɔɔ?”

²¹ Ba bini bane ɡe ŋɔ, “Dɛ komɛl ɡale nɛn sie aa, wɛɛ won dɛɛ bol waa ken aa? Choɡla te ɛɛ won chah nyoŋe wɛɛ na naa?”

Juu tena vɛh Yeesu

²² Dɛ alalawo saŋee, asɛ baa di tɔpejen bɛl ba kpɔ Korowii Dea dɛɛ do o nɔn ta Jerusalam.

²³ Dɛ Yeesu dɛ valɛ Korowii Dea doonyoa bela baa dɛ yerɔ Solomɔn Doonyoa la,

²⁴ asɛ Juu tena ba baro cheme dɛ pɛɛro ŋɔ, “Ɛrɛɛ he ta ɡel yaa ɛ he waa aahna aahna ken nɔɔ? Dɛ henee Kristo la aa, den ɡel ya jemɛ.”

²⁵ Anee o chaŋe ŋɔ, “N ŋɔ he be wubwa, kɛ haa men yarada. N we-ɛɛla bwa maa ɛa la, n Mɛɛ la kpeɡri nee mɛɛ ɛa asɛ aa di mɛ danseɛ.

²⁶ Haa wola n peera ɛɛ waa haa wola men yarada la.

²⁷ N peera dɛ no n taa, asɛ n jema aa teŋɛ n nɛ,

²⁸ asɛ mɛɛ tɛa mkpa aa wola jaɡa dɔe bwa. Aa sewɛ bwa ɡe. Nomɛlbwa ɡe aa won toa le n nɔn ta.

²⁹ N Mɛɛ la waa kpɔa tɛ mɛ la kpeɡri ɡwaa komɛlbwa kpeɡri, anomanta, nomɛlbwa aa won toa le o nɔn ta.

³⁰ N ne n Mɛɛ la bwa ɛ beŋkpoŋ.”

³¹ Belaa Juu tena la pa bwea ja ŋɔ baa foɡroo kpo.

³² Asɛ o ŋɔ ba be ŋɔ, “N baa ɛ wedɛɛɡa kohona n Mɛɛ la kpeɡri ne he bwa siwi ta asɛ he na. Aah dɛ wedɛɛɡa nɔ bini ame waa hɛɛ ba men bwea foɡra nɔɔ?”

³³ Anee ba chaŋe ŋɔ, “He wedɛɛɡa te ɛɛ waa laa yaa ba he kpoe nɔ, kɛ he musu waa haa dɛ bol la waa. Nɛwɛnyinii hen, kɛ he berɔ dɛɛ baɡle kɛŋɔ he ɛ Korowii.”

³⁴ Yeesu chaŋ ba ŋɔ, “Korowii Tɔn baɡlɔ kɛŋɔ Korowii bolɔ ŋɔ, ‘He bɛlbwa do kɛ Korowii.’ He ta kure no kɛɛ?

³⁵ Dɛ o yerɛ nɛra waa kpɔ o waa la baɡle la Korowii aa, dɛ a ɛ kasinteŋ waa yaa wola won vɛh,

³⁶ dɛ men n Mɛɛ Korowii aa lee mɛ dɛ tom mɛ harɛ nɔ ta la ŋɔ Korowii Biee men aa, ɛrɛɛ he ŋɔ n dɛ bol musu waa nɔɔ?

³⁷ Dɛ maa n Mɛɛ la we-ɛɛla ɛ te naa, he bɛ men yarada.

³⁸ Kɛ dɛ n dɛ ɛ o we-ɛɛla aa ɛ nyokpowaa te, dɛ haa men yarada kwaraa naa, hé yarada o nyokpowaa la te, ásɛ dɛ jemɛ kɛ n ne o ɛ beŋkpoŋ bɛlbwa aa wola won daɡre o te o dɔŋ nɛ.”

³⁹ Bela la, dɛ ba fe dɛ nyin Yeesu dɛ́ lawɔ ja, asɛ o laa o te kpɔ fɛmm dɛ kaa.

⁴⁰ Yeesu le Jɔɔdan Moo la ja dɛ kaa o baŋ bela Jɔn faa dɛ sɔ nɛra Korowii nee la, dɛ ka so bela.

⁴¹ Nɛra ba o be pirim asɛ dɛ baa bol dɔŋa be ŋɔ, “Jɔn ta nyokpowaa bɛlbwa ɛɛ, kɛ baa nɔ bwara waa Jɔn aa baɡla la bwa ɛ kpela.”

⁴² Bela la, nɛra yarada Yeesu pirim.