Jeremia 48 - mzwDBL

Gɛ Korowii aa bol Moab harɛ wa

¹ Koranar Bwa Kooro, Israel tena aa dɛ tomɔ bol Moab harɛ wa men Jeremia be ŋɔ, “Nɛbo tena, hé bwɛɛlɛ, dɛkalkɛ he bwɛɛ la dɛ ba chɔɡa. Dɔma yo Kiriataim tena dɛ pɔ ba nɛ, o danjwɛkpeɡ baa maa baro kuuɡo, asɛ sihiih kpo ba.

² Moab harɛ nyanyini tonɔ. Dɔma baa yo Hɛsbɔn tena dɛ pɔ ba nɛ, dɛɛ vɔrɔwe kɛ bá ba chɔɡ Moab harɛ. Nɛra haa lɔ bwɛɛ baa dɛ yerɔ Madmen ɡe bwa hel, dɛkalkɛ laa tena ɛɛ ba yoo baa.

³ Lɔŋɔre dɛ le Horonaim, sibeɡra ne bwɛɛ chɔɡa wii.

⁴ Ba chɔɡ Moab harɛ bwa, hɛ́ɛ no bechale wii.

⁵ Hɛ́ɛ no ba wii ɡbɔɡa Luhit ŋwɛnɛ ta, suna wii baa dɛ wi Horonaim ŋwɛnɛ ta.

⁶ Ba ŋɔ, ‘Hé ɛ warane, dɛ́ chwa lɛ he nyuune. Hé chwa kɛŋɔ kpɔɡ bini keeɡo waa lɔ pua hɛŋle ɡbo harɛ ta ken.’

⁷ Moab harɛ tena, hé kpɔ he te dawɛ he bokpeɡa ne kondɔɔh ta, kɛ ba dɛ ba heyaa yoi dɛ́ pɔ he nɛ, dɛ́ kpɔ voɡ Kemɔs kaa harɛfale ta, o ne o nomonome ne o kerekpoŋra.

⁸ Bwɛɛ bɛlbwa aa kae ba dɛ́ le chɔɡa la nyoa, fɛlembɔjena ne deŋɡarere a dor aa chɔa kaa bwa ɛɛ chɔɡoo. Men Korowiirii bola.

⁹ Hé paaɡe bwea a che tɛ Moab harɛ, dɛkalkɛ aa biɡri ba chɔɡo. Moab bwɛɛre dɛ ba dimɡbia bera, nomɛlbwa aa belaa so kpa.”

¹⁰ Kórowii taah nomɛlbwa waa wola o toma ɛ bambile bwa ne la! Nomɛlbwa waa kwaa o tokobi cheɡ ŋɔ waa kpɔ kpo nɛn la, Kórowii taahno!

¹¹ Korowii ŋɔ, “Moab tena fa soɡe deŋnesɔɔhna ta, ba ta ban lawɛ kaa harɛfale ta bwa. Ba fa do kɛŋɔ sen mun a taa lɔ loŋ bini, baa wola an fuɡe do loŋfale bini ken. A kpeɡri, a sɔɔh ɡe ta charɛ bwa, dɛ ta do ɡɛ aa doa wubwa la.

¹² Anomanta, tɔpere bɛl dɛ ba ásɛ men Korowii tomɛ nɛra bá ba fuɡe Moab tena ta, kɛŋɔ baa dɛ fuɡe sen loŋa bini la ken. Komɛlbwa aa a bini kae ba, ásɛ ba paɡre a bwa.

¹³ Sihiih ɛɛ kpo Moab tena ba voɡ Kemɔs waa, kɛŋɔ sihiih aa kpo Israel tena voɡ Bɛtel baa kpɔ ba hwɛɡa dawɛ o nɛɛ la.

¹⁴ Moab tena, ɛrɛɛ hɛɛ ba wona ŋɔ, ‘Ya ɛ banyoola, baala yaa kpeɡa dɛ won laa yoi kohona ɔ?’

¹⁵ Moab harɛ dɛ ba chɔɡa, ásɛ o dɔma lɔ ba tɔ o bwɛɛre ta. Baa kpoo o bonɔndɛɛɡa bwaa, men Koranar Bwa Kooro maa ɛ kooro laanee bola.

¹⁶ Moab wenaale telo tonɛ, o chɔɡa dɛ ba bala warane.

¹⁷ Bwɛɛre haa soɡa baro bwa nɛra hé wi tɛo, hé nɛra haa na o jirima bwa ŋɔ, ‘Hé na ɡɛ kooro faahna waa kpeɡa dɛ dɔ jirima la aa kua.’

¹⁸ Debɔn tena, hé le he soŋnibɔr waa dɔ jirima ba, dɛ́ ba so harɛ bomboɡ ta. Nɛn waa ba chɔɡ Moab la balɔ dɛ́ ba kuuɡi danjwɛjen waa baro la.

¹⁹ Arowa tena, hé che ŋwɛnɛ nyoa dɛɛ kpa. Hé nyiŋi haahna ne baala baa chwaa dɛɛ kaa, dɛ́ bɔɔ ba waa aa chiɡa.

²⁰ Sihiih kpo Moab tena, dɛkalkɛ ba harɛ la bwa chɔɡɔ. Hé wi dɛɛ do lɔŋɔre. Hé ɡel Aanɔn Moo nyoa tena no kɛŋɔ ba chɔɡ Moab.

²¹ Bwɛjena aa chɔ deŋɡare doa harɛ waa chɔa kaa ta waa bola dɛ́ pa bole telo, anee Holon ne Jaasa dɛ Mɛfaat,

²² dɛ kaa Debɔn ne Nɛbo dɛ Bɛt Diblataim,

²³ dɛ kaa Kiriataim ne Bɛt Gamul dɛ Bɛt Meɔn,

²⁴ ne Kereɔt ne Bosra, dɛ Moab bwɛɛre aa lɔ bojaŋ ne anɔ la aa bɛna bwa ta.

²⁵ Moab tena kpeɡri bwa tonɔ, baa won yo kpa. Men Korowiirii bola.”

²⁶ Korowii ŋɔ, “Hé tɛ Moab tena sen bá nyɔ dɛɛ kohona, dɛkalkɛ ba ɛ men Korowii deŋnekpeɡ. Hé ɡel ba chɔ dɛɛ ɡbaɡre ba chwɛɛra ta, dɛ́ berɛ akwekwe nɛra.

²⁷ Moab tena, Israel tena laa fa berɛ he akwekwe nɛra la aa? Saŋ bɛlbwa he dɛ bol ba wa, a do kɛŋɔ he na ba ne ŋwɛɛra aa dɛ bɔ ken.

²⁸ Moab tena, hé chwa le he bwɛɛre ta dɛ́ ka so bwea dor. Hé ka sɔh he kɔne bwebɔɔne nyoo, kɛŋɔ borɔnomare ken.

²⁹ Ya no Moab tena mbarafo wa, ba dɛ na ba nyu, dɛɛ ɡɔɔ ba te kohona. Mbarafo ne deŋnekpeɡ ɡboo su ba bambili.

³⁰ N jemɛ deŋnekpeɡ baa dɛ ɛ wa, mbarafo baa dɛ ɛ la ta tɔnɔ bɛlbwa dɔe, a bwa ɛɛ ba a jaɡaa. Men Korowiirii bola.

³¹ Anomanta, n wio dɛɛ tɛ Moab tena, ba ɡbosoro waa mɛɛ wi. N wio dɛɛ tɛ Kir Haresɛt baala.

³² N wio dɛ tɛ Sibma tena dɛ ɡwaa kɛ maa wi tɛ Jasa tena, Bwɛjen Sibma, he do kɛ ɡrepo da, he ta kpala dɛ ɡale Yar Mpo hale dɛ kpoŋe kaa Jasa Mpo nyoa bwa. Kɛ taraken, nɛnchɔɡe baa chɔɡ he bɔwɔb saŋ nɔna ne he ɡrepo nɔna.

³³ Silɛɛ ne hɛɡra bɛlbwa toole Moab harɛpare ondɛɛɡe ne kooni ta kpa. N ɡelɔ sen toole bɔra baa dɛ harama, nɛra toole dɛ́ tiɡri a ta. Baa mooluu, kɛ silɛɛ moola laa.

³⁴ Hɛsbɔn ne Eleale tena lɔŋɔre dɛ le, hale aa tel Jahas tena be. A tel Soar tena be, dɛ kpoŋe kaa Horonaim ne Eɡlat Sɛleseya. Hale neerare aa lɔ Nimrim nenabɔɔ bwa hweehrɔ.

³⁵ Moab harɛ taa mɛɛ ba nɛra baa dɛ ɛ sarahare deŋɡarere dor, dɛɛ fuh daawiile dɛɛ tɛ ba voɡare la kpoora. Men Korowiirii bola.

³⁶ N wio dɛɛ tɛ Moab ne Kir Haresɛt tena, kɛŋɔ baa dɛ hoh kalipe dɛɛ ɡo lweyela ken. Ba kondɔɔh baa dɔa bwa le ba nɔn ta.

³⁷ Ba bwa fonɛ ba nyuune, dɛ fonɛ ba tampona ɡe, asɛ dɛ mɔne ba nɔɔra keri ne, bɛlbwa kpɔ lweyal tɔ, a bwa baɡle kɛŋɔ ba lɔ lwe ta.

³⁸ Moab saldor ne bɔra baa dɛ cheme bwa, wobɛlbwa toole ka ja wii ta, dɛkalkɛ n chɔɡ o bwa, kɛŋɔ loŋ baa wola nyin kpa la ken. Men Korowiirii bola.

³⁹ Hé na ɡɛ Moab harɛ bwa aa chɔɡa! Hé na ɡɛ o nɛra aa dɛ wi! Hé na ɡɛ sihiih aa kpo Moab nɛra ba baŋa ɡole! Moab bwa chɔɡɔ, asɛ harɛre nɛra baa soɡa baro bambile teŋe baa mam ba.”

⁴⁰ Waa Korowii aa dɛ bol laanee nɔ. “Hé na, mɛɛ ɡeloo dɔma lɔ ba tɔ Moab harɛ ta, kɛŋɔ kee yon le nyundua dɛ́ paɡri kena dɛ́ ba ta jal la ken.

⁴¹ Baa pɔ bwɛjen Kereɔt nɛɛ, dɛ́ chɔɡ ba dekpeɡa bwa. Awola tɔpere la, Moab banyoola ɛɛ ɔmɔɔ kɛŋɔ haah loltea aa lɔɔ ken.

⁴² Baa chɔɡ Moab harɛ nɛra bwaa, dɛkalkɛ ba vɛh men Korowii.

⁴³ He nɛra haa lɔ Moab harɛ, ɔmee kohona ne bɔɔne, dɛ bela baa haraa dɛ́ chɔ kpa heya. Men Korowiirii bola.

⁴⁴ Nomɛlbwa koh ɔmee kohona la waa chwa dɛɛ kaa laa, wɛɛ le bɔɔ binii. Bɛlbwa ɡe waa ŋɔ wɛɛ leo la, belii dɛɛ ba o lawa, dɛkalkɛ Moab tena deŋnetɛra saŋ telo ń kpɔ ba ta ba nɛ. Men Korowiirii bola.

⁴⁵ Nɛra baa koh laa waa chwa ba bwɛjen Hɛsbɔn wilo, dɛɛ nyin ba nyu, dɛkalkɛ nii le Kooro Sihon koodem dɛ fuh le Hɛsbɔn o fa aa di kora o ta. Nii la fuoh jo ba harɛ jwɛhre bwa ta, hale dɛ ka tel Moab tena baa dɛ nyin yoi kohona la harɛ bwejena dor.

⁴⁶ Moab tena, hé bwɛɛlɛ! Nɛra haa dɛ tomɛ voɡ Kemɔs la, he chɔɡɔ. Ba lawɛ he bibaala ne bihaahna bwa kaa bojaŋ harɛfale ta.

⁴⁷ Kɛ tɔpera ane dɛ ba ásɛ n berɛ ɡel Moab harɛ do ɡɛ o fa aa doa ja. Men Korowiirii bola.” Bonɔɔ men Jeremia Korowii waa maa bola ŋɔ wɛɛ pa Moab tena bolchɔɡe la jaɡɛ.