Jeremia 12 - mzwDBL

Jeremia waa naɡra

¹ Jeremia ŋɔ, “N Naa Korowii, saŋ bɛlbwa maa kpɔ n waa bil he sie la, he konee dɛɛ do som. Mɛɛ bol he waa bola dɛ́ pa bole aŋwɛnɛ ta waa. Ɛrɛɛ nyubinikpeɡ tena wobɛlbwa yon dɛɛ chiɡ ba kɛrɛdɛ nɔɔ? Ɛrɛɛ nɛnchɔɡa ɛɛ dɔ bosɔɔhna nɔɔ?

² Ba do kɛŋɔ daa he kpɔ ba du, he nyiŋi ba nɛɛ ba kpeɡ dɛ dɔ lune dɛɛ nɔnɛ. Ba nyoo ɡbo nee baa kpɛɛre, kɛ he waa toole ba bambile bini.

³ N Naa Korowii, kɛ ane a bwa, he jem mɛ, he dɛ na mɛ dɛ jemɛ ɡɛ he waa aa lɔ n bini. Tɛɡre nɛnchɔɡa la kɛŋɔ peera baa dɛ la ka kpoora! Lee ba cheɡ ka tel saŋ baa kpoo ba!

⁴ Saŋ besoo harɛ nɔ ɛɛ ba hola ka tel mɔɔ kpɔɡa bwa hol ɔ? Dɛkalkɛ nyubinikpeɡ tena soɡe o ta, a ɡel kpɔɡ bini ola ne jumbii bwa serewe. A bwa habɔɔ la, nɛra la dɛ bol ŋɔ, ‘Korowii aa waa aa pu yaa nae ba.’ ”

Gɛ Korowii aa chaŋe Jeremia

⁵ Korowii ŋɔ, “Jeremia, he ne nɛra chwao, he ta ban wone dɛ koh aa, ɛrɛɛ he ne jaɡre ɛɛ ba wona chwa ɔ? He lɔ naa bɔchaah ta naa, ɛrɛɛ hɛɛ ba wona chwa Jɔɔdan Moo nyoa kɔr bini nɔ?

⁶ He dɔɔranar ne nimanar, dɛ he ɡbabir lolanar lee tɛ, ba taa cheɡɛ chiŋ baa mooli. A lole kɛŋɔ he ne ba bol waa dɛɛ mamɛ, kɛ dɛɛ berɛ ba yaradae.”

⁷ Korowii berɔ ŋɔ, “Mɛɛ vɛh n nɛra Israel tenaa, nɛra maa lee ba tɛ n te la. Mɛɛ lawɛ nɛra maa dɛ nyin ba waa do ba dɔma nɔn ta.

⁸ N ɡbabir nɛra maa lee ba tɛ n te chwa mɛ, ba do kɛŋɔ nyujente waa lɔ kpɔɡ bini dɛɛ kɔr mɛ, anomanta, n hah ba.

⁹ N nɛra maa lee ba tɛ n te do kɛŋɔ jumbie kɔle aa baro cheme dɛ́ yoo. Hé yerɛ kpɔɡ bini ola á bwa ba cheme dɛ́ di o ola.

¹⁰ Peteɡra kpɔ ba peera ba tiɡri n daa koo do harɛ, kɛŋɔ harɛre ane koranar aa chɔɡ n nɛra la. A ɡelɔ koo n sie aa dɛ lɛ o ta chɔɡ, dɛ berɛ pua hɛŋle ɡbo harɛ.

¹¹ O berɛ pua hɛŋle ɡbo harɛ, dɛ chɔ pɛɛ n siwi ta. Harɛ la bwa ɛɛ chɔɡoo, dɛkalkɛ nomɛlbwa waane laa o wa.

¹² Laa tena baa wara lɔ pua hɛŋle ɡbo harɛ deŋɡarere dor, dɛɛ ba dɛ́ ba chɔɡ nɛra ne kwa. Men Korowiirii kpɔ ba dɛɛ ba, bá ba yoo ba, dɛ́ chɔɡ harɛ la bwa ásɛ nomɛlbwa bɛ deŋnesɔɔhna dɔ.

¹³ N nɛra ɛɛ du meaa, kɛ sɔɔhnee baa ba koma, dɛ́ koh pɛɛpɛɛ baa wola komɛlbwaa dɔ. N bandia kohona nomanta, ba koo kondikwaa bwa chɔɡɔ sihiih kpo ba.”

¹⁴ Anomanta, Korowii ŋɔ, “Harɛre nɛra ba nyu bini aa kpeɡa, ba so bar harɛ maa kpɔa tɛ n nɛra Israel tena ba ba chɔɡo la, mɛɛ le ba ne ba harɛre taa, kɛŋɔ ba yon fuɡri dua la ken, dɛ́ lɛ Juda tena le ba bini.

¹⁵ A habɔɔ, mɛɛ berɔ dɔ tedoma tɛ ɡɛ nɛra nɔ bwa, dɛ́ berɛ ba ba ne ba buɡ ta. Ásɛ bɛlbwa kaa o nɛra bini, ne harɛ waa le o ta.

¹⁶ Kɛ dɛ ba wono charɛ ba liire dɛ hweli n nɛra we-ɛɛla, dɛ won dɛɛ ŋwɛɛ n sɔn ta ŋɔ, ‘N ta aa lole saŋ bɛlbwa’ nɔ ɡɛ ba fa aa baɡle n nɛra ba yon ŋwɛɛ voɡ Baal la aa, amɔ ba ɡee ja n nɛra nɛɛ, ásɛ ba wobɛlbwa do wer tɛɛ ba.

¹⁷ Dɛ harɛ bɛlbwa nɛra ta deŋne cheɡɛ dɛ no aa, mɛɛ le ba nee kɛŋɔ baa fuɡri dua ken, dɛ́ chɔɡ ba. Men Korowiirii bola.”