Hosia 8 - mzwDBL

Israel tena du peu dɛ ɡel mea

¹ Korowii ŋɔ Israel tena be ŋɔ, “Hé hoh laa bɛla. He dɔma dɛ ba he nɛɛ kɛŋɔ kee aa le nyundua dɛɛ tu la, chɔɡa haa chɔɡ n ne he fɔo, ne deŋnekpeɡ haa ɛa men Mmarare ta la wa.

² Kɛ ane a bwa, Israel tena wio dɛɛ yer mɛ ŋɔ, ‘N Naa Korowii yaa dɛ tomɛ, ya jemɛ.’

³ Israel tena vɛh waa aa wera, anomanta, ba dɔma ɛɛ ti ba a waa.

⁴ Ba cheɡ koranar maa wola a waa jemɛ, dɛ le nomonome le n habɔɔ. Ba kpɔ ba ɡbaɡba suuɡapoŋa ne suuɡaswɛm ɛ voɡa dɛ kpɔ chɔɡ ba te.

⁵ Suuɡaswɛm Samaria tena aa kpɔa ɛ nabale la ɡelɔ n baah di ba nɛ, bá kpɔ viɡri. Saŋ besoo baa ba voɡa toma ɡela ɔ?

⁶ Israel harɛ taa voɡ la le, Israel tee loɡɔ, men Korowii laa. Samaria nabale la, baa kuuɡu buruburu ken.

⁷ Ba du peu dɛ ɡel mea, anomanta, kawulewulee baa ba koma. Mea aa wola bie dɔe ta kondikwaa dɔe. Dɛ a dɔ bie kwaraa naa, nɛŋhɔɔhraa dɛɛ ba a dii.

⁸ Israel tena waa tonɔ, ba do kɛŋɔ konsala harɛre nɛra bini.

⁹ Ba joɔ kaa Asiiria harɛ ta, kɛŋɔ keeɡo kpaŋi waa pere o te dɛɛ ɡaaɡe ken, dɛ yoɡ ba te tɛ Asiiria ne harɛre tena bane bá cha ba.

¹⁰ Ba yoɡ ba te tɛ ɡɛ te, kɛ taraken mɛɛ berɔ boa ba nyoa. Baa na hɔhɔrɔwa kohonaa Asiiria koojen nɔn ta.

¹¹ Israel tena aa ɛ kwaa baa ɛ saraha a ta aa warɛ la, dɛ ɡɛɛ ba wechɔɡa ɡe ɛɛ warɛ.

¹² N chwerɛ waa taeh, dɛ le me Mmara la bini tɛɛ ba, kɛ ba liira harɛ bɛl ta wa.

¹³ Ba kpɔ kwaa ɛ saraha tɛ mɛ dɛɛ chwe a ola, men Korowii, n sie aa a ta lɛ. Mɛɛ lii ba wechɔɡa baa dɛ ɛ laanee, dɛ́ tɛr ba deŋne a wa. Baa berɔ kaa Ijipt harɛ ta.

¹⁴ Israel tena ma kooderemi, dɛ soh men Korowii maa ta ba wa. Juda tena ma dekpeɡa bwɛjena ta taeh. Kɛ mɛɛ kpɔ niinii ba ta ba bwɛjena ta, ásɛ a fuh ba dekpeɡa bwa.”