Hosia 4 - mzwDBL

Korowii ne Israel tena dɔe wa

¹ Korowii ŋɔ o ne Israel tena dɔɔ, dɛ ŋɔ bá no waa waa dɛ bol. O ŋɔ, “He waa ta kasinteŋ dɔe, he ta nyina ɡe dɔe, haa men jemɛ harɛ nɔ ta.

² Taahna wobol ɡboo lɔ he nyoo, he dɛ teŋe nyosone, dɛɛ kpoo dɔŋa, dɛɛ ŋwɛ, dɛɛ chɔɡ yal, dɛɛ ɛ anɔ la aa wola were bwa dɛɛ ja. Nɛŋkpoa ɡboo harɛ nɔ ta bwa.

³ A ɡɛ nomanta, harɛ la holɔ dɛ chɔɡ, ásɛ kwaa aa lɔ o ta bwa serewe. Kpɔɡ bini ola ne jumbii dɛ mpo bini pɛŋa bwa dɛ serewe.”

⁴ Korowii berɔ ŋɔ, “Bɛlbwa ne o dɔŋ bɛ dɔ, bɛlbwa bɛ o dɔŋ pwah. He do kɛŋɔ nɛra baa dɛ pwah sɔfore.

⁵ Chɔɔ ne jwaana bwaa hɛɛ lɔ na, he ne Korowii keamere bwa. Gɛɛ mɛɛ ba Israel waa ɛ he nya la chɔɡa.

⁶ N nɛra aa wola men Korowii jemɛ nomanta, ba dɛ serewe. He sɔfore, haa wola n waa ta teŋɛ nomanta, n ɡe vɛh heya. Haa vɛh men Korowii haa dɛ tom mɛ webaɡla ta teŋa nomanta, n ɡe ɛɛ vɛh he biirii.

⁷ He sɔfore, haa dɛ warɛ la, dɛ he dɛ ɛɛ mɛ wechɔɡa kohona. Anomanta, mɛɛ ɡeloo he jirima berɛ sihiih.

⁸ N nɛra wechɔɡa taa he sɔfore che dɛɛ dɔ he te, anomanta, he dɛ nyin ba na dɛɛ ɛ wechɔɡa kohona.

⁹ Gɛ maa dɛ ba nɛra la ɛɛ laanee mɛɛ ba he sɔfore ɡe ɛɛ. Men Korowii ɛɛ tɛr he bwa deŋnee, dɛ bɔ heyaa kem a wa.

¹⁰ Hɛɛ di kondikwaa, kɛ haa vaɡɛ, dɛ́ bɔ jwamane, kɛ he mun aa ya bwa, dɛkalkɛ he vɛh men Korowii dɛ kpɔ he te tɛ voɡa ane.

¹¹ Sembena ne anfala nyɔe chɔɡ n nɛra liire baa waa mun no.

¹² Daa baa teŋa ɛ voɡa taa baa la dɛ kaa bɔɔ ba nyuune wa, ásɛ daa la ɛɛ bol waa ba be. Ba laa ba te kpɔ men Korowii baa dɛ tom mɛ nɛ, kɛŋɔ hanjwamane dɛ kaa tomɛ voɡa ane.

¹³ Bwejena doree baa ɛ sarahare, dɛɛ fuh saraha kwaa deŋɡarere ta, ne dajena bwa soo siwi a chunchule aa soma lɔɡre. A cheɡɛ a ta he bihaahna kpɔ ba te do jwamane ta, asɛ he bibaala haahna ɡe ɛɛ chɔɡ yal.

¹⁴ Maa he bihaahna baa dɛ bɔ jwamane la deŋnee tɛr, ɡɛɛ maa wola he bibaala haahna ɡe deŋnee tɛr ba yal chɔɡa wa. He baala nɔ ɡbabir deŋnee mɛɛ ba tɛra, dɛkalkɛ he ne haahna la dɛ bɔ jwamane dɛ kaa ɛ saraha voɡa ta, nɛra baa wola waa mun no la ɛɛ heo!

¹⁵ A lole kɛŋɔ he Israel tena le n habɔɔ, he bɛ ɡel Juda tena ɛ ɡɛ dɛ́ di a bolchɔɡe. He bɛ Gelɡal la, he bɛ Bɛt Avɛn ɡe la. He bɛ men dɛɛ ŋwɛɛ ŋɔ men Korowii ta aa lole!

¹⁶ Israel tena deŋne kpeɡri, kɛŋɔ naneenanar a deŋne aa kpeɡa ken. Ɛrɛɛ men Korowii ɛɛ ba wona kpɔa la dibɔr kɛŋɔ baa teɡɛ pebiiri dɛɛ la dibɔr ɔ?

¹⁷ Israel tena kpɔ ba te jo voɡa toma ta, hé ɡel ba.

¹⁸ Ba nyɔ sen tonaa, ba ka dɛ bɔ ba jwamane la ja. Ba sie dɛ lɛ sihihwaa ta ɡwaa anɔ la aa tɛɛ ba jirima.

¹⁹ Kawulewule ɛɛ tao kpɔ ba kaa, ásɛ sihiih kpo ba sarahare baa dɛ ɛ voɡa ta la wa.”