Hosia 2 - mzwDBL

¹ Korowii ŋɔ Hosia yerɛ o bala Israel tena la ‘Korowii nɛra’ ne ‘Korowii nɛnnyina.’

Korowii tɛr Israel tena deŋne dɛ berɛ lɛɛ ba

² Korowii ŋɔ Israel tena be ŋɔ, “N bii, hé soŋe he bala baa do kɛŋɔ haah o jwamane nomanta, n haah naa wola on ɛɛ, o ɡe jaa laa men la, ó ɡel o bannyin la, dɛ́ ɡel jwamanwaa la.

³ Dɛ ɡɛ laa, mɛɛ wuruu o che muŋɡbal kɛŋɔ awola baa lolɔ la ken. Mɛɛ ɡeloo ó do kɛŋɔ pua hɛŋle ɡbo harɛ, dɛ́ do kɛŋɔ harɛ waa hola, ásɛ nyɔɡre kpoo ó sewɛ.

⁴ Maa o bii waa nyin, dɛkalkɛ sɛmbiirii ban.

⁵ Ba nya le n habɔɔ, dɛ ka di sɛm lolɛ sihihbii. O ŋɔ, ‘Mɛɛ teŋɛ banfala nɛɛ dɛ́ kpɔ n te tɛɛ ba, ásɛ ba tɛ mɛ kondikwaa ne ne, ne pee pona yale ne yapondɛɛɡa, ne ɔleve noo dɛ sen.’

⁶ Anomanta, mɛɛ kpɔ sɔɔhnee tɔɔ ŋwɛnɛ. Mɛɛ tɔɔ do waa wola won dɔ bɔr le.

⁷ Wɛɛ ti baala laanee, kɛ waa ban pu, wɛɛ nyin ba bɔree, kɛ waa ban na. Ásɛ dɛ ŋɔ, ‘Mɛɛ berɔɔ kaa n jaloɡle be, belaa wera tɛ mɛ ɡwaa taraken.’

⁸ O ɡbabir ta liire kɛŋɔ menee tɛo kwaa kɛŋɔ mea, senfala ne ɔleve no, ne suuɡapoŋa dɛ suuɡaswɛm kohona, o kpɔ kaa tomɛ voɡ Baal la.

⁹ Anomanta, mea koma telaa, mɛɛ ba lɛa, dɛ́ ba lɛ n sen senfala saŋ. Dɛ ba lɛ n pee pona yale, ne yapondɛɛɡa maa kpɔa tɛo o tɔ o mumɡbal ta la.

¹⁰ Mɛɛ wuruu ó che mumɡbal o sɛnanar la sie, nomɛlbwa aa wola won lɛo le n nɔn ta.

¹¹ Mɛɛ ɡeloo o tɔpejena dii ba a jaɡa. Benanyoa ne Korobifala Tɔpejena, ne Ona Tɔpera dii dɛ tɔpejena waa lea cheɡ bwa.

¹² Mɛɛ chɔɡ o ɡrepo ne fiɡ daa waa ŋɔa o sɛnanar la kpɔɔ bɔɔ kem la. Mɛɛ ɡeloo o daa kooni baah moɡɛ kohona, ásɛ kpɔɡ bini ola ba di a nɔna.

¹³ Mɛɛ tɛr o deŋnee, tɔpera waa fuh daawiile a sɔɔh aa soma tɛ voɡa Baalre la, ne suuɡaswɛm nɔnloɡa, ne baŋa kwa dɛ noniseɡa waa doa dɛ teŋɛ o sɛnanar nɛɛ dɛ soh n waa la wa. Men Nemenɛ Korowiirii bola.

¹⁴ Anomanta, mɛɛ lawɔɔ, dɛ́ kpɔɔ kaa pua hɛŋle ɡbo harɛ ta, dɛ́ ka kpɔ sɛmwobol ɡbɛɡbɛo.

¹⁵ Mɛɛ berɛ o daa kooni laanee tɛo, ásɛ dɛ berɛ Akɔ Fɛlembɔjen la bela hwɛɡa aa lole. Belaa wɛɛ ba yela ɡoe silɛɛ ne kɛŋɔ o toli saŋ, ne ɡɛ awola tɔpere waa le Ijipt harɛ ta la ken.

¹⁶ Awola tɔpere la, wɛɛ yer mɛ ‘n jaa’, waa men ‘n dɔɔ’ yerɛ kpa.

¹⁷ Maa ɡel ó yerɛ voɡa Baalre sɔna, waa a waa bol kpa.

¹⁸ Awola tɔpere la, n ne kpɔɡ bini ola ne jumbii, ne kwaa aa dɛ tuuɡi tea ta dɛ anɔ la aa dɛ huuh ɛɛ fɔwɛ fɔwee, ásɛ a bɛ n nɛra wobɛlbwa ɛ. Mɛɛ le laa ne dɔmkwaa kɛŋɔ, to ne hɛma dɛ tokobie bwa nee harɛ la taa, ásɛ bɛlbwa dɔ deŋnesɔɔhna harɛ la ta.

¹⁹ Mɛɛ kpɔ hen Israelee ɛ kɛŋɔ n haah saŋ bɛlbwa dɛɛ la, mɛɛ di kasinteŋii, maa he habɔɔ le. N nyina aa wola jaɡa dɔe he nɛɛ aa tona ba bwa, mɛɛ dɔ tedomaa tɛɛ, ásɛ he ɛ n haah saŋ bɛlbwa.

²⁰ Mɛɛ teŋɛ n nyobaɡa taa, dɛ́ kpɔe ɛ n haah, ásɛ he jemɛ kɛrɛdɛ kɛ menee Korowii.

²¹ Awola tɔpere la, mɛɛ no n nɛra Israel tena wesoŋaa, ásɛ dɛ ɡel bwaala nɛ harɛ la ta,

²² ásɛ mea ne ɡrepo ne ɔleve do wer Jesreel Fɛlembɔjen bini.

²³ Mɛɛ kpɔ n nɛra Israel tenaa, ásɛ ba ba so harɛ la ta, nɛra n fa aa ŋɔa ‘Maa ban nyin la,’ ń berɛ nyin ba wa. Nɛra maa ŋɔa ‘Ba ta n nɛra ɛɛ la’, ń berɛ ŋɔ ‘Hé ɛ n nɛra’, ásɛ ba ŋɔ, ‘Henee Korowii yaa dɛ tomɛ la.’ ”