Haɡae 2 - mzwDBL

Korowii Dea baa kwaara ma jirima wa

¹ A ɡɛ bena la korobie anuanɛ tɔpera fifraanɛ dɛ beŋkpoŋ ta la, Korowii berɔ che o keame Haɡae nɛɛ dɛ bol waa ŋɔ,

² ó bɔɔ Juda harɛ nomoa Sɛrobabɛl, ne Sɔfonomoa Josua dɛ harɛ la ta nɛra baa kaa la ŋɔ,

³ “Umee ta kaa dɛ́ lii n Dea nɔ jirima o fa aa dɔa ɔ? Taraken, ɛrɛɛ hɛɛ nao wɔ? O berɛ kompɛɛ bɛl he siwi ta naa?

⁴ He bɛlbwa bɛ ɡel o bwara yɔr, hé ɛ toma la, n ja he nɛ.

⁵ Haa le Ijipt harɛ ta la, n baɡɛ heyaa nyoa ŋɔ mɛɛ ja he nɛɛ saŋ bɛlbwaa. N ta ja he nɛ, he bɛ ɔmɛ.”

⁶ Koranar Bwa Kooro bol Haɡae be ŋɔ, “A ka tamaa ken mɛɛ yiiɡi nyundua ne harɛɛ dɛ mpo.

⁷ Mɛɛ chɔɡ nɛŋhɔɔhra baa wola Korowii tomɛ kpeɡri bwaa, ásɛ ba kpɔ kwaa a yoɡ aa kpeɡa kohona ba o bini, ásɛ n ɡel kondɔɔh ba su n Dea la bwa. Men Koranar Bwa Kooroo bola.

⁸ Harɛ nɔ suuɡapoŋa ne suuɡaswɛm bwa ɛ n kwa.

⁹ Jirima taraken n Dea nɔ aa dɛ ba dɔe la, ɛɛ ɡwaa wubwa kon laanee. Ásɛ dɛ tɛ n nɛra deŋnesɔɔhna bela. Men Koranar Bwa Kooroo bola.”

Andɛɛɡa soŋa dɛ́ tɛ nɛra baa kah doŋa

¹⁰ Koojen Dareɔs aa di kora bennɛɛte ta korobie anuanaarɛ, o tɔpera fifraanɛ dɛ anaarɛ taa Korowii Waa Ɛ Koranar Bwa Kooro bol waa keame Haɡae be ja ŋɔ,

¹¹ “Bɔɔ sɔfore la ɡɛ Mmara la aa dɛ baɡle waa maa dɛ ba he bɔɔra nɔ.

¹² Dɛ nomɛl kpoŋe ol baa kpɔa ɛ saraha tɛ men Korowii, o do wer ne dii do o batakaare bini, asɛ dɛ kpɔ batakaare la ka leɡe paanoo, ne kondikwaa baa daala kɛɛ sen, kɛɛ no, kɛɛ kondikwaa bɛlbwa naa, a ɡelɔ a ɡɛ kondikwaa la ɛɛ do ɡoroŋ aa?” Asɛ sɔfore la ŋɔ, “Akai.”

¹³ Anee Haɡae ŋɔ, “Dɛ nomɛl lawɛ lale dɛ kah doŋa, dɛ ka leɡe ɡɛ kwaa la bɛlbwa naa, dɛ doŋa la ba a ta naa?” Sɔfore la ŋɔ, “Ɔɔh, dɛ doŋa lɔ a ta.”

¹⁴ Ate, Haɡae berɛ ŋɔ, “Korowii ŋɔ, ɡɛ tentenee nɛra baa lɔ ɡɛ harɛ nɔ ta ne wobɛlbwa baa dɛ ɛ bwa do, waa an lɛ. Komɛlbwa baa kpɔa dɛɛ ba kon baa dɛ ɛ saraha o ta la kah doŋa.”

¹⁵ Korowii ŋɔ, “He ta waa aa pu heyaa nɔ nae yaa? Mɔɔ he pa mun dɛ́ do n Dea la,

¹⁶ nomɛl kpɔ kon dɛɛ la ka maɡɛ mea kuruwa dela fifraanɛ bela aa wara chɔ aa, kuruwa dela fii wɛɛ dɔ. Nomɛl la bela baa dɛ harame ɡrepo, dɛ ŋɔ o dɛ la ka ɛ sen vii dela fifraanue naa, vii dela fifraanɛɛ wɛɛ dɔ.

¹⁷ N ɡelɔ peuwɔb ne dombwea ba chɔɡ he kwaa haa dua bwa, kɛ he ta he liire charɛ dɛ ba n be. Men Korowiirii bola.

¹⁸ Hé nyiŋi le fini dɛɛ kaa, korobinuanaarɛ nɔ tɔpera fifraanɛ dɛ anaarɛ nɔ haa pa Korowii Dea nɔ mun nɔ, dɛ́ na waa aa dɛ ba bala.

¹⁹ Mea tonɔ, asɛ ɡrepo ne fiɡ daa, ne pɔmeɡranet dɛ ɔleve daa ta nɔnɛ mɔɔ, kɛ le fini dɛɛ la mɛɛ swee andɛɛɡaa tɛ heya.”

Korowii nyoa waa baɡɛ Sɛrobabɛl

²⁰ Korowii berɔ bol waa o keame Haɡae be korobie la tɔpera fifraanɛ dɛ anaarɛ ta nɛɛtena ja dɛ ŋɔ,

²¹ “Ŋɔ Juda harɛ ta nomoa Sɛrobabɛl be ŋɔ, ‘Mɛɛ yiiɡi nyundua ne harɛɛ.

²² Mɛɛ lɛ koranar kpeɡri ba bee, dɛ́ ɡel harɛre kora kpeɡri ba a jaɡa. Dɛ beɡre torɔɡore baa vɔwa dɛɛ pɛl jaɡre piiɡi. Jaɡre ɛɛ choɡluu, ásɛ nɛra baa dɛ so a ta kpoo dɔŋa keri ne.

²³ Awola tɔpere la, mɛɛ le hen Sɛrobabɛl haa ɛ n bonɔɔnee, ásɛ hɛɛ nyiŋi harɛ la ta n sɔn ta, henee ń le. Men Koranar Bwa Kooroo bola.’ ”