Ɛsekeɛl 13 - mzwDBL

Keame nyosonteŋna pwaeh

¹ Korowii berɔ bol waa men Ɛsekeɛl be ŋɔ,

² “Nɛwɛnyini bie, kah Israel keamere baa kpɔ ba ɡbabir liire dɛɛ bol waa aa dɛ ba bala la. Ŋɔ ba be ŋɔ, bá cheɡ deŋne, dɛ́ no waa maa dɛ bol.”

³ Nemenɛ Korowii ŋɔ, “Keame ɡɛna la bwɛɛlɛ. Ba cheɡɛ ba ɡbaɡba wejema ta, dɛ ŋɔ ba dɛ na chaahna, dɛ ba ta wobɛlbwa nae.

⁴ Israel tena, he keamere la do kɛŋɔ dimɡbia kalampoŋare ken.

⁵ Baa sie do danjwɛɛre aa peɡra la ta, dɛ́ kwaara, ásɛ dɛ laa dɛ ba naa, ba won lɛ Israel ta, dɛ́ won che Korowii Tɔpere La nyoa.

⁶ Ba wepila ne ba nyosonwaa baa ŋɔa aa bao kerekere la bwa ɛ nyosone, ba ŋɔ men Korowiirii bola, dɛ n laa tom ba, dɛ ta ɛɛ nyiŋi kɛŋɔ anɔ la baa bola la ɛɛ ɛo.

⁷ N ŋɔ ba be ŋɔ, ‘He wepila haa naa la bwa ɛ nyosone, asɛ waa haa ŋɔa aa bao la ɡe ta kasinteŋ ɛɛ. He ŋɔ, men Korowiirii pila dɛɛ baɡle heya, dɛ n ɡe laa bola.’ ”

⁸ Anomanta, Nemenɛ Korowii ŋɔ, “He dɛ neɡre nɛra, he waa ha ŋɔa aa bao ne he wepila la ɛ nyosone, n ne he dɔɔ.

⁹ Mɛɛ tɛr he keamere haa ŋɔa he dɛ na wepila ne waa aa dɛ ba bala kerekere a ɛ nyosone la deŋnee. Haa n nɛra Israel tena nɛɛ ja, kɛɛ bá chwerɛ he sɔna ja ba nɛ. He bɛlbwa nakpala aa Israel harɛ taa tire kpa. Ásɛ he jemɛ kɛŋɔ menee Nemenɛ Korowii.

¹⁰ Keamere la tɔ n nɛra sie dɛ ɡel baa nyoɡre. Ba ŋɔ deŋnesɔɔhna lole, dɛ deŋnesɔɔhna ɡe toole bobɛlbwa. N nɛra ma danjwɛɛ waa wola kpeɡe, asɛ keamere la kpɔ fula lɔɔ.

¹¹ Ŋɔ keamechɔɡa la be ŋɔ, ba danjwɛɛ la dɛ ba chola. Mɛɛ ɡeloo bwaala nɛ kohona, dombwea lee o ta, ásɛ peukpeɡ ta kohona lɔɔ.

¹² Danjwɛɛ la baa chole aa, nɛra ɛɛ bɔɔ heyaa ŋɔ, fula baa kpɔa lɔ danjwɛɛ la munii ɛrɔɔ?”

¹³ Nemenɛ Korowii ŋɔ o baah diu wɛɛ ba ɡela peukpeɡ ta, ásɛ bwaala nɛ kohona dombwea lee, dɛ́ chɔɡ danjwɛɛ la.

¹⁴ O ŋɔ, “Mɛɛ taɡɛ danjwɛɛ baa lɔɔ fula laanee ta ó bwa chɔ harɛ, ásɛ bwea baa kpɔa pa o mun la chɔ baŋ. Waa ba chole la, he bwa ɡe dɛ ba serewa. Ásɛ he jemɛ kɛŋɔ menee Korowii.

¹⁵ Danjwɛɛ la ne nɛra baa kpɔ fula lɔɔ la nɛɛ mɛɛ ba n bandia ne bala, dɛ́ ŋɔ he be ŋɔ, ‘Danjwɛɛ la kuuɡo, ɡɛɛ nɛra baa lɔɔ fula la ɡe aa wola lee do kpa.

¹⁶ Israel harɛ keamere la ŋɔ deŋnesɔɔhna lɔ Jerusalam, kɛ dɛ deŋnesɔɔhna ɡe toole. Men Nemenɛ Korowiirii bola.’ ”

¹⁷ Korowii ŋɔ men Ɛsekeɛl be ŋɔ, “Nɛwɛnyini bie, eɡle sie ta haahna baa cheɡɛ ba ɡbaɡba liire ta dɛɛ bol waa aa dɛ ba ba nɛɛ bala kerekere la nɛ, kah ba,

¹⁸ dɛ ŋɔ Nemenɛ Korowii ŋɔ, ‘Haahna haa nyarɛ sɛmbɛ kwaa dɛɛ do nɔɔra, ne sɛmbɛ botini haa nyara dɛɛ bɔle nyuune la, hé bwɛɛlɛ. He dɛ nyin kɛ he dɔ seo ne mkpa kpeɡri n nɛra Israel tena nɛ, dɛ́ che a ta dɛ́ dɔ he te.

¹⁹ He chɔɡ mɛ dɛɛ tɛ n nɛra, dɛ lɛ mea nɔndela tama ne paanoo tama dɛɛ le ba be. Dɛ teŋe nyosone dɛɛ kpoo nɛra baa wola chɛ kɛ he kpoo, dɛɛ ɡel banɔ la baa chɛ kpoora. Gɛɛ he teŋe nyosone dɛɛ tɛ n nɛra asɛ baa yarada he wa.’

²⁰ Men Nemenɛ Korowii ŋɔ, ‘N hah he sɛmbɛre haa doa dɛ kpɔ dɛɛ lawɛ nɛra kɛŋɔ jumbii la. Mɛɛ chaara le he nɔɔra ta, ásɛ dɛ ɡel n nɛra haa laɡ ba kɛ jumbii la dɔ ba te.

²¹ Mɛɛ wur he sɛmbɛ botini laanee ta, dɛ́ lɛ n nɛra le he nɔn ta, ásɛ ba le he bela la ta kwaraa. Ásɛ he jemɛ kɛŋɔ menee Korowii.

²² He nyosone la chɔɡ nɛndɛɛɡa liire, ɡɛ n fe aa wola nyin kɛ ba do. He dɛ do nɛnchɔɡa ɡbemba ba bɛ ba liire charɛ le ba wechɔɡa ta dɛ́ dɔ ba nyu.

²³ Haa wepila ne nyosonwaa aa dɛ ba bala laanee na kpa. Mɛɛ lɛ n nɛraa le he nɔn ta, ásɛ he jemɛ kɛŋɔ menee Korowii.’ ”