Aesaya 8 - mzwDBL

Korowii cheɡɛ Asiiria koojen nɛɛ ɛ o wa

¹ Korowii berɔ ŋɔ n be ja ŋɔ, “Nyin tɔnjen ásɛ dɛ chwerɛ waa maa dɛ́ ba bola nɔ do o ta. Chwera a do bare. Anee kɛŋɔ Mahɛr Salal Has Bas. O munii kɛŋɔ, ‘Bá ɛ warane dɛ́ ka kam anɔ la baa won, bá kpɔ chwae dɛ́ ka pa laala aa kaa.’

² Mɛɛ ɡeloo n dea sɔfo Uria ne Sekaria baa dɛ yerɛ o mɛɛ Jɛbɛrkea ɛ n danseɛ tena. Ba waa dɔ kasinteŋ.”

³ Aa la sie la, n haah kpoŋe tea dɛ lolɛ bibaa. Asɛ Korowii ŋɔ n be ŋɔ, “Pao Mahɛr Salal Has Bas.

⁴ Bie la ne kpeɡa dɛ́ jemɛ ‘nya’ ne ‘mɛɛ’ yera la, dɛ Asiiria koojen baa pa Damaskɔs tena kondɔɔh ne Samaria tena laala laa ta kaa.”

⁵ Korowii berɔ bol waa n be ja dɛ ŋɔ,

⁶ “Jerusalam tena aa vɛh nyiŋa maa dɛ nyiŋi ba nɛɛ bɔeeh kɛŋɔ Siloa nenabɔɔ aa dɛ palɛ bɔeeh, dɛ dɔ silɛɛ Kooro Resin ne Kooro Pɛka nɛɛ kɛŋɔ bá ba cha ba nomanta,

⁷ mɛɛ ɡeloo Asiiria koojen ne o laa tena yoo ba. Báa ba ba nɛɛ kɛŋɔ Yufretis Moo aa sua bɔle o diŋɡoŋni bwa ta,

⁸ dɛ́ su kpɔ Juda harɛ bwa, dɛ́ tel ba baŋa ta dɛ́ bɔle komɛlbwa ta. Imanoɛl, wɛɛ paɡri o kenaa tɔ he harɛ la bwa.”

⁹ Anomanta, harɛre nɛra, hé lawɛ he te pɛ dɛ́ so ɔmee ta! Harɛre haa lɔ bojaŋa bwa nɛra, hé no. Hé kpɔ he te dɛ́ ka yo, kɛ hɛɛ ɔmɛ! Hé kpɔ he te dɛ́ ka yo, kɛ hé ɔmɛ!

¹⁰ He vɔrɔwe vɔrɔwa bɛlbwa kwaraa naa, aa ɛ pɛɛpɛɛ. He bol wobɛlbwa ɡɛ haa dɛ nyin kwaraa noo, aa ɛ wepuu, dɛkalkɛŋɔ Korowii ne ya lole.

Korowii ɔma

¹¹ Belaa Korowii kpɔ o kpeɡri kah mɛ ŋɔ n bɛ ŋwɛnɛ Juda tena aa dɛ kpɔ ta teŋɛ. O ŋɔ,

¹² “Bɛ vɔrɔwa bwa nɛra aa bol a waa he be la ta no, dɛ bɛ waa baa dɛ ɔma la dɛɛ ɔmɛ.

¹³ Jemɛ kɛŋɔ Men Nemenɛ Korowii do ɡoroŋ. Menee chɛ kɛŋɔ hɛɛ ɔmɛ.

¹⁴ Menee boɡoroŋ haa jo dɛ́ dɔ he nyu. N berɔ do kɛŋɔ bwe Israel tena ne Juda tena aa lɔ naa dɛ choɡli, dɛ berɛ do kɛŋɔ bel dɛ chɔ kpa Jerusalam tena dɛ́ laɡ ba.

¹⁵ Ba ɡalɡa ɛɛ lɔ naa, dɛ́ choɡli dɛ kuuɡi. Belii dɛɛ ba ba lawa.”

¹⁶ Pa waa Korowii aa kpɔa tɛ mɛ la bwa pɛ. Marɛ o nyoa dɛ́ kpɔ cheɡ n habɔteŋra be.

¹⁷ Mɛɛ kpa Korowii waa waa bola la waa. O laa sie kpɔ Jekɔb naanar nɛɛ taraken, kɛ mɛɛ kpɔ n hwɛɡaa do Korowii nɛ.

¹⁸ N ne bechale Korowii aa tɛ mɛ laanee la. Nemenɛ Korowii waa soɡe Saayɔn Bwejen ta la ɡelɔ ya che tɛ waa aa dɛ ba ɛɛ Israel tena bini.

¹⁹ Nɛra ŋɔ he be ŋɔ hé la voɡra baa dɛ bol waa woroworo ne ajɔsaara be dɛ́ ka jemɛ waane bini naa, dɛ a dɔ mun aa? Bɔkwa waa chɛ kɛŋɔ yá ka bɔɔ lala dɛ́ jemɛ weera waa bini nɔ? Korowii yaa dɛ tomɔ laa chɛ kɛŋɔ yá kpɔ ya waa dɛɛ bil o sie naa?

²⁰ Báa teŋɛ me Mmara ne n webaɡla la ta! Dɛ ba ta ɡɛ waa la aa dɛ baɡle la bolaa, amɔ te a do kɛŋɔ baa soɡe biro ta ken.

²¹ Ba bwara ɛɛ hwaoh baa valɛ harɛ la ta, lɔr ɡe kpo ba, ba kpɔ bandia ha sie nyundua dɛ́ taah ba kooro ne Korowii baa dɛ tomɔ.

²² Ásɛ dɛ berɛ nyiŋi harɛ, baa komɛlbwaa na ka ja wahala ne ɡɛ bɔr aa bira kpirkpir dɛ do ɔma, ásɛ ba ɡbɔɡ ba ta biro tenten la ta.