Aesaya 25 - mzwDBL

Hé ɡo yela kpɛɛ Korowii

¹ N Naa Korowii, henee mɛɛ tomɛ, mɛɛ tɛɛ sɔnee dɛ́ kpɛɛre. He ɛ nyokpowa, waa haa maɡla bil saŋ la, he ɛa kasinteŋ ne.

² He ɡelɔ bwɛjena berɛ dimɡbia, he kuuɡi danjwɛkpeɡa aa bara la. Dekpeɡa hɔɔhra aa maa la, he kuuɡa ta, baa an ma kpa.

³ Anomanta, harɛre nɛra baa kpeɡa ɛɛ kpɛɛree, ásɛ bwɛjena a nɛra nyu bini aa kpeɡa duuri.

⁴ He lɛ nyaara ne nɛŋɡwɛɡra ba suna dii tɔpere ta. He dɛ tɔ ba nɛɛ dɛɛ le peukpeɡ ta, wee nyɛɡre aa, he laɡ ba dɛɛ tɛɛ ba chunchule. Nyubinikpeɡ tena do kɛŋɔ, peukpeɡ aa taa dɛ kpɔ nee dɛɛ lɔ danjwɛɛ dɛɛ kuu la,

⁵ dɛ berɛ do kɛŋɔ pua hɛŋle ɡbo harɛ ta wee waa do nyɛɡre ken. He sɔɔh ɡbɔɡa ya dɔma nyubinikpeɡ tena baa le harɛre ta aa dɛ do la nyoa, ɡɛ bam yon tɔ wee ta dɛ sɔɔh o nyoa la.

⁶ Koranar Bwa Kooro ɛɛ yerɛ harɛre nɛra bwaa ŋɔ, bá ba di kondikonjena, dɛ́ nyɔ sendɛɛɡa dɛ́ lɛ ba sie, Saayɔn Bwejen ta Jerusalam.

⁷ Gɛ bwejen nɔ taa Korowii ɛɛ ba tebinichɔɡ aa lɔ harɛre nɛra bwa nɛɛ la chɔɡa, dɛ́ laa a bwa kpɔ.

⁸ Wɛɛ le seo nee waa wola lee do kpa bwa. Nemenɛ Korowii ɛɛ fee nomɛlbwa siniiree, dɛ́ laa sihiih o nɛra aa dia kpɔ harɛ nɔ bwa ta. Korowiirii bola.

⁹ A ba ɡɛ naa, baa boloo ŋɔ, “Kasinteŋ, Korowii yaa dɛ tomɔ laanee la. Korowii yaa hwɛɡɛ o nɛɛ laanee la, o lɛ yaa. Hé ɡel ya hɛɡre ya sie lɛ, lɛɛ waa lɛ yaa la wa.”

¹⁰ Korowii ɛɛ kpɔ nɔnee tɔ Saayɔn Bwejen la taa, kɛ Moab tena te, baa tiɡri ba nɛɛ kɛŋɔ baa tiɡri kpɔɡa dɛɛ koo nabena ta la.

¹¹ Baa dɛɛ ta nɔɔra a binii, kɛŋɔ nɛn yon dɛɛ wa nee la. Korowii ɛɛ ba ba jenu baa dɛ ɛ la ne harɛɛ, hale ba takapɔ ɡɛ bɛlbwa kwaraa naa, aa won lɛɛ ba.

¹² Wɛɛ chɔɡ Moab harɛ bwɛɛre danjwɛkpeɡa ne anjaŋa bwaa, dɛ́ kuuɡa a bwa a chɔ harɛ.