Aesaya 24 - mzwDBL

Korowii ɛɛ chɔɡ harɛ nɔ ne nɛra baa lɔ o taa

¹ Hé no! Korowii dɛ ba harɛ nɔ chɔɡa o chɔ pɛɛpɛɛ. Wɛɛ lɔ nɛra baa lɔ o taa peɡre, dɛ́ chɔɡ komɛlbwa o ta.

² Gɛ webeŋkpoŋ nɔ ɛɛ pu nɛra ne ba sɔfore, bonɔɔna ne ba dɔɔranar, bonadiire ne yarawa ne banɔ la baa dɔa dɛɛ kemɛ nɛra, ne banɔ la baa laŋa kaa kemɛ, dɛ dɔɔhna ne nyaara.

³ Harɛ nɔ ɛɛ chɔɡoo dɛ́ chɔ pɛɛ, o komɛlbwa tonɛ kwaraa. Korowiirii bola.

⁴ Hwel cheɡɛ harɛ ta, o ta kwaa bwa jwalɛ, nyundua tɔɔ, harɛ som tonɔ, harɛ ta nɛnjena ɡwɛɡre.

⁵ Harɛ ta nɛra siwi ta Korowii waa la sui, ba vɛh o Mmarare dɛ chɔɡ fɔo o ne baa fɔwa ó chɔ le saŋ bɛlbwa dɛɛ la, dɛ kpɔ doŋa kah harɛ.

⁶ Anomanta, Korowii taah harɛ bwa, nɛra baa lɔ o ta la ɛɛ dɔ ba wechɔɡa kembɔree. Anomanta, wɛɛ kpɔ niinii tɛr ba deŋne dɛ́ fuuh ba, ba bini tamaa ken ka.

⁷ Daa baa kpɔ a nɔna dɛɛ ɛ sen serewɔ, dɛ ɡel sen waa do tɔɡre. Nomɛlbwa o sie fa aa dɛ lɛ sen ta la berɔ dɛɛ di suna.

⁸ Kwaa baa dɛ yiiɡa kɛŋɔ loŋa a sii do som helɔ, janjela baa dɛ hɛlɛ a ne dɛɛ lɛ sie la ɡe hel. Haa nɛra baa dɛ hɛlɛ la ɡbɔɡa no bobɛlbwa.

⁹ Baa senee nyɔ dɛ́ ɡo yela kpa, seŋkpeɡa aa somɛ a nyɔɔra nyoo kpa.

¹⁰ Bwɛjen la chɔɡɔ dɛ chɔ pɛɛ, ba karɛ dem bɛlbwa doonyoa ɡbera tɔ ba ɡbaɡba nɛ.

¹¹ Ba dɛ wi sen waa fɔɡbaahna, silɛɛ bwa tonɔ, sum ɡboo kaa. Hɛɡra toole harɛ ta kpa.

¹² Bwɛjen la chɔɡɔ, o doonyoo ɡbeni bwa kuuɡo kwaraa.

¹³ Gɛɛ aa ba ɛɛ harɛre nɛra bwa nɛ. Aa ɛo kɛŋɔ baa chaa ɔleve ne ɡrepore nɔna, a ka beŋkpoŋa saɡre baa kuuhna la.

¹⁴ Nɛra baa dɔ ba nyu la ɛɛ ɡo yela silɛɛ nee. Banɔ la baa lɔ wee cholibɔr ɛɛ baɡle jirima Korowii aa dɔa.

¹⁵ He banɔ la haa lɔ wee leebɔr pera ɡe, hé tɛ Korowii sɔn. Ekwie harɛre aa lɔ mpo ta bwa nɛra, hé kpɛɛ Korowii Israel tena aa dɛ tomɔ la.

¹⁶ Yaa no yelaa le harɛ jaɡa bwa bá ɡo yela dɛɛ kpɛɛ ŋɔ, “Hé ɡel Korowii O Wa Aa Toɡra la dɔ sɔn!” Anee n ŋɔ, “A tonɔ, a tonɔ! N dɛ ɡwaŋɛ! Banɔ la baa dɛ neɡre nɛra ta nao dɛɛ neɡre.”

¹⁷ Nomɛlbwa no n be! Ɔmewaa ne bɔɔ ne bela chɔɔ kpa heya.

¹⁸ Nomɛlbwa waa no ɔmewaa ɡbɔɡa dɛ́ chwa la, wɛɛ ka le bɔɔ binii. Nomɛlbwa ɡe waa le bɔɔ bini dɛ́ takapɔ ir la, wɛɛ le bel taa. Nyundua ɛɛ piluu nee fuɡe, kwaa harɛ aa cheɡɛ a ta ɡe yiiɡi kohona.

¹⁹ Harɛ ɛɛ peroo, wɛɛ jiɡruu dɛ́ peɡri.

²⁰ Harɛ ɛɛ yɛɛɡoo kɛŋɔ sennyɔdɛɛ ken, kɛɛ pata peu aa dɛ kpɔɔ ken. Harɛ nɛra wechɔɡa sii ba nɛ, dɛ́ ba ba ne harɛ, baa choloo baa wola ir kpa.

²¹ Awola tɔpere la, Korowii ɛɛ tɛr kwaa aa dɔ kpeɡri dɛ do nyundua, ne koranar baa dɔ kpeɡri harɛ nɔ ta deŋnee.

²² Korowii ɛɛ lawɛ koranaree pɛ do dea, kɛŋɔ ba yon lawɛ wechɔɡ-ɛɛra dɛɛ do dea la, ásɛ a ba dɛ la sie ó tɛr ba deŋne.

²³ Dɛ Koranar Bwa Kooro baa di o kora Saayɔn Bwejen ta Jerusalam aa, o kora dii jirima ɛɛ ɡwaa korobie chaahna ne wee lɔe, ásɛ bwɛjen la nomonome na dɛ́ jemɛ ɡɛ waa kana.