Aesaya 23 - mzwDBL

Korowii bol bwɛjen Taaya chɔɡa wa

¹ Waa aa chiɡ Taaya Korowii bol baɡle Aesaya chaahna ta laanee nɔ. Nɛra haa dɛ ɛ toma stiimaere aa le Taases la, hé wi! Taaya paɡrɔ. Deene kɛɛ stiimae chebɔr toole kpa. Saepros harɛ taa ɡɛ waa nɔ le ba he be.

² Nɛra haa soɡe mpo nyoa la, hé wi! He ne bonadiire baa le Sidon dɛɛ ɛ toma stiimae bini dɛ dɛɡ la, hé wi.

³ He tomɛ baala ba la mpo baŋ, dɛ ka yawɛ mea le Ijipt harɛ, dɛ ba yoɡ dɛɛ tɛ harɛre nɛra. Bela baa ɛ bona dibɔr harɛre ɡalɡa ta.

⁴ Bwɛjen Sidon tena, a chɛ kɛ sihiih kpo heya. Mpo haa kpɔ he te dawɛ o nɛɛ la taɡɛ heyaa ta dɛ ŋɔ, “N do kɛ hambara, n ta bibaala dɛɛrɛ bwa, n baa bol bihaahna wa.”

⁵ Dɛ Ijipt tena noɔ kɛŋɔ bwɛjen Taaya paɡraa, ba bwara ɛɛ yɔroo ba wi tɛɛ ba.

⁶ He nɛra haa soɡe mpo nyoa la, hé wi dɛ́ ir kaa Taases.

⁷ He bwɛsom Taaya laanee nɔ naa? Bwɛbenebene o nɛra aa joa ka so bojaŋ harɛre ta laanee nɔ naa?

⁸ Umee ɡela ɡɛ waa nɔ chiɡ Taaya ɔ? Kondɛɛɡa bwɛɛ o bonadiire aa beɡre koobii dɛ dɔ nyanyini harɛ nɔ ta bwa laanee nɔ naa?

⁹ Koranar Bwa Kooroo ɡela a chiɡ. O ɛ ɡɛ ásɛ ba jirima baa dɔa dɛɛ ɡɔɔ ba te la tonɛ, dɛ́ ba banɔ la baa dɔ nyanyini harɛ nɔ ta la ne harɛ.

¹⁰ Taases tena, he ta stiimae chuɡribɔr dɔe kpa. Anomanta, hé ka parɛ ɡɛ baa dɛ parɛ Nael Moo nyoa harɛ ta la.

¹¹ Korowii tɛr o nɔn pa mpo ta, o ir mpo nyoa koranar ɡalɡa. O bol Keenan harɛ nɛra baa soɡe mpo nyoa la wa, dɛ chɔɡ ba dekpeɡa.

¹² Korowii berɔ ŋɔ, “Bwɛjen Sidon haa wera kɛŋɔ bitolo waa wola baa jemɛ, taraken he chɔɡɔ! Silɛɛ aa lɔ he ta la bwa toole kpa. Ir dɛ́ kaa Saepros harɛ ta, hale bela ɡba haa ona dɔe ba.”

¹³ Nyiŋi Babelɔn tena harɛ na, ɡɛ nɛra nɔ fa toole wobɛlbwa bini. Asiiria tena ɡelɔ o berɛ pua hɛŋle ɡbo harɛ ola sobɔr. Ba ma konjaŋa dɛ pɛl danjwɛɛre aa bar bwɛɛre la ta, dɛ che a ta jo, dɛ kuuɡi dekpeɡa bela bwa berɛ dimɡbia.

¹⁴ Nɛra haa dɛ ɛ toma Taases stiimaere bini la, hé wi! Bwɛjen haa kpɔ sie dawɛ o ta la paɡrɔ!

¹⁵ Saŋ bɛl dɛ ba, ba soh Taaya waa bene fifraanuanɛ, aa doo kɛŋɔ kooro bene waa di harɛ nɔ ta. A ɡɛ bene nɔ habɔɔ la, aa chiɡ Taayaa ɡɛ baa bola hanjwamane yel nɔ ta la.

¹⁶ “Hanjwamane te, ba soh he wa. Kpɔ he janjela dɛ́ lɔ kohona valɛ bwɛɛ bini. Go yela kohona ásɛ baala lii he wa.”

¹⁷ Bene fifraanuanɛ habɔɔ la, Korowii ɛɛ ɡeloo Taaya tena berɛ kpɔ ba toma ja. Gɛ hanjwamane yon dɛɛ nyin suuɡa baala be la, ɡɛɛ baa ba harɛ nɔ ta harɛre ta laŋa ka di bona.

¹⁸ Ba tɔnɔ baa dɔ ne ba suuɡa baa dɔa la, baa a taa tɔ. Baa kwaaraa cheɡ á ɛ Korowii kwa, ásɛ nɛra baa dɛ tomɔ la kpɔ yawɛ kondikwaa kohona dɛ́ di dɛ́ yawɛ ba bwara laaladɛɛɡa baa dɛ nyin bwa.