Aesaya 18 - mzwDBL

Korowii bol Itiopia tena chɔɡa wa

¹ Nɛra baa lɔ Itiopia harɛ neerare baŋ le tontombɛ aa su o ta la, bá bwɛɛlɛ.

² Ba dɛ tomɛ toroma bá so dafɛɡa ɡbeni bini, dɛ́ kpɔ Nael Moo sie. Toroma haa ɡbaŋa, hé la harɛ o nɛra aa kpeɡa kohona ba bwara loɡa la be, nɛra baa do ɔma harɛ nɔ bwa ta, dɛɛ tiɡri ba dɔma nɛ neerare peɡri ba harɛ bini.

³ Nɛra haa lɔ harɛ ta bwa, hé nyiŋi kɛrɛdɛ, dɛ ba pa fraŋkaa bwe doa aa, hé nao, dɛ́ cheɡ deŋne, dɛ ba hoh bɛla aa, ásɛ he no.

⁴ Korowii ŋɔ n be ŋɔ, “Mɛɛ so nyundua dɛ́ nyiŋi jeiih ken, kɛŋɔ wee aa lea bɔr wɔrɔbe, kɛɛ mɛne aa dɛ ta wee lɔ a ta aa nyɛɡle kwaa koma saŋ la.”

⁵ Kwaa koma aa wola tele mɔɔ kwaa fee chure asɛ daa nɔna la ɛɛ swɛɛ la, Korowii ɛɛ teŋni kpala nɔna aa saɡre a ta laanee bil, ásɛ dɛ kpɔ kere kuu a kpala la le a ta.

⁶ Gɛ kpala la aa chɔa la, ɡɛɛ Itiopia lala ɛɛ ba chɔe, ásɛ jumbii aa dɛ di ola dia bɔwɔb saŋ, ásɛ kpɔɡ bini olchɔɡa ɡe ba dia waa saŋ.

⁷ A ɡɛ saŋ la, nɛra baa kpeɡa kohona ba bwara do wer, ba do ɔma harɛ nɔ bwa ta, dɛɛ tiɡri ba dɔma nɛ, neerare peɡri ba harɛ bini la, baa kpɔ koŋkɛɛlaa ba tɛ Koranar Bwa Kooro Saayɔn Bwejen ta, bela baa dɛ tomɔ.