2 Webena 6 - mzwDBL

Kooro Solomɔn bol waa baɡle Israel tena

¹ Anee Kooro Solomɔn soŋe Korowii ŋɔ, “N Naa Korowii, he ŋɔ hɛɛ so baama biŋere binii.

² N do Dedɛɛɡe tenten waa kana tɛɛ, bela haa so saŋ bɛlbwa dɛɛ la.”

³ Israel tena la bwa ta aa cheɡɛ Kooro Solomɔn sie bela la, o berɛ sie chaɡ ba, dɛ swee Korowii be andɛɛɡa tɛɛ ba.

⁴ Asɛ o ŋɔ, “Hé kpɛɛ Korowii ya Israel tena aa dɛ tomɔ! O teŋɛ nyoa waa baɡɛ n mɛɛ Kooro Devid la ta dɛ ŋɔ,

⁵ ‘Le awola tɔpere maa kpɔ n nɛra Israel tena le Ijipt harɛ ta la, n ta ŋɔe bá do Dea n sɔn ta Israel harɛ bwɛjen bɛlbwa ta dɛɛ tom mɛ bela. N ta nomɛlbwa ɡe leɛ ŋɔ wɛɛ nyiŋi n nɛra Israel tena nɛ.

⁶ Kɛ taraken te, n ŋɔ baa tom mɛ Jerusalam, ásɛ hen Kooro Devid ɡe ɛ ba nomoa dɛɛ nyiŋi ba nɛ.’ ”

⁷ Anee Kooro Solomɔn berɛ ŋɔ, “N mɛɛ Kooro Devid lii o nyu bini dɛ fee ŋɔ wɛɛ do Dea Korowii sɔn taa, ásɛ ya Israel tena ɛɛ tomɛ Korowii yaa dɛ tomɔ la bela.

⁸ Asɛ Korowii ŋɔ Kooro Devid be ŋɔ, ‘Haa dɔ liire kɛŋɔ hɛɛ do Dea n sɔn taa nɔ, he ɛ waa kɛŋɔ haa lii ɡɛ,

⁹ kɛ ane a bwa, he laa dɛ́ do Dea la, he ɡbaɡba bilolee dɛ́ do Dea la n sɔn ta.’

¹⁰ Korowii teŋɛ o nyobaɡa ta. N baa chiɡ n mɛɛ Kooro Devid naa ta, dɛ berɛ ɛ Israel kooro. N do Dea Korowii yaa dɛ tomɔ la sɔn ta ya Israel tena ɛɛ tomɔ o bini.

¹¹ Belaa n kpɔ Korowii Ne Nɛwɛnyina Fɔo Daka bwepɛle aa teɡli o bini dɛɛ baɡle Korowii ne o nɛra Israel tena fɔo baa fɔwa la ba cheɡ.”

Kooro Solomɔn wesoŋa

¹² Asɛ Kooro Solomɔn ir ka che kon baa dɛ ɛ saraha o ta dɛɛ tɛ Korowii la sie Israel tena baa chema la bwa sie, dɛ paɡri o nɔɔra nyundua soŋe Korowii.

¹³ Dɛ Kooro Solomɔn ɛ ayaawa ɛ komɛl baa dɛ che o ta Dea la dembaah. O jaŋne lɔ naɡale anuanɛ ne tama, o paɡri ɛ naɡale anuanɛ ne tama, o jaŋne dɛ́ kaa nyundua ɡe ɛ naɡale anaarɛ ne tama. O baa ɡuŋi o ta Israel nɛra la bwa sie dɛ paɡri o nɔɔra nyundua.

¹⁴ O ŋɔ, “N Naa Korowii Israel tena aa dɛ tomɛ, voɡa nɛra aa dɛ tomɛ ta kpeɡri dɔe nyundua kɛɛ harɛ kɛ hen! He dɛ teŋɛ fɔo he ne he nɛra aa fɔwa ta, dɛɛ nyin nomɛlbwa waa dɛ teŋɛ he waa ta bambile bwa ne.

¹⁵ He teŋɛ nyoa haa baɡɛ n mɛɛ Kooro Devid la ta, he ɡelɔ wobɛlbwa ɛ ɡɛ fini.

¹⁶ Name, N Naa Korowii Israel tena aa dɛ tomɛ, teŋɛ he nyoa haa baɡɛ n mɛɛ Kooro Devid waa ɛ he bonɔɔ la ta, ɡɛ haa ŋɔa ŋɔ, dɛ o bii do sie dɛɛ teŋɛ he waa ta, ɡɛ he Mmarare aa dɛ baɡle la aa, o naanar bini bɛlee dɛ́ so Israel tena kora ta he sie.

¹⁷ N Naa Korowii Israel tena aa dɛ tomɛ, ɡel wobɛlbwa haa baɡɛ n mɛɛ Kooro Devid waa ɛ he bonɔɔ nyoa la ɛ kpela.

¹⁸ N Naa Korowii, a ɛ kpela kɛŋɔ hɛɛ won ba so harɛ nɔ ta naa? Hale nyundua ɡba aa kanɛ tɛɛ kɛŋɔ he so, maa lii kɛŋɔ hɛɛ won ba so Dea waa do jeɡa maa doa tɛɛ nɔ ta.

¹⁹ Korowii maa dɛ tomɛ, he bonɔɔnee men, no n wesoŋa dɛ́ ɛ waa maa dɛ soŋe nɔ tɛ mɛ.

²⁰ Dɛɛ daah Dea nɔ chɔɔ ne jwaana, bonɔɔ he le cheɡ ŋɔ baa tomɛ. Dɛ n kpɔ sie chaɡɛ Dea nɔ ta dɛɛ soŋe naa, no n be.

²¹ No men maa ɛ he bonɔɔ wesoŋa, ne he nɛra Israel tena wesoŋa, ɡɛ saŋ báa kpɔ sie chaɡɛ Dea nɔ ta dɛɛ soŋe. Che nyundua bela haa lole dɛ́ no, ásɛ dɛ kpɔ ya wechɔɡa kɛ yaa.

²² Dɛ a balɔ kɛŋɔ nomɛl kpɔ wechɔɡa dɛɛ dawɛ o dɔŋ, asɛ a ba kɛŋɔ o ba he Dea nɔ bini, dɛ ba che saraha kon la sie dɛ ŋwɛɛraa,

²³ noa nyundua bela, dɛ́ pa bole, dɛ́ tɛr onɔ la waa di bolchɔɡe la deŋne, dɛ́ ɡel boldɛɛɡe te la.

²⁴ Dɛ ya Israel tena yaa ɛ he nɛra nɔ ɛ wechɔɡa dɛ jo he nɛ, a che a ta ya dɔma pɔ ya nɛ, ya berɛ ba he be Dea nɔ bini dɛ ba soŋe ya wechɔɡa aa,

²⁵ noa nyundua bela, ásɛ dɛ kpɔ he nɛra Israel tena wechɔɡa kɛ ba. Dɛ́ berɛ ba ba ne harɛ haa kpɔa tɛ ba ne ba naawa la ta.”

²⁶ Kooro Solomɔn berɔ ŋɔ, “Dɛ ya Israel tena yaa ɛ he nɛra ɛ wechɔɡa dɛ jo he nɛ, asɛ he koh a waa dɛ lawɛ bwaala kpoŋe, asɛ ya charɛ ya liire dɛ kpɔ sie chaɡɛ he Dea nɔ bini dɛɛ soŋe naa,

²⁷ noa nyundua bela haa soɡa la, dɛ́ kpɔ he bonɔɔna yaa ɛ he nɛra wechɔɡa kɛ yaa, dɛ́ baɡle yaa ɡɛ yaa so sodɛɛɡa. Ásɛ he nɛ bwaala harɛ haa kpɔa tɛ yaa o ɛ ya kapɛrɛ kon la ta.

²⁸ Dɛ lɔr chole harɛ la ta, kɛɛ weechɔɡa kɛɛ peuchɔɡe ta dɛ chɔɡ harɛ la kondikwa, kɛɛ tontombɛ fuɡo le harɛ la ta, kɛɛ dɔma balɔ ba lɔ tɔ he nɛra nɛɛ ba bwɛjena la bɛlbwa ta, harɛchɔɡ kɛɛ weela ba ba nɛɛ kwaraa naa,

²⁹ nɛra yaa ɛ he nɛra nɔ bini bɛlbwa koh a waa le o bambile ta, dɛ ir nɔɔra nyundua chaɡɛ he Dea nɔ dɛ soŋe naa,

³⁰ noa nyundua bela haa soɡa la, dɛ́ kpɔ kɛ ba. He ɡboo jemɛ nɛn bambile bini wa, che waa bɛlbwa aa ɛa ta dɛ́ tɛr o deŋne.

³¹ Anee dɛ́ ɡel ya ɔmɛ, dɛɛ tomɛ saŋ bɛlbwa harɛ la haa kpɔa tɛ ya naawa la ta.

³² Hɔɔhra baa wola Israel tena ɛɛ ɛɛ le bojaŋ harɛ bɛl taa, dɛ́ ba tomɛ he Dea nɔ bini, dɛkalkɛŋɔ ba no kpeɡri haa dɔa ne he sɔn ne wejena haa ɛa wa. Dɛ ba bini bɛlbwa kpɔ sie chaɡɛ he Dea nɔ dɛ soŋe naa,

³³ noa nyundua bela haa soɡa la, ásɛ dɛ ɛ wobɛlbwa baa bɔɔra dɛɛ le he be la, ásɛ harɛ nɔ ta nɛra jemɛ, dɛ́ kpɔ duure dɛɛ tɛɛ, ɡɛ Israel tena yaa ɛ he nɛra aa dɛ ɛ la. Ásɛ ba jemɛ kɛŋɔ Dea maa doa tɛɛ nɔ ɛ bela nɛra aa dɛɛ tomɛ.”

³⁴ Kooro Solomɔn berɔ ŋɔ, “Dɛ he do he nɛra bobɛlbwa ŋɔ bá ka yo ba dɔma, asɛ ba berɛ sie chaɡɛ he bwɛjen ne he Dea maa doa he sɔn ta dɛ soŋe naa,

³⁵ noa nyundua bela haa soɡa, dɛ́ ɡel ba pɔ ba dɔma nɛ.

³⁶ Dɛ ba ɛ wechɔɡa dɛ jo he nɛ, a lole kɛŋɔ nomɛlbwa toole waa wola wechɔɡa ɛ, asɛ he baah di ba nɛ, dɛ ɡel ba dɔma pɔ ba nɛ dɛ laɡ ba kaa bojaŋ kɛɛ boboraa yoo,

³⁷ hale ba lɔ ba dɔma la harɛ ta, dɛ charɛ ba liire dɛ sɛh ba wechɔɡa dɛ ŋɔ, ‘Ya ɛ wechɔɡa, dɛ ɛ waa aa wola were’.

³⁸ Dɛ ba berɔ ba he be ba bambile ne ba liire bwa ne, dɛ kpɔ sie chaɡɛ harɛ haa kpɔa tɛ ba naawa bwɛjen haa lea cheɡ, asɛ n do he Dea tɛɛ he sɔn ta nɔ naa,

³⁹ noa nyundua bela haa soɡa la, ásɛ dɛ na ba sum. Kpɔ he nɛra wechɔɡa baa ɛa bwa kɛ ba.

⁴⁰ Name, Korowii maa dɛ tomɛ, ir nyu ne, dɛ́ no ya wesoŋa yaa kpɔa dɛɛ bil he sie Dea nɔ bini.

⁴¹ N Naa Korowii, ir ba he Dea He Ne Nɛwɛnyina Fɔo Daka waa cheɡa tɛ he kpeɡri la ta, dɛ́ ba so bonɔ saŋ bɛlbwa dɛɛ la. Gel he sɔfore teŋɛ dɛɛ ɛ waa aa toɡra, ásɛ he nɛra ba wa aa toɡra bwa ɡe ɡo silɛɛ yela, he wedɛɛɡa haa ɛɛ ba la wa.

⁴² N Naa Korowii, lii he nyina haa dɔa tɛ he bonɔɔ Kooro Devid ne nyoa haa baɡɔ la wa, bɛ kooro haa leo cheɡ tɛ he te la vɛh.”