2 Webena 4 - mzwDBL

Kwaa baa kpɔa kwaa Korowii Dea bini

¹ Kooro Solomɔn ɡelɔ ba kpɔ ayaawa ɛ saraha kon. O jaŋne lɔ naɡale fifraatoro, o paɡri naɡale fifraatoro, asɛ o jaŋne dɛ́ kaa nyundua ɡe naɡale fi dɛ anue.

² Kooro Solomɔn ɡelɔ ba kpɔ ayaawa ɛ komɛl waa do ɡuleɡule kɛ loɡbajen baa yerɔ Mpo. O paɡri sie lɔ naɡale fi dɛ anue, o jaŋne dɛ́ kaa nyundua ɡe ɛ naɡale anuanɛ ne tama, asɛ he valɔ baro ɡe aa, o lɔ naɡale fifraanaarɛ dɛ anue.

³ Loɡ la nyoa dɛ bar la, ba kpɔ ayaawa ɛ kwaane aa do kɛ nabali bar o bwa. Ayaawa baa kpɔa loɡɛ Mpo la, o tenten nee ba kpɔ ɛ nabali la ɡe.

⁴ Ayaawa loɡ baa dɛ yerɔ Mpo la chɔŋɛ ayaawa waa kpɔa ɛ nabala fi dɛ anɛ nɛ, atoro sie chaɡɛ weekaŋle nyunduabɔr pera, atoro sie chaɡɛ wee cholibɔr, atoro sie chaɡɛ weekaŋle harɛbɔr, asɛ atoro ɡe sie chaɡɛ wee leebɔr. Loɡ la chɔŋɛ a nɛ a habɔɔ, asɛ a sie chaɡɛ baŋ.

⁵ Loɡ la pipiripi do kɛŋɔ nɔmpaa del, asɛ o nyoa la ɡe do kɛŋɔ numol nyoa, dɛ paɡri kɛŋɔ daa fee yon pili la ken. O won nee ɡalɔŋre kaɡboŋa fi dɛ anue lɛɛ.

⁶ Kooro Solomɔn ɡelɔ ba ɛ loɡbaala fi, dɛ kpɔ anue cheɡ Korowii Dea la weekaŋle harɛbɔr, asɛ anue ɡe che weekaŋle nyunduabɔr. Gɛ loɡbaala la binii baa yaɡle kwaa baa kpoora dɛɛ fuah la. Kɛ Mpo la te bini nee laanee sɔfore la kpɔ dɛɛ sarame nɔɔra.

⁷ O berɔ ɡel ba kpɔ suuɡaswɛm ɛ kandea daa fi, ɡɛ aa chɛ kɛŋɔ ba ɛa, dɛ kpɔ ka cheɡ Korowii Dea la bini. Anue cheɡɛ weekaŋle harɛbɔr pera, asɛ anue ɡe che weekaŋle nyunduabɔr pera.

⁸ O ɡelɔ ba ɛ teeburre fi, dɛ kpɔ cheɡ Korowii Dea bela. Anue cheɡɛ weekaŋle harɛbɔr pera, anue ɡe che weekaŋle nyunduabɔr pera. O berɔ ɡel ba kpɔ suuɡaswɛm ɛ loɡa lafa baa do nee kɛɛ chal a bini dɛ ɛ dɛɛ merɛ.

⁹ Kooro Solomɔn ɡelɔ ba ɛ dembaah Korowii Dea la bini ne o baŋ tɛ sɔfore. Gbeni aa lɔ dembaah doonyoo la baahna la, ba kpɔ ayaawa ɛ a bwara.

¹⁰ O ɡelɔ ba kpɔ Mpo la ka cheɡ Korowii Dea la weekaŋle harɛbɔr, dɛɛ bɛne wee leebɔr.

¹¹ Kooro Solomɔn ɡelɔ Hiram berɛ ɛ viine ne soofire, dɛ loɡa báa do nee kɛɛ chal a bini dɛ́ ɛ dɛɛ merɛ. Gɛɛ Hiram ɛ dɛ tonɛ Korowii Dea bela toma bwa ɡɛ waa baɡɛ Kooro Solomɔn nyoa la.

¹² Kwaa waa ɛa laanee pilare anɛ, dɛ a tɔre aa do kɛ loɡa dɛ chɔŋre a ta, dɛ ɡwine waa dia dawɛ tɔre aa chɔŋre pilare la ta,

¹³ ne kwaane aa do ɡuleɡule kɛŋɔ daa nɔna baa yera pɔmeɡranet lafraanaarɛ baa bila teŋɛ dɔŋa nɛɛ bele anɛ a do pilare la doa,

¹⁴ ne kwaa aa do kɛ torɔɡore fi baa taɡa, bɛlbwa dɔ a loɡa,

¹⁵ ne loɡbajen waa chɔŋɛ nabala fi dɛ anɛ nɛɛ baa yerɔ Mpo,

¹⁶ ne loɡa ne soofire ne bune baa kpɔa dɛɛ toh ola, dɛ anɔ la aa jaa bwa. Kwaa Kooro Solomɔn aa ɡela Hiram Abi ɛ tɛo ó kpɔ cheɡ Korowii Dea la, ayaawa aa dɛ nyɛɡlee ba kpɔ ɛa.

¹⁷ Jɔɔdan Moo deŋɡarere dor harɛ waa chɔa kaa, dɛ do Sukot ne Saretan baah ta chooh ba kpɔ, dɛ charama ɛ komɛlbwa baa dɛ nyin dɛ fora bɔɔ, asɛ dɛ kpɔ ayaawa ɛ a bini.

¹⁸ Kooro Solomɔn ta kwaa waa kpɔ ayaawa ɛa nɔ tɔɡre maɡɛ, dɛkalkɛ dɛ a warɔ kohona.

¹⁹ Kooro Solomɔn berɔ kpɔ suuɡaswɛm ɛ Korowii Dea la bini laala. Anee, suuɡaswɛm kon baa dɛ ɛ saraha o ta, ne teeburre baa kpɔ paanoo baa bil o ta Korowii sie,

²⁰ kandea daa baa kpɔ suuɡaswɛm tenten ɛa ne a kandere aa dɛ chaah Korowii Dea la bini tenten la sie ɡɛ baa baɡla,

²¹ ne kwaa baa kpɔa dɛɛ nyɛwɛ kandea ŋwɛn doŋa, ne kwaa ane kɛŋɔ daa fee, dɛ kandere. Suuɡaswɛm tenten nee o ɛ a bwa,

²² ne kwaa baa kpɔa dɛɛ fee kandea ŋwɛn la doŋa, ne loɡa baa do nee kɛɛ chal a bini dɛ ɛ dɛɛ merɛ, ne loɡa ne kwaa baa kpɔa dɛɛ buh nii, ne dea la ɡbeni baa kpɔ suuɡaswɛm ɛa, ne Boɡoroŋ Tenten bela ɡbeni, dɛ ɡbeni aa lɔ Dea la nyoa bwa.