2 Webena 3 - mzwDBL

Kooro Solomɔn Korowii Dea mae

¹ Kooro Solomɔn pa mun dɛ ma Korowii Dea la Jerusalam, Moria Bwejen ta. Dɛ Korowii fa kpɔ o te baɡle o mɛɛ Kooro Devid bela ka, Jebus te Arauna mea lɔ bɔr bela Kooro Devid fa aa yawa la.

² Kooro Solomɔn aa di kora bene anaarɛ, korobinɛɛte, tɔpera anɛ taa o pa Korowii Dea la mae mun.

³ Korowii Dea Kooro Solomɔn aa pa o mun la, o jaŋne lɔ naɡale fifraanuanaarɛ, asɛ o paɡri ɡe naɡale fifraatoro.

⁴ Pato lɔ Dea la sie, o ne Dea la bwa paɡri kɛrɛdɛ, o jaŋne lɔ naɡale fifraatoro, o jaŋne dɛ́ kaa nyundua ɡe ɛ naɡale fifraatoro. O kpɔ suuɡaswɛm tenten ɛ o bini bwa.

⁵ O kpɔ peleme daa marɛ dejen la bini danjwɛɛre ta, dɛ kpɔ suuɡaswɛm tenten ɛ a ta, dɛ ɛ kwaane kɛŋɔ bambie daa ne jɔɡrɔre dawɛ a ta.

⁶ Dɛ kpɔ bwedɛɛɡa a yoɡ aa kpeɡa ɛ Korowii Dea la bwa o do wer. Suuɡaswɛm waa yawa la le Paavaem harɛ ta.

⁷ O kpɔ suuɡaswɛm ɛ dawɛ daa baa kpɔa ɡo Korowii Dea la, ne o ɡbeni daa ne danjwɛɛre ne ɡbeni la ta, dɛ sɛh Kerobim dawɛ danjwɛɛre la ta.

⁸ Boɡoroŋ Tenten bela la, dea waa lɔ Korowii Dea bini la, o kpɔ suuɡaswɛm tenten a tɔɡre aa ɛ kilore kaɡboŋa fifraanɛ lafraanaarɛ ɛ bela bwa. O jaŋne ne Korowii Dea la paɡri bwa kɛrɛdɛ, bɛlbwa lɔ naɡale fifraatoro.

⁹ Suuɡaswɛm waa kpɔa ɛ dadowɛre tɔɡre lɔ suuɡapoŋa fifraanue, dɛ kpɔ suuɡaswɛm ɛ deene aa lɔ nyundua la bini danjwɛɛre.

¹⁰ Kooro Solomɔn ɡelɔ ba ɛ Kerobim anɛ, asɛ dɛ kpɔ suuɡaswɛm ɛ a bwara a che Boɡoroŋ Tenten bela.

¹¹ Kerobim anɛ la paɡri a kena aa, o jaŋne lɔ naɡale fifraatoro. Beŋkpoŋ keni jaŋne lɔ naɡale anuanɛ ne tama dɛɛ leɡe danjwɛɛ la, asɛ o keni bɛl la ɡe jaŋne lɔ naɡale anuanɛ ne tama dɛɛ leɡe o dɔŋ la kon.

¹² Gɛ tentenee Kerobim nɛɛte la ɡe kena do, bɛl jaŋne lɔ naɡale anuanɛ ne tama dɛɛ leɡe dea la danjwɛɛ bɛl, o keni bɛl ɡe ɛɛ leɡe o dɔŋ la kon.

¹³ Kerobim anɛ la bwa kena paɡri lɔ naɡale fifraatoro, asɛ a che a sie chaɡɛ dejen la ta bela.

¹⁴ O kpɔ jiseburum ne oŋkɔl ne onswɛm ne yapondɛɛɡe ɛ pateesan, ba sɔh Kerobim dawɛ a ta.

¹⁵ Kooro Solomɔn ɡelɔ ba ɛ pilare anɛ Dea la sie, a jaŋne dɛ́ kaa nyundua ka tama a ɛ naɡale fifraanue dɛ atoro. Ba ɛ a tɔre dawɛ a ta, bɛlbwa jaŋne dɛ́ kaa nyundua lɔ naɡale anuanɛ ne tama.

¹⁶ O sɔh jɔɡrɔre ne daa nɔna ane aa do ɡuleɡule baa yera pɔmeɡranet, ba kpɔ ayaawa lafa ɛ dawɛ a ta.

¹⁷ O ɡelɔ ba paaɡe pilare la Dea la doonyoa, asɛ bɛl do weekaŋle harɛbɔr, bɛl ɡe do weekaŋle nyunduabɔr. Weekaŋle harɛbɔr pera kon la, o pa o sɔn Jakin, asɛ weekaŋle nyundua kon la ɡe o pao Boas.