2 Webena 21 - mzwDBL

¹ Kooro Jehosafat sewɔ ka chɔ o naawa hoɡa ta Jerusalam, o naa Kooro Devid Bwɛjen ta. Asɛ o bibaa Jehoram chiɡ o naa ta, dɛ di kora.

² Juda Kooro Jehosafat bibaa Kooro Jehoram dɔ nimanar bibaala banumɛl. Banee, Asaria ne Jehiel ne Sekaria, ne Asariahu ne Maekel, dɛ Sɛfatea. Kooro Jehosafat bibaalaa a ɡɛ nɛra nɔ bwa.

³ Ba mɛɛ tɛɛ ba suuɡaswɛm ne suuɡapoŋa dɛ kwaa a yoɡ aa kpeɡa kohona, dɛ berɛ tɛ bɛlbwa Juda harɛ bwɛjena baa ma danjwɛkpeɡa bara ba ka so a ta. Kɛ Jehoram aa ɛ binomoa la, onee Kooro Jehosafat le o chiɡ o naa ta, dɛ di kora.

Juda Kooro Jehoram

⁴ Kooro Jehoram kora aa baa che kiŋkiŋ la, o kpoo o nimanar la ne Israel nomonome bane.

⁵ Kooro Jehoram di bene fifraatoro dɛ anɛ mɔɔ dɛ di kora, dɛ so Jerusalam di kora bene anuatoro.

⁶ O teŋɛ waa Israel koranar aa ɛa la ta. Dɛ o mo Kooro Ahab bihaah, anomanta, o ɛ wechɔɡa Kooro Ahab ne o dem tena aa ɛa la, dɛ jo Korowii nɛ.

⁷ Dɛ Korowii aa nyin kɛŋɔ o chɔɡ Kooro Devid dem kora, dɛkalkɛ o ne Devid fɔwɛ fɔo o baɡɔ nyoa ŋɔ o naanar ɛɛ di kora saŋ bɛlbwaa dɛɛ la.

⁸ Kooro Jehoram aa di kora saŋee Edom harɛ tena pere ba te le Juda tena nɛ, dɛ ka chiɡ ba kooro.

⁹ Belaa Kooro Jehoram kpɔ o laa sitɔɔla ne o torɔɡore la ba be. Edom tena la bar o ne o laa sitɔɔla baa dɛ nyiŋi o torɔɡore la, kɛ Kooro Jehoram ne o laa sitɔɔla iro jwaana, dɛ jo ba baah le, dɛ chwa kaa.

¹⁰ Ba le fini, Edom harɛ tena pere ba te le Juda tena lɔɡa. Gɛɛ bwɛjen Lebna tena ɡe pere ba te ɡɛ saŋ, dɛkalkɛ Kooro Jehoram vɛh Korowii o naawa aa tomɔ la.

¹¹ Hale o kwaa bɔra Juda harɛ deŋɡarere ta baa tomɛ voɡa, a che a ta Juda ne Jerusalam tena ɛ wechɔɡa, dɛ jo Korowii nɛ.

¹² Korowii keame Elaeja chwerɛ tɔn ka tɛ Kooro Jehoram ŋɔ, “Waa Korowii he naa Devid aa tomɔ aa dɛ bol laanee nɔ, ‘He ta waa he mɛɛ Kooro Jehosafat, kɛɛ he nabaa Kooro Asa aa ɛa ta teŋɛ.

¹³ He teŋɛ waa Israel koranar aa ɛa la ta, a che a ta Juda ne Jerusalam tena kaa tomɛ voɡa, ɡɛ Kooro Ahab ne banɔ la baa di kora o habɔɔ aa ɛa la. Hale he berɔ kpoo he nimanar ba waa aa wera ɡwaale la.

¹⁴ Anomanta, Korowii ɛɛ tɛr he nɛra deŋnee taeh, he bii ne he haahna, dɛ chɔɡ kwaa haa dɔa ɡe bwa.

¹⁵ He ɡbabir ɡe ɛɛ we teweelaa taeh, ka tel kɛŋɔ haa sewɛ.’ ”

¹⁶ Dɛ Filisti tena bane ne Arab tena fa soɡo bɛne bela Itiopia tena bane fa aa soɡa mpo nyoa. Korowii ɡelɔ ba ne Kooro Jehoram yo laa.

¹⁷ Ba kaa lɔ tɔ Juda tena nɛ, dɛ pa laala aa lɔ koodem ne o haahna ne bibaala kaa. O bibaa bechala Ahasia ɡboo baa ka.

¹⁸ Anɔ bwa habɔɔ la, Korowii ɡelɔ teweela baa wola won chaah ba Kooro Jehoram nɛ.

¹⁹ Weela la kpoŋo ka tel dɛ ɛ bene anɛ, asɛ o looni le o sewɛ weweele ne. O nɛra ta on koo huɡa huɡe, dɛ mar nijena, dɛ baɡle jirima baa kpɔa dɛɛ tɛo o seo la wa. Dɛ ɡɛɛ ba ɛ o naawa baa tɔ sie la.

²⁰ Kooro Jehoram aa di kora dɛ o di bene fifraatoro dɛ anɛ. O soɡe Jerusalam di kora bene anuatoro. O seo ta nomɛlbwa nɛɛ weɛ. Ba huɡo Jerusalam waa ɛ Kooro Devid Bwɛjen ta, kɛ bela baa dɛ huɡe koranar la laa.