2 Timoti 1 - mzwDBL

¹ Men Pɔɔl maa ɛ Yeesu Kristo torome la, men chwerɛ tɔn nɔ. A too Korowii tea o lee mɛ ŋɔ ń ka bol mkpa waa baɡɛ nyoa ŋɔ yá che Yeesu Kristo nɛɛ dɔ la wa.

² N bidɛɛɡe Timoti, n dɛ nae. Ń Naa Korowii ne ya Dɔɔ Yeesu Kristo chae, dɛ́ na he sum, dɛ́ tɛɛ bosɔɔhna.

Jaama ne ɡbemba doe wa

³ N dɛ jam Korowii maa dɛ tomɔ tepoŋ ne ɡɛ tenten n naawa fa aa dɛ tomɔ la he wa. N Korowii soŋa ta bwaa mɛɛ jaamo he waa chɔɔ ne jwaana.

⁴ N lii wii awola haa wia la aa, ɡɛɛ n sie che chiŋ mɛɛ nyin n ba nae ásɛ n sie lɛ kɛrɛdɛ.

⁵ N dɛ lii ɡɛ haa kpɔ kasinteŋ dɛɛ yarada Korowii ɡɛ he naa Lowis ne he nya Yunis fa aa dɛ yaradao la. N jemɔ kɛ ɡɛ ba fa aa yarada Korowii dɛ kpɔ ba te tɛo la, ba luɡe taa he den teŋɛ la.

⁶ A waa ɡela mɛɛ liiri kɛŋɔ hé ir nyu ne dɛ́ kpɔ Korowii kpeɡri awola maa kpɔ nɔn dawɛ he nɛɛ dɛ swee tɛɛ o kpɔ tɛɛ la ɛ toma,

⁷ dɛkalkɛ Korowii Doma waa kpɔa tɛ yaa la ta ɡelɛ ya ɛ ɔmeera. O ɡelɔ ya dɔ kpeɡri, dɛ dɔ dɔŋa nyina, dɛ won ya te lawa.

⁸ Bɛ ɡel a ɛɛ sihiih kɛ haa dɛ bol ya Dɔɔ Yeesu Kristo waa dɛɛ baɡle nɛra. Bɛ ɡel n ɡe waa dɔe sihiih kɛ baa koh Yeesu Kristo waa dɛ do mɛ dea la. Kɛ hé ɡe che Korowii kpeɡri waa kpɔa tɛɛ la ta, dɛɛ na waa Amanesoma la wa.

⁹ Onee lɛ yaa, dɛ le yaa ŋɔ yá ba ɛ o nɛra dɛ́ do ɡoroŋ tɛo. Ya tondɛɛɡa ɛɛ waa laa o le yaa, kɛ o liire waa dɔa tɛ yaa, ne ɡɛ waa na ya sum dɛ cha yaa waa o le yaa. Yeesu Kristo nɛɛ o che dɛ na ya sum, dɛ cha yaa dɛ le yaa mɔɔ dɛ ta komɛlbwa.

¹⁰ Kɛ tarakenii ya ta che ya Lɛɛ Yeesu Kristo bala waa ba harɛ bonɔ la ta, dɛ jemɛ ɡɛ waa nɔ. O ɡelɔ seo ta kpeɡri dɔe kpa, dɛ berɛ che Amanesoma la ta baɡle yaa ɡɛ yaa dɛ ba o mkpa aa wola jaɡa dɔe bwa dɔe.

¹¹ Amanesoma nɔ waa Korowii lee mɛ ŋɔ ń ba bol, dɛ́ ɡel n ɛ o torome ɡe dɛɛ baɡle nɛra o wa.

¹² A waa mɛɛ na waa maa dɛ na nɔ la. Sihiih ɡe aa men kpo, dɛkalkɛ n jemɛ naate maa yaradao dɛ kpɔ n te tɛo, asɛ dɛ jemɛ kɛŋɔ wɛɛ wonoo kpoŋe n ne toma waa kpɔa do n nɔn ta la sɔnɔnɔɔ ken dɛ́ ka tel o bala tɔpere.

¹³ Lawɛ kasinteŋ waa maa chaɡle la bini kiŋkiŋ, dɛ́ teŋɛ a ta, dɛ́ so Korowii yarada ne nɛnnyin yaa dɔa le pɛɛ ya ne Yeesu Kristo aa pɛa ta la ta.

¹⁴ Kpɔ Korowii Domadɛɛɡe la waa lɔ ya nɛɛ la kpeɡri lawɛ wedɛɛɡa Korowii aa kpɔa tɛɛ la bini kpoŋe kɛrɛdɛ.

¹⁵ He jemɔ kɛ nɛra baa lɔ Eesia harɛ ta bwa chwa mɛ, hale Fejelas ne Hɛmojenes ɡba jao.

¹⁶ N Naa Korowiirii dɛ na Oniseforɔs ne o dem tena sum, dɛkalkɛ dɛ on dɛɛ cha mɛ. Dɛ sihiih aa on kpo kɛ baa do mɛ dea la.

¹⁷ Waa dena tel Rom laanee o ɡaaɡe n bɔr aaa dɛ ka tel kɛ waa na mɛ.

¹⁸ Ya Dɔɔ laanee dɛ na o sum o bala tɔpere la ta. Henee jemɛ koeh damanta waa koh n nɛɛ Ɛfesos.