2 Samoɛl 6 - mzwDBL

Korowii Ne Nɛwɛnyina Fɔo Daka ne Jerusalam bala

¹ Kooro Devid berɔ boa Israel laa tena baa jemɛ yoi kɛrɛdɛ nyoa ba cheme. Ba lɔ laa tena kaɡboŋa fifraatoro.

² O ne o laa tena la iro le bwɛjen Baala baa bera dɛɛ yerɔ Kiriat Jearim waa lɔ Juda harɛ ta, dɛ́ ka kpɔ Korowii Ne Nɛwɛnyina Fɔo Daka la le bela dɛ́ kaa Jerusalam. Nemenɛ Korowii sɔn dawɛ Daka la ta, asɛ o so o kookara ta, kena kwaa baa dɛ yera Kerobim la baah ta.

³ Ba kpɔ Korowii Ne Nɛwɛnyina Fɔo Daka la le Abinadab dem deŋɡare bɛl doa, dɛ kpɔ chɔŋɛ torɔɡofale bɛl ta nabala ɛɛ tɛro. Abinadab bibaala bane baa dɛ yer ba Ussa ne Ahio, banee ba le ŋɔ baa daah torɔɡo la,

⁴ asɛ Korowii Ne Nɛwɛnyina Fɔo Daka la chɔŋɛ o ta, Ahio tɔ sie baa kaa.

⁵ Dɛ Kooro Devid ne Israel tena la bwa dɛ lɛ ba sie. Ba ɡo yela silɛɛ ne kohona, dɛɛ lɔ janjela dɛɛ hoh kalipere, dɛɛ lɔ kwaa anɛ ane baa kpɔ ayaawa ɛa, dɛɛ yiiɡi loŋa ɡe Korowii sie.

⁶ Ba valɔ ba tel Nakɔn mea lɔ bɔr, asɛ nabala aa dɛ tɛɡre Korowii Ne Nɛwɛnyina Fɔo Daka la lɔ na, asɛ Ussa ta lawɛ Korowii Fɔo Daka la kpoŋe.

⁷ Korowii baah di Ussa nɛɛ kohona, dɛkalkɛ o kono kɛ waa lawɛ Korowii Ne Nɛwɛnyina Fɔo Daka la kpoŋe la. Anomanta, Ussa sewɔ chɔ Korowii Fɔo Daka la keŋkeŋ.

⁸ Belaa Kooro Devid ɡe baah di, ɡɛ Korowii baah aa di Ussa nɛɛ dɛ tɛr o deŋne la wa. Anomanta, dɛ ba le fini ba dɛ yerɛ bela Pɛrɛs Ussa.

⁹ Kooro Devid ɔmɛ Korowii awola tɔpere dɛ ŋɔ, “Dɛ n kpɔ Korowii Ne Nɛwɛnyina Fɔo Daka nɔ ba n be bonɔ naa, ɛrɛɛ mɛɛ ba wona nyiŋi o ta nɔ?”

¹⁰ Dɛ waa berɛ dɛɛ nyin ó ba Korowii Ne Nɛwɛnyina Fɔo Daka la ne o be Jerusalam kpa. O ɡelɔ ba kpɔ ba cheɡ Ɔbɛd Edom dem, o le bwɛjen Gat.

¹¹ Korowii Ne Nɛwɛnyina Fɔo Daka la cheɡɛ Ɔbɛd Edom dem korobie atoro, asɛ Korowii swee o ne o dem tena andɛɛɡa.

¹² Kooro Devid baa no kɛŋɔ Korowii swee Ɔbɛd Edom ne o dem tena, dɛ komɛlbwa waa dɔa andɛɛɡa Korowii Ne Nɛwɛnyina Fɔo Daka la wa. Anomanta, o ne Israel tena bane la Ɔbɛd Edom dem silɛɛ ne, dɛ ka kpɔ Daka la ba Jerusalam waa ɛ Devid Bwɛjen la ta.

¹³ Baala baa cheɡɛ Daka la aa ta naɡale anumɛl la, Kooro ɡelɔ ba che asɛ o kpo nabal dɛ nao bie waa do noo kohona, dɛ ɛ saraha tɛ Korowii.

¹⁴ Dɛ Kooro Devid do sɔfo batakaarebora efɔd baa kpɔ yapondɛɛɡe nyarɔ, dɛɛ sa silɛɛ bwa ne Korowii sie o bokpeɡa bwa ne,

¹⁵ asɛ o ne Israel tena la bwa kpɔ silɛɛ lɔŋɔre dɛɛ hoh bɛle, dɛ kpɔ Daka la ba Jerusalam.

¹⁶ Baa kpɔ Korowii Ne Nɛwɛnyina Fɔo Daka la dɛɛ jo Jerusalam Devid Bwɛjen la ta la, Kooro Sɔɔl bihaah Mikal aa cheɡɛ tokoro ta dɛ na Kooro Devid o sa dɛɛ hɛɡre la, o sie ta o nɛɛ lɛɛ, dɛ nyiŋu vah.

¹⁷ Israel tena la kpɔ Korowii Ne Nɛwɛnyina Fɔo Daka la ba cheɡ o chebɔr, tɛnte dea Kooro Devid aa baŋro la bini, asɛ dɛ kpɔ saraha kwaa baa fuah, ne deŋnesɔɔhna sarahare ba Korowii sie bela.

¹⁸ Kooro Devid aa kpoo kwaa dɛ fuh ɛ sarahare ne deŋnesɔɔhna sarahare tonɛ la, o soŋe andɛɛɡa Nemenɛ Korowii be tɛ nɛra la.

¹⁹ Belaa o kpɔ paanoo ne daa nɔna ane aa hola dɛ ɛ nɔndel, dɛ ɡrepo daa nɔna aa hola nɔndel tɛ Israel haah ne baa te bɛlbwa. Asɛ bɛlbwa berɛ kaa o dem.

²⁰ A habɔɔ Kooro Devid aa kaa dem dɛ ka soŋe andɛɛɡa tɛ o dem tena la, Kooro Sɔɔl bihaah Mikal leɔ ba chemo dɛ ŋɔ, “Na ɡɛ Israel kooro aa lɛ sɔn tɛ o te fini ɡɛ. O ɛ o te kɛ ɡɛne dɛɛ sa o bitoli sie!”

²¹ Belaa Kooro Devid chaŋe ŋɔ, “Korowii siee mɛɛ sa. Onee cheɡ mɛ kora Israel harɛ ta, he mɛɛ kɛɛ he dem te bɛlbwa laa. Mɛɛ teŋɔɔ dɛɛ lɛ n sie Korowii wa, dɛɛ duuru.

²² A lole kɛŋɔ he dɛ lii kɛ n sae la ɛ sihihwa, kɛ bitoli haa dɛ bol ba waa nɔ ɛɛ kpɔ duuree tɛ mɛ.”

²³ Le ɡɛ saŋ la, Kooro Sɔɔl bihaah Mikal ta bie lolɛ kpa dɛ ba sewɛ.