2 Koranar 4 - mzwDBL

Elaesa luhaah bɛl chae

¹ Awola bɛl, luhaah bɛl o jaa fa aa ɛ Korowii keamere bane baa pɛa dɛɛ valɛ bini bɛl la Elaesa be, dɛ ka wi noo ŋɔ, “Nomoa, n jaa sewɔ. He ɡbabir jemɛ ɡɛ waa tomɛ, ne ɡɛ waa dɛ ɔmɛ Korowii ɡe. Taraken, o di nomɛl kem wɛɛ ba dɛ ba lawɛ n bibaala banɛ yoma bɔ kem.”

² Elaesa pɛɛro ŋɔ, “Baɡle kon haa dɛ nyin ń ɛ tɛɛ.” Dɛ berɛ ŋɔ, “Bɔkwaa he dɔ he dem ɔ?” Luhaah la ŋɔ, “He bitolo, n ta komɛlbwa dɔe ka ja ɔleve noo tama ane ɡbo.”

³ Elaesa ŋɔ o be ŋɔ, “La he bala be dɛ́ ka soŋe viine. Soŋa a warɛ.

⁴ Kaa he dem dɛ́ ka laa ɡbera tɔ he ne he bibaala la nɛ, ásɛ dɛ ka pa mun fuɡe noo le he noo vii bini do viine la bini. A suu waa, he kwaa cheɡ.”

⁵ Anomanta, haah la kaa dem dɛ ka laa ɡbera tɔ o ne o bibaala la nɛ ɡɛ Elaesa aa ŋɔ o be la. O bii pa viine tɛo, asɛ o fuɡe noo la dɛɛ do a bini.

⁶ Asɛ viine la bwa su laɡlaɡ ken, o ŋɔ o bie la bɛl be ŋɔ, “Kpɔ vii la bɛl ba.” Bie la ŋɔ, “Vii bɛlbwa toole kpa.” Ate, vii waa fuɡe noo dɛɛ le o bini la noo la nyoa teŋe.

⁷ Haah la berɔ la Korowii keame Elaesa be dɛ ka bol waa aa chiɡa, asɛ o ŋɔ haah la be ŋɔ, “Ka yoɡa dɛ́ kpɔ bɔ he kema, ásɛ he ne he bii di a kar.”

Elaesa ne Sunem haah bɛl waa ɛ kondɔɔh wa

⁸ Awola bɛl, Elaesa la bwɛɛ bɛl baa dɛ yerɔ Sunem ta, dɛ haah bɛl o nɔn bini aa wera lɔ bela. Haah la yerɛ Elaesa la o dem o ne o ka di kwa. Le awola tɔpere dɛɛ kaa la, Elaesa aa kpɔ bwɛɛ la ta baa kaa bwa, ɡɛɛ o la dem bela dɛ ka di kwa.

⁹ Haah la ŋɔ o jaa be ŋɔ, “N nao kɛŋɔ baa nɔ waa dɛ ba ya be saŋ bɛlbwa nɔ ɛ Korowii keame tenten.

¹⁰ Gel ya ma dejeɡa bɛl ya dem nɔ saldoa, dɛ́ ɛ mpa ne teebur ne kara dɛ kandea cheɡ o bini tɛo, ásɛ o balaa wɛɛ do o bini.” Asɛ o sɛh.

¹¹ Awola bɛl, Elaesa berɔ la Sunem dɛ teeh ka jo o dea la bini dɛɛ onɛ.

¹² O ŋɔ o bonɔɔ baa dɛ yerɔ Gehasi be ŋɔ, “La ka yerɛ Sunem haah la ba tɛ mɛ.” Asɛ o yerɔ o ba che o sie.

¹³ Anee Elaesa ŋɔ Gehasi be ŋɔ, “Ŋɔ haah nɔ be kɛŋɔ, o kaa nyin waa ba dawɛ ya nɛɛ a ɛ waa tɛ yaa. Bɔkwaa yaa ba wona ɛ tɛo wɔ? Yaa won bol o waa tɛo kooro be kɛɛ laa sitɔɔ be naa?” Haah la chaŋe ŋɔ, “N dɔ komɛlbwa maa dɛ nyin, n nɛra maa baa so ba baah ta nɔ.”

¹⁴ Anee Elaesa bɔɔ Gehasi ŋɔ, “Bɔkwaa yaa ba wona ɛ tɛo wɔ?” Gehasi ŋɔ, “Kpelaa, o ta bie dɔe, asɛ o jaa ɡe hwɛɛhrɔ.”

¹⁵ Ate, Elaesa ŋɔ Gehasi be ŋɔ, “Ŋɔ ó suuh tel n be.” Asɛ haah la ba, dɛ ba che doonyoa.

¹⁶ Elaesa ŋɔ haah la be ŋɔ, “Benanyoa saŋ nɔ dɛ he kpoŋe bibaa.” Haah la ŋɔ, “Akai, n dɔɔ. Korowii keamee hen, bɛ nyosone teŋe tɛ he tolo!”

¹⁷ Ate, haah la ba kpoŋe tea benanyoa Elaesa aa doo la, dɛ lolɛ bibaa.

¹⁸ Bie la baa kpeɡ. Awola bɛl, dɛ o mɛɛ ne nɛra dɛ komɛ mea koo ta, asɛ o la o be.

¹⁹ Kerabeŋkpoŋ bie la den do lɔŋɔ dɛ ŋɔ o mɛɛ be ŋɔ, “N nyu! N nyu dɛ wee mɛ!” Asɛ o mɛɛ ŋɔ o bonɔɔna la bɛl be ŋɔ, “Kpɔɔ ka tɛ o nya.”

²⁰ Bonɔɔ la kpɔɔ ka tɛ o nya, asɛ o lɛo so o nakpale ta, ane ŋɔ a tel webaŋa dɛ bie la sewɔ.

²¹ Haah la kpɔ bie la teeh kaa Korowii keame la dea, dɛ kpɔɔ ka bil mpa ta, dɛ laa ɡbera tɔ dɛ ɡelo bela.

²² O yerɛ o jaa dɛ ŋɔ o be ŋɔ, “N poori, ɡel bonɔɔna la bɛl kpɔ keeɡo ba, ásɛ n ɛ warane la Korowii keame Elaesa be dɛ ba taraken.”

²³ Anee o jaa la chaŋe ŋɔ, “Bɔkwa waa hɛɛ nyin he la o be fini nɔ? Korobifale Tɔpejen kɛɛ Ona Tɔpere laa fini.” O ŋɔ, “Bɛ ɡel a hae.”

²⁴ Ate, o pa kwaa pa keeɡo la ta dɛ ŋɔ o bonɔɔ la be ŋɔ, “Dɛɛ kaa warawara, nemenɛ n ŋɔ he be ŋɔ hɛɛ kaa tama tama.”

²⁵ Anomanta, ba leɔ dɛɛ kaa Korowii keame Elaesa be Kaamɛl Bwejen ta. Korowii keame la aa nao bojaŋ la, o ŋɔ o bonɔɔ Gehasi be ŋɔ, “Nyiŋi na, haah la waa le Sunem laanee dɛɛ ba la.

²⁶ Chwa ka chemo dɛ́ pɛɛro ŋɔ, ‘He wobɛlbwa wer tɛɛ naa? He jaa ne he bii leaa?’ ” Haah la ŋɔ Gehasi be ŋɔ, “Ya bwa bwara kpeɡri.”

²⁷ Haah la aa kaa pu Korowii keame la bwe la ta la, o chole Korowii keame la sie, dɛ lawɛ o nakpale kpoŋe. Asɛ Gehasi ŋɔ o ka taɡɔ ta, anee Korowii keame la ŋɔ, “Gelo, o loo kuu kohona. Korowii kpɔ waa aa puu la sɔɔh mɛ.”

²⁸ Haah la ŋɔ, “Nomoa, n soŋe bie aa? N ta he be ŋɔe ŋɔ he bɛ men neɡre, dɛ́ ɡel n kpɔ hwɛɡa ta waane ta pɛɛpɛɛ aa?”

²⁹ Anee Elaesa ŋɔ Gehasi be ŋɔ, “Gbaa he batakaare dɛ́ vɔwɛ kiriso, dɛ́ kpɔ n daŋɡbala kpoŋe, dɛ́ chwa dɛɛ kaa. He kaa pu nomɛlbwa naa, bɛ waa o be bol. Nomɛlbwa ɡe bol waa he be naa, bɛ on chaŋe. Kpɔ n daŋɡbala la ka bil bie la sie.”

³⁰ Bie la nya la ŋɔ, “N ŋwɛɛ Korowii waa lole, asɛ he ɡe do le kɛŋɔ maa kaa ɡele.” Anomanta, ba bwa teŋɛ dɔŋa nɛɛ kaa.

³¹ Dɛ Gehasi tɔ sie kaa dɛ ka kpɔ daŋɡbala la bil bie la sie, kɛ o ta wobɛlbwa ɛɛ á ba ɛ kɛŋɔ wɛɛ iruu. Anomanta, Gehasi laa berɛ dɛ ka cheme Elaesa dɛ ŋɔ o be ŋɔ, “Bie la ta ire.”

³² Elaesa tel dem bela dɛ ka jo o dea, dɛ bie la sewɔ chɔ o mpa ta.

³³ Asɛ o laa ɡbera tɔ o ne bie la nɛ, dɛ soŋe Korowii.

³⁴ O teeh mpa la dɛ ka pi bie la nɛ, dɛ kpɔ o nyoa pi o nyoa ta, o sibie pa o sibie ta, dɛ kpɔ o nɔɔra do o nɔɔra ta. Waa tɛɡra chɔ bie la nɛɛ ɡɛ la, bie la bwara pa mun dɛɛ do wɔrɔbe.

³⁵ Elaesa ir bie la nɛ, dɛ valɛ dea la bini dɛ la dɛɛ ba, dɛ ka teeh mpa la dɛ ka pi o nɛɛ ja. Asɛ bie la chweremi kera anuanɛ dɛ laa sie pili.

³⁶ Asɛ Elaesa yerɛ Gehasi ŋɔ, “Yerɛ bie la nya la.” Haah la aa bala la, o ŋɔ, “He bie laanee la, kpɔɔ kaa.”

³⁷ Asɛ o ɡuŋi Elaesa harɛ, dɛ kpɔ o bie dɛ le buse.

Nyokpowe-ɛɛla anɛ ane ɡe ja

³⁸ Lɔr baa chole Gelɡal harɛ la bwa ta, asɛ Elaesa berɛ kaa bela. O ne Korowii keamere bane baa pɛa dɛɛ valɛ cheme, asɛ o ŋɔ o bonɔɔ be ŋɔ, “Kpɔ vijen chɔŋɛ nii ta dɛ́ pile dɔr tɛ nɛra nɔ.”

³⁹ Ba bini bɛl iro jo kpɔɡ bini, dɛ ka toɡri papooni ane baa dɛ dia. Waa laŋa la, o kaa na kpɔɡ bini juɡ dɛ pa o nɔna do o yal ta. Dɛ nomɛlbwa aa a konsoo jemɛ, dɛ ba peɡra dɛ pa do vii la ne dɔr la ta.

⁴⁰ Baa doɡ dɔr la, asɛ bɛlbwa dɔ o kwaa ba pa mun dɛɛ di la, ba kpɔ takpeɡ ŋɔ, “Korowii keame, aa somɛ, ya diu yaa serewoo.”

⁴¹ Elaesa ŋɔ, “Hé nyin mendɛɛɡa tɛ mɛ.” Asɛ o kpɔ do vii la bini dɛ ŋɔ, “Kpɔ tɛɛ ba bá di.” Asɛ ba di wobɛlbwa ta ban ɛɛ.

⁴² Awola bɛl, baa bɛl le bwɛɛ baa dɛ yerɔ Baal Salisa, dɛ kpɔ meloɡla baa koma le koo ta a bena la, dɛ kpɔ ɛ paanoo fifraanɛ, dɛ kpɔ boyulwɛɛ ane ɡe ja ba tɛ Korowii keame Elaesa. Anee Elaesa ŋɔ, “Kpɔ tɛ n bala Korowii keamere baa pɛa dɛɛ valɛ nɔ bá di.”

⁴³ Anee bonɔɔ la bɔɔ ŋɔ, “Nomoa, a kan dɛ́ won tel nɛra lafa aa?” Elaesa chaŋe ŋɔ, “He te kpɔ tɛɛ ba bá di, dɛkalkɛ Korowii ŋɔ, ‘Baa diu ane kwaraa ka.’ ”

⁴⁴ Anomanta, bonɔɔ la kpɔɔ ka cheɡ ba sie, o tɛɛ ba ba di ane ka, ɡɛ Korowii aa ŋɔa la.