2 Koranar 3 - mzwDBL

Israel ne Moab tena laa yoi

¹ Kooro Jehosafat aa di kora Juda harɛ ta bene fi dɛ anuatoro taa Kooro Ahab bibaa Kooro Joram di kora Israel harɛ ta. Kooro Joram di kora bene fi dɛ anɛ, dɛ so bwɛjen Samaria.

² Kooro Joram ɛ wechɔɡa dɛ jo Korowii nɛ, kɛ dɛ a ta do kɛ anɔ la o mɛɛ ne o nya Jɛsɛbɛl aa ɛa la. O le voɡ Baal o mɛɛ aa cheɡo dɛɛ tomɔ la ne.

³ Dɛ o teŋɔ dɛɛ ɛ Nɛbat bibaa Kooro Jɛroboam wechɔɡa waa ɛa, dɛ ɡel Israel tena ɛ wechɔɡa dɛ jo Korowii nɛɛ la ane.

⁴ Dɛ Moab Kooro Mesa dɛ dɛɛ peera. Bena bɛlbwa, o yon kpɔ harɛ la ta kwaa kɛŋɔ pebiiri kaɡboŋa lafa, ne pebala pona kaɡboŋa lafa kaa tɛ Israel Kooro Joram.

⁵ Kɛ Kooro Ahab seo habɔɔ, Moab tena ɛ lwɛmkpeɡ Israel Kooro Joram nɛ.

⁶ Gɛ saŋ la, Kooro Joram le Samaria, dɛ ka boa Israel laa tena bwa nyoa.

⁷ Dɛ tomɛ toroma Juda Kooro Jehosafat be ŋɔ, “Moab kooro ɛ lwɛmkpeɡ n nɛ, hɛɛ ja n nɛɛ ń ka yoo wa aa?” Anee Kooro Jehosafat ŋɔ, “Ɔɔh, n teŋɛ he nɛ, n laa tena ne n jaɡre bwa lɔ he nɔn ta.”

⁸ Dɛ berɛ ŋɔ, “Ŋwɛnɛ besoo taa yá kpɔ dɛ́ ka yoo?” Asɛ Kooro Joram ŋɔ, “Yaa kpɔ Edom pua hɛŋle ɡbo harɛ la taa.”

⁹ Ate, Israel Kooro Joram ne Juda Kooro Jehosafat, dɛ Edom kooro kpɔ ba laa tena le. Ba valɔ kpɔ ŋwɛnɛ waa ɡoɡla ta tɔpera anuanɛ, asɛ ba nee ba tonɛ, ane toole nɛra ne ba kondɛɛra nyɔ.

¹⁰ Anee Kooro Joram ŋɔ, “Akwe! Ya na wa. Korowii kpɔ ya koranar batoro nɔ do Moab kooro ne o laa tena nɔn ta!”

¹¹ Kooro Jehosafat ŋɔ, “Korowii keame bɛl lɔ bonɔ, ásɛ ya che o nɛɛ bɔɔ le Korowii be naa?” Asɛ Israel Kooro Joram laa nomonome la bɛl ŋɔ, “Safat bibaa Elaesa lɔ bonɔ, dɛ onee dɛɛ cha Elaeja.”

¹² Kooro Jehosafat ŋɔ, “Korowii keame tentenee.” Asɛ koranar batoro la bwa la Elaesa be.

¹³ Anee Elaesa ŋɔ Israel Kooro Joram be ŋɔ, “Bɔkwa waa nee he ba dɛɛ nyin ń chae nɔ? La keamere he nya ne he mɛɛ aa la ba be la be.” Kooro Joram ŋɔ, “Akai! Korowiirii yerɛ ya koranar batoro nɔ bonɔ, dɛ kpɔ yaa ba do Moab laa tena nɔn ta.”

¹⁴ Asɛ Elaesa ŋɔ, “N ŋwɛɛ Nemenɛ Korowii waa lole mɛɛ tomɔ kɛŋɔ, dɛ Juda harɛ ta Kooro Jehosafat maa dɛ duuru waa laa aa, n fe aa he siwi taa nyiŋi.”

¹⁵ Dɛ ŋɔ, “Nyin nɛn waa jemɛ janjela lɔe ba tɛ mɛ.” Janjela te la aa dɛ lɔ la, Korowii kpeɡri ba Elaesa nɛ,

¹⁶ asɛ Elaesa ŋɔ, “Waa Korowii aa dɛ bol laanee kɛŋɔ, ‘Hé kwi bɔɔne nenabɔɔ nɔ bini bwa.

¹⁷ He nɛra batoro nɔ aa peu kɛɛ bwaalaa na, kɛ nee ɛɛ su nenabɔɔ nɔ bini bwaa, ásɛ he ne he nae ne kondɛɛra bwa dɔ nyɔ.’ ”

¹⁸ Elaesa berɔ ŋɔ, “A ɡɛ waa nɔ pwɛre Korowii be, wɛɛ berɔɔ kpɔ Moab laa tena do he nɔn ta he pɔ ba nɛ.

¹⁹ Hɛɛ yo bwɛjena baa ma danjwɛkpeɡa bara ne bwɛɛre nɛra bwaa, dɛ́ pɔ ba nɛ, dɛ́ teŋni daa aa dɛ nɔnɛ bwa ta, dɛ́ tɔɔɡe neerare aa dɛ palɛ bwa nyuune. Dɛ kpɔ bwea tɔɔɡe ba harɛdɛɛɡa bwa dɛ́ chɔɡa.”

²⁰ Tɔ aa pera chɔɔ ɡɛ saŋ ba yon dɛɛ ɛ sarahare dɛɛ tɛ Korowii la, nee den palɛ le Edom harɛ pera dɛ ba tɔ harɛ la bwa ta.

²¹ Moab tena aa noa kɛŋɔ koranar batoro la dɛ ba bá yoo ba la, ba le baa bɛlbwa waa dɛ ba wona yo, bechale ne nomonome bwa, asɛ ba ka che ba harɛ jwɛh ta nee nyoa.

²² Baa ira chɔmbibi wee le dɛɛ yaɡɛ nee la sie la, Moab tena baa lɔ ba baŋ bɛl la nao kɛŋɔ nee la aa swɛɛra kɛŋɔ chal ken.

²³ Asɛ ba ŋɔ, “Chalee! Koranar batoro la ne ba laa tena ka yoo dɛ kpoo ba te. Hé ba ya ka pa ba laala kɛŋɔ laa ta kwa!”

²⁴ Kɛ Moab tena aa ba bela Israel tena aa soɡa la, Israel tena la yoo ba ba chwa. Israel tena la chwao ti ba dɛɛ kpoo ba.

²⁵ Ba chɔɡ ba bwɛjena, asɛ Israel tena baa chwaa dɛɛ kaa la, bɛlbwa kpɔ vamtor bwe ta harɛdɛɛɡe la ta, ka tel kɛŋɔ waa sua, asɛ nenapale bɛlbwa nyu teŋe, dɛ teŋni daa aa dɛ nɔnɛ ɡe bwa ta. Ba bwɛjen baa dɛ yerɔ Kir Haresɛt ɡboo baa ka, kɛ baala baa kpoŋe vamtore baa bar bwɛjen la dɛ yoo ba.

²⁶ Moab kooro nao kɛŋɔ ba dɛ ba o nɛɛ pɔe, asɛ o kpɔ laa tena lafraanuanɛ ba kpoŋe tokobie, dɛ́ fee ka tawɛ kpɔ ba bini kaa Edom kooro be, kɛ o ta wone.

²⁷ Asɛ o lawɛ o bibanloɡle waa chiɡ o naa ta dɛ́ di kora la, dɛ kpɔɔ ɛ saraha danjwɛɛ baa maa bar bwɛjen la ta tɛ Moab harɛ voɡ. Israel laa tena la aa na ɡɛ la, ba bambile teŋo kohona ba laa berɛ kaa ba harɛ ta.