2 Koranar 24 - mzwDBL

¹ Kooro Jehoiakim kora dii saŋ, Babelɔn Kooro Nebukadnesa kpɔ o laa tena dɛ ka lɛ Juda harɛ dɔɔh, asɛ Kooro Jehoiakim do o lɔɡa bene atoro dɛɛ tomɔ. Kɛ o berɔ le Kooro Nebukadnesa habɔɔ.

² Korowii tomɛ laa tena le Babelɔn ne Siiria ne Moab, dɛ Amɔn harɛre ta ŋɔ bá ba yo Kooro Jehoiakim dɛ́ chɔɡ Juda harɛ, ɡɛ o fa aa cheɡɛ o bonɔɔna keamere nɛɛ dɛ bol ŋɔ wɛɛ ɛo la.

³ Gɛ waa nɔ ɛo ɡɛ Korowii aa ŋɔa wɛɛ ɛo dɛ́ doŋ ba le o sie, Juda tena wechɔɡa Kooro Manasɛ aa ɛa la wa

⁴ ne nɛra baa wola wobɛlbwa ɛɛ o kpoo ba warɛ Jerusalam la wa. Dɛ Korowii aa nyin kɛ ó kpɔ kɛo.

⁵ Wobɛlbwa Kooro Jehoiakim aa ɛa o kora dii saŋ bwa, ba chwera do Juda Koranar Waa Tɔne bini.

⁶ Kooro Jehoiakim sewɔ ka pu o naawa, asɛ o bibaa Jehoiachin ba chiɡ o naa ta, dɛ di kora.

⁷ Ijipt kooro ne o laa tena ta wone le o harɛ la ta kpa. Dɛ Babelɔn kooro lɛ harɛ Ijipt kooro fa aa dɔa la. O leɔ le Yufretis Moo ta ba kaa Ijipt weekaŋle nyunduabɔr jwɛh ta.

Juda Kooro Jehoiachin

⁸ Kooro Jehoiachin di bene fi dɛ anuatoro mɔɔ dɛ di kora. O soɡe Jerusalam di kora korobie atoro. O nya sɔne Nehusta, o mɛɛ ɡe sɔne Ɛl Netan, o le Jerusalam.

⁹ Kooro Jehoiachin ɡe ɛ wechɔɡa dɛ jo Korowii nɛ, ɡɛ o mɛɛ aa ɛa la.

¹⁰ O kora dii saŋee Babelɔn Kooro kpɔ o laa tena ba Jerusalam, dɛ ba chɔ baro dɛ yoo ba.

¹¹ Gɛ saŋ Kooro Nebukadnesa laa tena aa chɔa bar Jerusalam la o ɡbabir ɡe la bela,

¹² asɛ Juda harɛ Kooro Jehoiachin ne o nya ne o bonɔɔna ne o nomonome, dɛ nɛra baa lɔ koodem bwa sɛh, dɛ kpɔ ba te do Kooro Nebukadnesa lɔɡa. Kooro Nebukadnesa aa di kora bene anuatoro taa o ba lawɛ Juda Kooro Jehoiachin kaa bojaŋ Babelɔn harɛ ta.

¹³ Kooro Nebukadnesa ne Babelɔn tena la kaa jo Korowii Dea waa lɔ Jerusalam la bini ne koodem, dɛ pa suuɡaswɛm kwaa a yoɡ aa kpeɡa bwa Kooro Solomɔn aa kpɔa cheɡ bela. Dɛ ɡɛɛ Korowii fa bol ŋɔ ɡɛ waa nɔ bwa ɛɛ ɛo.

¹⁴ Kooro Nebukadnesa larawe Jerusalam nomonome ne laa tena bwa, ne nɛra baa jemɛ kwaa sɛɛh ne loɡra bwa kaa. Dɛ ba lɔ nɛra kaɡboŋa fi, ba ta nomɛlbwa ɡelɛ, nemenɛ nɛra baa nyaa kohona, dɛ do bela ɡbosoo.

¹⁵ O kpɔ Kooro Jehoiachin ne o nya ne o haahna, ne nɛra baa lɔ koodem dɛ harɛ la ta nomonome, dɛ kpɔ ba kaa bojaŋ Babelɔn harɛ ta.

¹⁶ Babelɔn kooro ɡelɔ ba kpɔ laa tena kaɡboŋa banuanɛ ba bwa aa kpeɡa dɛ́ won yo laa, ne nɛra kaɡboŋ baa jemɛ kwaa sɛɛh ne kwaa loɡa, dɛ kpɔ ba kaa bojaŋ Babelɔn harɛ ta.

¹⁷ Babelɔn Kooro Nebukadnesa cheɡ Kooro Jehoiachin mɛɛ nime baa dɛ yerɔ Matania kooro, o so Kooro Jehoiachin buɡ ta, dɛ ɛ Juda harɛ kooro. Dɛ beɡre Matania sɔn Sedekia.

Juda Kooro Sedekia

¹⁸ Kooro Sedekia di bene fifraanɛ dɛ beŋkpoŋ dɛ di kora. O soɡe Jerusalam di kora bene fi dɛ beŋkpoŋ. O nya sɔne Hamutal, Jeremia bihaahnee o le Lebna.

¹⁹ Kooro Sedekia ɛ wechɔɡa dɛ jo Korowii nɛ, ɡɛ Kooro Jehoiakim aa ɛa la.

²⁰ Korowii baah di Jerusalam ne Juda harɛ nɛra nɛɛ kohona, anomanta, o doŋ ba le o sie. Kooro Sedekia baa ɛ Babelɔn kooro deŋnekpeɡ.