2 Koranar 20 - mzwDBL

Kooro Hɛsɛkea weela wa

¹ Aa ba dɛ la sie la, weela lɔ Kooro Hɛsɛkea wɛɛ ba sewa. Asɛ Emɔɔs bibaa Korowii keame Aesaya la o be dɛ ka ŋɔ, “Waa Korowii aa dɛ bol laanee kɛŋɔ, ɛ he dem ne he wobɛlbwa kɛrɛdɛ, dɛkalkɛŋɔ haa he weela nɔ taa ir, hɛɛ chɔ he banɔn taa!”

² Ate, Kooro Hɛsɛkea berɛ o sie chaɡɛ danjwɛ, dɛ soŋe Korowii ŋɔ,

³ “N Naa Korowii, n poori, lii ɡɛ maa ta tea bwa tɛɛ, dɛ tomɛ kasinteŋ ne, dɛ ɛ waa haa dɛ nyin.” Dɛ wi lokua ne kohona.

⁴ Mɔɔ Korowii keame Aesaya aa le koodem dembaah bela la, Korowii ŋɔ o be ŋɔ,

⁵ ó berɛ dɛ́ ka ŋɔ Kooro Hɛsɛkea waa dɛ tɔ o nɛra sie be ŋɔ, “Men Korowii he nabaa Devid fa aa tomɔ la, n no he wesoŋa, dɛ na siniire aa dɛ yɔɔre. Mɛɛ chaeh, asɛ tɔpetooro wee la he ir, dɛ́ la men Korowii Dea.

⁶ Mɛɛ kpɔ bene fi dɛ anuee ja he mkpa ta. Mɛɛ lɛ he ne bwɛjen Jerusalam tenaa, ásɛ Asiiria koojen bɛ won pɔ he nɛ. Mɛɛ che bwɛjen nɔ habɔɔ, dɛ́ tɔɔ ɡbemɡbe n jirima maa dɔa wa, ne waa maa baɡɛ n bonɔɔ Devid la wa.”

⁷ Ate, Aesaya ŋɔ Kooro Hɛsɛkea bonɔɔna be ŋɔ, “Hé chaa fiɡ nɔna, dɛ́ nama tɔ o ɔr la ta, wɛɛ ɡbaŋroo.”

⁸ Dɛ Kooro Hɛsɛkea fa bɔɔ Aesaya kɛŋɔ, “Bɔkwaa Korowii ɛɛ ba ɡela ń na, dɛ́ jemɛ kɛŋɔ wɛɛ chaah mɛɛ, ásɛ a tɔpetooro wee ń la Korowii Dea ɔ?”

⁹ Anee Aesaya chaŋe ŋɔ, “Waa Korowii aa dɛ ba ɛɛ he jemɛ laanee kɛŋɔ, wɛɛ ɛ waa waa baɡɛ nyoa laanee. He dɛ nyin wee chunchule kaa sie ka dawɛ kwaa baa cheɡɛ a ta teeh dɛɛ jo dea la fite ta, kɛɛ o kaa habɔɔ ka dawɛ kwaa baa cheɡɛ a ta teeh dɛɛ jo la fite ta nɔ?”

¹⁰ Kooro Hɛsɛkea ŋɔ, “A pwɛre kɛŋɔ chunchule kaa sie, ka dawɛ kwaa baa cheɡɛ a ta teeh dɛɛ jo dea la ta. Gel chunchule la kaa habɔɔ, ka dawɛ kwaa baa cheɡɛ a ta dɛɛ jo dea la fite ta.”

¹¹ Ate, Korowii keame Aesaya soŋe Korowii, asɛ o ɡel chunchule la kaa habɔɔ, dɛ ka dawɛ Kooro Ahas kwaa waa cheɡɛ a ta teeh dɛɛ jo dea la ta.

Toroma bane baa le Babelɔn harɛ ta

¹² A ɡɛ saŋ dɛ Babelɔn harɛ ta kooro bɛl sɔne Mɛrɔdak Baladan, o mɛɛ sɔne Kooro Baladan. Kooro Mɛrɔdak Baladan aa no Kooro Hɛsɛkea weela waa la, o chwerɛ tɔne dɛ kpɔ koŋkɛɛla ja tomɛ ŋɔ, bá kpɔ ka tɛo.

¹³ Kooro Hɛsɛkea lɛ toroma la, asɛ dɛ kpɔ o kara mun kwaa aa lɔ dem, suuɡapoŋa ne suuɡaswɛm, ne konsɔɔhsoma ne nodɛɛɡa, dɛ o dɔmkwaa ne bela waa dɛ cheɡa bwa baɡ ba. Komɛlbwa toole dɛ do o dem kɛɛ harɛ la ta waa wola ban baɡlɛ.

¹⁴ Ate, Korowii keame Aesaya la ka bɔɔ Kooro Hɛsɛkea ŋɔ, “Leperaa ɡɛ nɛra nɔ leɔ? Dɛ ba amaneɛ ɔ?” Anee Kooro Hɛsɛkea ŋɔ, “Ba le bojaŋ harɛ bɛl baa dɛ yerɔ Babelɔn ta.”

¹⁵ Aesaya pɛɛro ŋɔ, “Bɔkwaa ba na he koodem ɔ?” Kooro Hɛsɛkea ŋɔ, “Ba na komɛlbwa aa lɔ n koodem. Komɛlbwa toole n kara mun maa wola kpɔe baɡ ba.”

¹⁶ Aesaya ŋɔ Kooro Hɛsɛkea be ŋɔ, “Nemenɛ Korowii ŋɔ,

¹⁷ tɔpere bɛl dɛ ba, ásɛ nɛra ba kpɔ komɛlbwa aa lɔ he koodem ne kwaa he naawa aa nyina cheɡ ba le fini nɔ kaa Babelɔn harɛ ta, komɛlbwa aa wola ka.

¹⁸ Baa larawe he ɡbaɡba naanar la banee kaa, dɛ́ ka fɔɡɛ ba lure, bá do Babelɔn koodem dɛɛ tomɛ.”

¹⁹ Kooro Hɛsɛkea chaŋe ŋɔ, “Waa haa ɡela n no le Korowii be nɔ wer.” Dɛkalkɛŋɔ, o liiro kɛ wɛɛ dɔ deŋnesɔɔhna o kora che kɛrɛdɛ o saŋ.

Kooro Hɛsɛkea kora dii jaɡa

²⁰ Waa aa kaa ne anɔ la Kooro Hɛsɛkea aa wona ɛ, ne tam waa kwia, dɛ kwi bɔɔ nee kpɔ o bini dɛɛ ba Jerusalam la, ba chwera do Juda Koranar Waa Tɔne bini.

²¹ Kooro Hɛsɛkea sewɔ ka pu o naawa, asɛ o bibaa Manasɛ ba chiɡ o naa ta, dɛ di kora.