1 Tesalonika 1 - mzwDBL

¹ Men Pɔɔl ne Silas ne Timotii chwerɛ tɔn nɔ dɛɛ tɛ he nɛra haa ɛ asɔre tena dɛ do Tesalonika dɛɛ tomɛ N Naa Korowii ne ya Dɔɔ Yeesu Kristo la. Kórowii cha heya, dɛ tɛ heyaa bosɔɔhna.

Tesalonika asɔre tena yarada ne ba we-ɛɛla

² Ya dɛ jam Korowii tɔpere bɛlbwa dɛ yon dɛɛ yerɛ he sɔna ya Korowii soŋa bini.

³ Gɛɛ tɔpere bɛlbwa ɡe yaa bol N Naa Korowii waa bera ɛ ya Mɛɛ la be he yarada haa yaradao dɛ won kpɔ dɛɛ ɛ o toma, ne he nyina haa dɛ nyinu dɛ ɡel he sie beɡre o toma ta, ne hwɛɡa haa dɔa ya Dɔɔ Yeesu Kristo be dɛ won dɛɛ lawɛ bambile wobɛlbwa ta la.

⁴ Yabala, ya jemɔ kɛ Korowii dɛ nyin heya, dɛ le heyaa ŋɔ hé ba ɛ o bii,

⁵ dɛkalkɛŋɔ Amanesoma la yaa baɡle heyaa la, wobol ɡbo ta laa a che dɛ ba he be. Awola haa no waa la, Korowii kpeɡri la ne o Domadɛɛɡe la ɡelɔ he jemɛ kɛŋɔ a ɛ kpela. He jemɛ ɡɛ yaa koh he waa dɛ kpoŋe ya te ɡɛ saŋ ya ne haa soɡa la.

⁶ Hé nyiŋi yaa dɛ́ kpɔ ya ne ya Dɔɔ da la. Haa no Korowii Waa la dɛ yaradaa la, he na wahala ɡa, kɛ he wono lɛ Korowii Waa la silɛɛ aa le Korowii Domadɛɛɡe la be ne.

⁷ Gɛ haa ɛa laanee chɔa dɛ tɛ nɛra baa yaradaa Makidoonia harɛ ne Akaya harɛ bwa, baa nyiŋi dɛɛ tomɛ Korowii.

⁸ He bee ya Dɔɔ la waa che dɛ perɛ baah bela bwa. Bela tena ɡbo laa noa, kɛ yarada haa dɛ yarada Korowii la tel bobɛlbwa. Anomanta, a ta chɛ kɛŋɔ yá bol he waa nɛra be kpa.

⁹ Ba ɡbabir dɛ bol he wa, ɡɛ haa kpoŋe yaa dɛ no ya be, dɛ charɛ he liire le voɡa aa wola mkpa dɔe la ta dɛɛ tomɛ Korowii waa lole saŋ bɛlbwa dɛ dɔ mkpa la,

¹⁰ dɛ so kpa o Bie Yeesu waa dɛ ba nyundua lee dɛ ba la. Onee o chum seo ta la. Onee lɛ yaa le Korowii bandia waa dɛ ba bala la ta.