1 Samoɛl 26 - mzwDBL

Devid sune Kooro Sɔɔl nɛɛ ja

¹ Baala bane le bwɛjen Sif ta, dɛ la Kooro Sɔɔl be Gebea ka ŋɔ Devid sɔh Hakila Bwejen o sie aa chaɡɛ Juda pua hɛŋle ɡbo harɛ ta la nyoa.

² Anomanta, Kooro Sɔɔl le Israel laa tena kaɡboŋa batoro baa jemɛ yoi Sif pua hɛŋle ɡbo harɛ ta bela dɛ́ ka ɡaaɡe Devid bɔr.

³ Kooro Sɔɔl baŋre o tɛnte dea Hakila Bwejen ŋwɛnɛ nyoa, o sie chaɡɛ Jesimɔn pua hɛŋle ɡbo harɛ bela Devid aa soɡa la. Waa baa no kɛ Kooro Sɔɔl teŋɛ o nɛɛ dɛɛ nyin o bɔr la,

⁴ o tomɛ nɛra ba ka sɔh nyiŋi dɛ na kɛŋɔ Kooro Sɔɔl lɔ bela kpela.

⁵ Ate, Devid kpɔ o te warane, dɛ kaa bela Kooro Sɔɔl ne Nɛr bibaa Abna waa ɛ Kooro Sɔɔl laa tena nomoa aa chɔa. Dɛ Kooro Sɔɔl chɔ tɛnte dea bini bela baa baŋre ba tɛnte deene la baah ta, asɛ laa tena chɔ ane bini, dɛ baro.

⁶ Anee Devid bɔɔ Ahemɛlɛk waa ɛ Hiti te, ne Seruya bibaa Abisae waa ɛ Joab dɔɔ la ŋɔ, “He bini umee dɛ́ ja n nɛɛ la Kooro Sɔɔl be bela baa baŋre ba tɛnte deene dɛ so laɔ?” Asɛ Abisae ŋɔ, “N ne hɛɛ lao.”

⁷ Anomanta, Devid ne Abisae la Kooro Sɔɔl ne o laa tena be jwaana, dɛ Kooro Sɔɔl chɔ dom bela baa soɡa la baah ta, asɛ lampea pa o nyu bɔr pera. Asɛ Abna ne laa tena la ɡe chɔ baro.

⁸ Abisae den ŋɔ Devid be ŋɔ, “Korowii kpɔ he dɔm do he nɔn ta fini. Gel n kpɔ o ɡbaɡba lampea nɔ yaɡɔ marɛ harɛ kera beŋkpoŋ ɡbo, kera anɛ kwaraa laa.”

⁹ Kɛ Devid ŋɔ, “Bɛ on kpo! Nomɛlbwa waa kpo nɛn Korowii aa fuɡe noo do o nyu ta dɛ cheɡo kora ta la ɛɛ di bolchɔɡee.”

¹⁰ Dɛ berɛ ŋwɛɛ ŋɔ, “Korowii aa lole nɔ, dɛ o seo tɔpere ta tele o sewɛ, kɛɛ o sewɛ laa ta naa, Korowii ɡbabirii dɛ́ kpoo.

¹¹ Korowii ɛɛ la ane bojaŋ kɛ n kpo nɛn Korowii aa fuɡe noo do o nyu ta dɛ cheɡo kora ta. Gel ya kpɔ o lampea ne loŋ waa dɛ do nee o bini a che o nyu bɔr nɔ kaa.”

¹² Anomanta, Devid kpɔ lampea ne loŋ waa dɛ do nee o bini o che o nyu bɔr la, asɛ ba kaa. Nomɛlbwa ta nae, bɛlbwa ɡe ta harɛ. Ba bwa chɔɔ ka ɡarɛ dɛkalkɛ Korowiirii ɡela a ba ɡɛ.

¹³ Belaa Devid ɡale kaa fɛlembɔjen la baŋ bɛl dɛ ka chɔŋɛ deŋɡare la ta, o ne ba baah do jaŋne.

¹⁴ Asɛ dɛ yerɛ laa tena ne Nɛr bibaa Abna ŋɔ, “Haa men chaŋe aa, Abna?” Ate, Abna chaŋe ŋɔ, “Umee kooro chɔ wɛɛ doo ɡbɔɡa ɡɛ nɔɔ?”

¹⁵ Devid chaŋe ŋɔ, “Laa nomonjen laa hen Israel harɛ ta naa? Bɔkwa waa bala he ta kooro waa ɛ he nomoa la daahnɛ ɔ? A ta biɡre bɛlbwa nomɛl ba jo ŋɔ ó fe den ba kpo kooro.

¹⁶ He ta he toma ɛɛ, Abna. N ŋwɛɛ Korowii waa lole saŋ bɛlbwa kɛŋɔ, a chɛ kɛ he bwa sewɛ, dɛkalkɛŋɔ he ta he dɔɔ Korowii aa cheɡo kora ta daahnɛ. Leperaa kooro lampea ne loŋ waa dɛ do nee o bini a che o nyu bɔr la dɔɔ?”

¹⁷ Kooro Sɔɔl jemɛ Devid taa dɛ ŋɔ, “Henee nɔ naa, n bibaa Devid?” Asɛ Devid chaŋe ŋɔ, “Menee, n naa kooro.”

¹⁸ Dɛ berɛ ŋɔ, “N dɔɔ, ɛrɛɛ n ɛɛ hɛɛ ti men maa ɛ he bonɔɔ ken te nɔ? Bɔkwa waa n ɛɔ? N ɛ wechɔɡa ane kɛɛ?

¹⁹ N naa kooro, no men maa ɛ he bonɔɔ waa maa dɛ bol. Dɛ Korowiirii ɡela he fome siwi pa n nɛ aa, mɛɛ kpɔ saraha kwaa tɛo. Kɛ dɛ nɛwɛnyinii dɛɛ ɛ aa, Korowii nyotaahna laɡ ba. Dɛkalkɛ, ba doŋ mɛ le Korowii be o harɛ ta, n ka do harɛfale baa dɛ tomɛ voɡa ɡbo o ta.

²⁰ Bɛ ɡel ba kpo mɛ harɛfale ta, maa wola Korowii sie do. Ɛrɛɛ chɛ kɛŋɔ Israel kooro le dɛ baa kpaah men maa do kɛŋɔ nyuhɔl kɛɛ jumbie nɔɔ?”

²¹ Anee Kooro Sɔɔl ŋɔ, “N bie Devid, n ɛ wechɔɡa, berɛ ba n be. Maa hen kpo kpa, dɛkalkɛ he dɔɔ mɛ he ta men kpoe jwaana nɔ ne. N ɛ ɡɛnewaa kohona ne waa aa wola were.”

²² Asɛ Devid chaŋe ŋɔ, “N naa kooro, he lampea laanee la, ɡel he bonɔɔna nɔ bini bɛl ba, dɛ́ ba lɛ.

²³ Nɛra baa dɛ di kasinteŋ Korowii waa ta ba waa toɡre la, Korowii dɛ bɔ ba kem. O kpɔe do n nɔn ta fini, kɛ waa lee cheɡ kora ta nomanta, n ta hen kpoe.

²⁴ Gɛ maa sune he nɛɛ n ta hen kpoe fini nɔ, Korowii cha mɛ ɡɛ tenten, dɛ́ lɛɛ mɛ le n wenaale bwa ta.”

²⁵ Ate, Kooro Sɔɔl ŋɔ Devid be ŋɔ, “N bie, Korowii swee andɛɛɡa tɛɛ, ásɛ wobɛlbwa haa ɛ la, á chiɡi kɛrɛdɛ.” Asɛ Devid chiɡ ŋwɛnɛ ta kaa, Kooro Sɔɔl ɡe berɛ kaa o dem.