1 Samoɛl 25 - mzwDBL

Devid ne Nabal dɛ Abiɡel

¹ Samoɛl baa sewɛ, asɛ Israel tena bwa cheme dɛ wiu, dɛ huɡo Rama bela waa soɡa. Asɛ Devid berɛ kaa Mayɔn pua hɛŋle ɡbo harɛ ta.

² Dɛ baa bɛl lɔ bela dɛ bɛne bwɛɛ bɛl baa dɛ yerɔ Kaamɛl dɛ dɔ suuɡa ne harɛ kohona. O berɔ dɔ boohna kaɡboŋ, dɛ peera ɡe kaɡboŋa atoro dɛɛ fonɛ a pona Kaamɛl bela.

³ O sɔne Nabal asɛ o haah ɡe sɔne Abiɡel. Dɛ o haah la ɛ wejereme, dɛ do wer tolo. Kɛ o jaa waa le Kaleb lolanar bini la te, dɛ o nyu bini kpeɡri, o baah ɡe ɛɛ di warawara.

⁴ Devid taa lɔ pua hɛŋle ɡbo harɛ ta bela la, o noɔ kɛŋɔ Nabal dɛ fonɛ o peera pona bela.

⁵ Anomanta, o tomɛ bonɔɔna fi dɛ ŋɔ ba be ŋɔ, “Hé la Nabal be Kaamɛl dɛ́ ka chɔɔro ba tɛ mɛ.

⁶ Hé ŋɔ o be ŋɔ, ‘Kórowii tɛɛ mkpajaŋ! Ó tɛ he ne he dem tena ne he komɛlbwa haa dɔa bokpeɡa!

⁷ N noɔ taraken kɛŋɔ peera pona fona saŋee la. He peteɡra fa aa lɔ ya be la, ya ta ban chɔɡre ɛɛ, ba komɛlbwa ɡe ta nyoɡrɛ ɡɛ saŋ baa lɔ Kaamɛl la bwa.

⁸ Bɔɔ he bonɔɔna la, bá bol waa aa lole. Anomanta, nyiŋi n bonɔɔna kɛrɛdɛ tɔpejen dii saŋ nɔ ta. N dɛ soŋe, tɛ he bonɔɔna ne he bibaa Devid kon te bɛlbwa haa dɔa.’ ”

⁹ Devid toroma la laŋɔ dɛ ka bol waa la Nabal be Devid sɔn ta. Asɛ ba so tama.

¹⁰ Belaa Nabal chaŋ ba ŋɔ, “Umee a ɡɛ Devid nɔɔ, Jese bie ɛ? O ɛ bonɔɔna baa chwaa dɛɛ le ba nomonome be tɔpera anɛ nɔ bini bɛl kɛɛ?

¹¹ Ɛrɛɛ chɛ kɛ ń kpɔ n paanoo ne n ne, dɛ ola maa kpoora tɛ nɛra baa dɛ fonɛ n peera tɛ nɛra maa wola ba leebɔr jemɔɔ?”

¹² Ate, Devid bonɔɔna la berɛ ba o be, dɛ ba bol wobɛlbwa Nabal aa bola la.

¹³ Devid ŋɔ o nɛra la be ŋɔ, “Hé kpɔ he keri.” Asɛ ba kpɔ ba keri sɛɡle ba te, Devid ɡe kpɔ o kon. Laa tena dɛ ɛ lafraanaarɛɛ ja Devid nɛ o ne ba kaa, asɛ lafraanɛ te ka ba ne nɛra baa dɛ nyiŋi laala ta la be.

¹⁴ Nabal bonɔɔna la bɛl ŋɔ o haah Abiɡel be ŋɔ, “Devid tomɛ toroma le pua hɛŋle ɡbo harɛ ta ŋɔ bá ba chɔɔ ya nomoa tɛo, kɛ o chɛɡ ba.

¹⁵ Kɛ nɛra la ɛ nɛndɛɛɡa, ba ta yaa wechɔɡa bɛlbwa ɛɛ, saŋ bɛlbwa dɛ ya ne ba lɔ kpɔɡ bini, ba ta ya komɛlbwa ɡe ŋwɛɛ.

¹⁶ Ba daah yaa webaŋa ne jwaana, saŋ bɛlbwaa ya ja ba nɛɛ dɛɛ teɡɛ ya peera.

¹⁷ Kpɔ ɡɛ waa nɔ liire, dɛ́ na ɡɛ haa dɛ ba wona ɛ, dɛkalkɛŋɔ wenaale dɛ ba n nomoa Nabal ne o dem tena bwa nɛ. O bambile kpeɡri kɛŋɔ nɛn bol waa ó no a mun.”

¹⁸ Abiɡel ta hɛlɛ dɛ den kpɔ paanoo lafraanɛ, ne sen oltɔn pure dela anɛ ne peera anue ola baa hala, ne mea baa hala dɛ ɛ baaɡere anue, ne daa nɔna aa hola dɛ ɛ lakaja anue, dɛ fiɡ nɔna dɛ ɛ nɔndela lafraanɛ dɛ kpɔa choɡ keeɡore.

¹⁹ Ate, o ŋɔ o bonɔɔna la be ŋɔ, “Hé tɔ sie, n ɡe teŋɔ dɛɛ ba.” Kɛ o ta o jaa Nabal be bolɛ a wa.

²⁰ Abiɡel soɡe keeɡo ta dɛɛ teeh deŋɡare bɛl dɛ den cheme Devid ne o laa tena ba tu dɛɛ ba o be.

²¹ Dɛ Devid fa liiro ŋɔ, “Bɔkwa waa bala n nyiŋi a ɡɛ nɛn nɔ kwaa ta tɛo pua hɛŋle ɡbo harɛ ta bela kwaraa te nɔ? N ta o komɛlbwa ŋwɛɛ ɡe. N kembɔree chɛɡa nɔ naa?

²² Bɔr ne chaahna dɛ n ta baala nɔ bwa kpooraa, Korowii kpo mɛ!”

²³ Abiɡel aa na Devid la, o ɛ warane dɛ tu o keeɡo ta, dɛ ka ɡuŋu dɛ kpɔ sie pi harɛ,

²⁴ dɛ ŋɔ, “N dɔɔ, ɡel wechɔɡa la dawɛ n ɡbo nɛ. N dɛ soŋe, tɛ men maa ɛ he tolo ŋwɛnɛ n won bol waa he be.

²⁵ N dɔɔ, laa sie kpɔ nyubinikpeɡ te Nabal nɔ nɛ. O deno do kɛŋɔ o sɔn aa doa baa yerɔ ɡɛne nɔ. Kɛ men maa ɛ he tolo te, n ta bonɔɔna haa tom ba la nae.

²⁶ Taraken, Korowii aa lɛɛ le nɛra kpoora dɛ tɔ wel ta nɔ, n ŋwɛɛ Korowii waa lole saŋ bɛlbwa asɛ he ɡe so le nɔ, ó ɡel he dɔma baa dɛ nyini dɛ́ kpo la do kɛŋɔ Nabal ken.

²⁷ Koŋkɛɛla he tolo aa ba a ne nɔ, n dɛ soŋe kɛ he lɛa dɛ́ kpɔ tɛ he bonɔɔna baa dɛ teŋɛ he nɛɛ la.

²⁸ N poori, kpɔ he tolo wechɔɡa kɛo. Korowii ɛɛ ɡeloo n dɔɔ kora che saŋ bɛlbwa dɛɛ la, dɛkalkɛ Korowii laalee hɛɛ yo. Bɛ ɡel wechɔɡa bɛlbwa do he waa bini he soɡa bini bwa.

²⁹ Hale dɛ nomɛl dɛ nyini dɛ́ kpo kwara naa, Korowii haa dɛ tomɔ la ɛɛ kpɔ nɔnee tɔ he nɛ, kɛŋɔ nomɛl aa dɛ nyiŋi kondɛɛɡe bɛl o waa hiah la ken. Kɛ he dɔma te, wɛɛ viɡ baa kɛŋɔ vamtor bwea ken.

³⁰ Dɛ Korowii ɛ wedɛɛɡe bɛlbwa waa baɡɛ nyoa la dɛ cheɡe kora ta Israel harɛ ta naa,

³¹ he liire ɛɛ ba harɛɛ, ásɛ o baa swee andɛɛɡa tɛɛ naa, haa nɛra baa wola wobɛlbwa ɛɛ kpoo bɔ kem, dɛ́ di a bolchɔɡe kpa. N dɔɔ, n dɛ soŋe bɛ n waa soh.”

³² Devid ŋɔ Abiɡel be ŋɔ, “Korowii Israel tena aa dɛ tomɔ la chɛ jam, kɛŋɔ waa tomɛ fini he ba chem mɛ nɔ.

³³ Korowii jam, he liidɛɛɡa ne waa haa ɛa tɛ mɛ fini dɛ lɛɛ mɛ le nɛŋkpoa ta, n fee ka kpoo nɛra baa wola waane ɛɛ nɔ.

³⁴ Korowii Israel tena aa dɛ tomɔ laanee ɡela n ta hen wobɛlbwa ɛɛ la. Kɛ n ŋwɛɛrɔ kɛŋɔ dɛ he fe ta warane ɛɛ dɛ ba chem mɛ naa, tɔɔ ne pera Nabal dem baa te bɛlbwa fe aa ka.”

³⁵ Belaa Devid sɛh, dɛ lɛ kwaa waa kpɔa ba tɛo la dɛ ŋɔ, “Berɛ kaa dem deŋnesɔɔhna ne, mɛɛ ɛ waa haa dɛ nyin laanee tɛɛ.”

³⁶ Abiɡel aa la Nabal be la, dɛ o lɔ o dem dɛɛ di kondikonjena dɛɛ lɛ o sie kɛŋɔ kooro ken. Dɛ o dɛɛrɔ o sie lɛ kɛrɛdɛ. Anomanta, o ta wobɛlbwa o be bolɛ ka tel kɛ tɔ aa pera chɔɔ.

³⁷ Tɔ aa pera chɔɔ sen la le o sie la, o haah la bol waa aa chiɡa la bwa o be. O bambile teŋo kohona, asɛ o beŋri chɔ.

³⁸ Dɛ ɛ tɔpera fi habɔɔ la, Korowii ɡelɔ Nabal sewɛ.

³⁹ Devid baa no kɛ Nabal sewɔ, asɛ o ŋɔ, “Korowii jam kɛŋɔ waa bɔ Nabal kem n chɛɡa waa chɛɡ mɛ wa, asɛ o ta ɡelɛ men maa ɛ o bonɔɔ ɛ wechɔɡa bɛlbwa nɔ. Korowiirii tɛr o deŋne o wechɔɡa waa ɛa waa la.” Asɛ Devid tomɛ ba ka ŋɔ Abiɡel be ŋɔ o dɛ nyinu dɛ́ mo.

⁴⁰ O bonɔɔna la la Kaamɛl dɛ ka ŋɔ Abiɡel be ŋɔ, “Devid tomɛ yaa he be ŋɔ yá ba kpɔe ba o moe.”

⁴¹ Ate, o ɡuŋi dɛ kpɔ sie pi harɛ dɛ ŋɔ, “O toloo men, mɛɛ tomɔɔ dɛɛ sarame o bonɔɔna nakpale.”

⁴² Abiɡel den ɛ warane ka so o keeɡo ta, asɛ o toli banue teŋɛ, bane Devid bonɔɔna la kaa o ka yalɛ Devid.

⁴³ Dɛ Devid tɔ sie mo Ahinoam waa le Jesreel la, ba bwa ɛ o haahna.

⁴⁴ Kɛ dɛ Kooro Sɔɔl berɔ kpɔ o bihaah Mikal waa ɛ Devid haah la tɛ Laes bibaa Paltiel waa le Galim la ŋɔ ó moo.