1 Samoɛl 22 - mzwDBL

Devid la bwɛjena Adulam ne Mispa

¹ Devid le bwɛjen Gat dɛ chwa ka sɔh bwɛjen Adulam bwebɔɔ bini. O dɔɔranar ne o mɛɛ dem tena aa no o waa la, ba la o be bela.

² Banɔ la baa dɛ fiɡ ba ne nɛra baa di kema, dɛ banɔ la ba bambile aa chɔɡa bwa baa teŋɛ o nɛ. Nɛra dɛ ɛ lafraanaarɛɛ baa cheme o sie, o ɛ ba nomoa.

³ Devid le bela dɛ la Mispa waa lɔ Moab harɛ ta, dɛ ka ŋɔ bela kooro be ŋɔ, “Hɛɛ sɛoh dɛ́ ɡel n mɛɛ ne n nya ba so he be bonɔ ka tel saŋ maa na waa Korowii aa ɛ tɛ mɛ naa?”

⁴ Anomanta, o ɡelɔ ba so kooro la be ɡɛ saŋ waa kaa sɔh bwebɔɔ la bini la bwa.

⁵ Ate, Korowii keame baa dɛ yerɔ Gad ba ŋɔ Devid be kɛŋɔ, ó le bwebɔɔ la bini bela dɛ́ kaa Juda harɛ ta. Anomanta, Devid le bela dɛ kaa Hɛrɛt kɔne bini.

Kooro Sɔɔl kpoo Nɔb sɔfore

⁶ Awola bɛl, Kooro Sɔɔl baa no kɛŋɔ ba na Devid ne o laa tena. Dɛ Kooro Sɔɔl kpoŋe o lampea dɛ so dajen bɛl mun Gebea deŋɡare doa, asɛ o laa nomonome bwa che baro.

⁷ Asɛ Kooro Sɔɔl ŋɔ ba be ŋɔ, “N bala haa le Bɛnjamen dea, hé no! Jese bibaa nɔ ɛɛ won tɛ he bwa harɛre ne daa kooni aa? Wɛɛ won cheɡ heyaa nomonome he chɔ laa tena kaɡboŋa kɛɛ lafare nyoa aa?

⁸ Amɔ a waa he bwa sɔh dɛɛ vɔrɔwe n vɔrɔwa nɔ naa? Nomɛlbwa ta n be bolɛ ŋɔ n bie ne Jese bie fɔwɛ fɔo. Bɛlbwa waane laa n wa kɛɛ dɛ bol n be ŋɔ n bie ɡelɔ n bonɔɔ Devid ɛɛ vɔrɔwe n vɔrɔwa dɛ́ kpo mɛ, ɡɛ waa ɛa fini nɔ.”

⁹ Ate, Edom te Doeɡ o ne Kooro Sɔɔl laa nomonome la aa cheɡa la ŋɔ, “N na Jese bibaa la o ba Nɔb, Ahitub bibaa sɔfo Ahemɛlɛk be.

¹⁰ Ahemɛlɛk kaa bɔɔ le Korowii be tɛo, dɛ berɛ kpɔ kondikwaa ne Goliat waa ɛ Filisti te kere tɛo.”

¹¹ Belaa Kooro Sɔɔl tomɛ ŋɔ bá ka yerɛ Ahitub bibaa sɔfo Ahemɛlɛk ne o mɛɛ dem tena bwa baa ɛ sɔfore dɛ so Nɔb la, ásɛ ba bwa ba kooro be.

¹² Kooro Sɔɔl ŋɔ, “Ahitub bibaa, dɛɛ no n be name.” Anee o chaŋe ŋɔ, “N naa, n dɛ no he be.”

¹³ Anee Kooro Sɔɔl ŋɔ o be ŋɔ, “Ɛrɛɛ he ne Jese bibaa sɔh dɛɛ vɔrɔwe n vɔrɔwa, he tɛo kondikwa ne kere dɛ berɛ bɔɔ le Korowii be tɛo nɔɔ? A ɡelɔ o ɛɛ mɛ deŋnekpeɡ dɛɛ nyin mɛ dɛ́ kpo fini tɔpere.”

¹⁴ Sɔfo Ahemɛlɛk chaŋe kooro ŋɔ, “He nomonome nɔ bwa bini ume waa dɔ kasinteŋ kɛ Devid waa ɛ he hela, dɛ berɛ chɔ nɛra baa dɛ daahne nyoa, dɛ dɔ duure kohona he dem ɔ?

¹⁵ A ɡɛ tɔpere la ɡboo n bɔɔ waa le Korowii be tɛo waa? Akai, ɡɛ laa a do. N naa kooro, bɛ men maa ɛ he bonɔɔ nɔ ne n mɛɛ dem nɛra wechɔɡa bɛlbwa ɛ, he bonɔɔ aa waa nɔ wobɛlbwa jemɛ.”

¹⁶ Anee Kooro la ŋɔ Ahemɛlɛk be ŋɔ, “Kasinteŋ, he ne he mɛɛ dem tena bwa ɛɛ serewoo.”

¹⁷ Belaa kooro la ŋɔ nɛra baa dɛ daahno dɛ che o baŋ bɛl la be ŋɔ, “Hé berɛ he te dɛ́ kpoo Korowii sɔfore nɔ, dɛkalkɛ ba ɡe teŋɛ Devid nɛ. Ba jemɔ kɛ o dɛ chwa, kɛ ba ta n be bolɛ.” Kɛ dɛ nɛra baa dɛ daah kooro la aa nyin kɛ bá kpoo ba.

¹⁸ Ate, kooro berɛ ŋɔ Doeɡ waa le Edom la be ŋɔ, “Berɛ he te, dɛ́ kpoo sɔfore nɔ.” Anomanta, o berɛ o te dɛ kpoo ba. O kpoo sɔfore fifraanuatoro dɛ banue baa do sɔfo batakaarebori efɔd baa kpɔ yapondɛɛɡa ɛa.

¹⁹ O ɡelɔ ba kpoo nɛra baa kaa dɛ do Nɔb waa ɛ sɔfore bwɛɛ la bwa, ne baala ne haahna, ne bechale ne bechasɔɔhne, ne nae ne keeɡore dɛ peera bwa.

²⁰ Kɛ Abiata waa ɛ sɔfo Ahemɛlɛk bibaala la bini bɛl chwao dɛ ka ja Devid nɛ.

²¹ Abiata ŋɔ Devid be ŋɔ Kooro Sɔɔl kpoo Korowii sɔfore la bwa.

²² Anee Devid ŋɔ Abiata be ŋɔ, “Awola Doeɡ aa lɔ bela la, dɛ n jemɔ kɛrɛdɛ kɛŋɔ wɛɛ bol Kooro Sɔɔl bee. N nɛɛ a che ba kpoo he mɛɛ dem nɛra bwa la.

²³ So n be bonɔ, dɛɛ berɛ ɔma. Nɛn waa dɛ nyini dɛ́ kpo la, dɛ́ nyin n ɡe dɛ́ kpo. He lɔ n be bonɔ naa, hɛɛ dɔ he nyuu.”