1 Samoɛl 18 - mzwDBL

Kooro Sɔɔl we Devid bwara

¹ Devid ne Kooro Sɔɔl baa bol waa tonɛ, asɛ Jonatan sie lɛ Devid nɛ, asɛ o ne o kpɔ darame wɛɛ nyinu kɛ o ɡbaɡba ken.

² Le awola tɔpere la, Kooro Sɔɔl ɡelɔ Devid do o sie dɛɛ tomɔ, o ta ɡelɛ o kaa o mɛɛ dem kpa.

³ Jonatan ne Devid vɔwɛ darame fɔo, dɛkalkɛŋɔ dɛ o dɛ nyin o waa kɛ o ɡbaɡba.

⁴ Jonatan foo o batakaare waa doa, ne o laa batakaare tɛ Devid, hale o kere ne o to, dɛ o kiriso.

⁵ Kooro Sɔɔl tomɛ Devid ŋɔ ó ka ɛ wobɛlbwa naa, o dɛ ɛa kɛrɛdɛ. Anomanta, o ɛo o laa nomonjena la bini bɛl. Gɛ waa nɔ lɛ Kooro Sɔɔl nomonome ne o nɛra bwa sie.

⁶ Devid aa kpo Goliat asɛ laa tena la berɛ dɛɛ kaa dem la, haahna le Israel bwɛɛre bwa ta ba cheme Kooro Sɔɔl. Ba yiiɡi loŋa, dɛ lɔ janjela silɛɛ ne dɛɛ sa.

⁷ Baa saa dɛɛ hɛɡre la, ba ɡo yela ŋɔ, “Kooro Sɔɔl kpo nɛra kaɡboŋa, Devid ɡe kpo nɛra kaɡboŋa fi.”

⁸ Gɛ waa nɔ ta Kooro Sɔɔl som doe, o baah di dɛ ŋɔ, “Ba ŋɔ Devid kpo nɛra kaɡboŋa fi, asɛ n te kpo nɛra kaɡboŋ ɡbo. Onee baa ba lawa cheɡ kora ta.”

⁹ Le awola dɛɛ kaa la, Kooro Sɔɔl pa mun fome siwi pa Devid nɛ dɛɛ weo bwara.

¹⁰ Tɔ aa pera la, Korowii ɡelɔ kwaa ir Kooro Sɔɔl nɛɛ kpeɡri nɛ, o do dem dɛɛ bol waa kɛŋɔ choɡla te ken. Dɛ Devid ɡe soɡo dɛɛ lɔ o janjela kɛ wubwa la, anɔ te la dɛ Kooro Sɔɔl kpoŋe lampea.

¹¹ O ta lampea la dɛ ŋɔ, “Mɛɛ yaɡɛ Devid nɔɔ pɛl danjwɛ.” O ta lampea la kera anɛ, kɛ Devid ke o te, o ta on dɔe.

¹² Dɛ Kooro Sɔɔl dɛ ɔmɛ Devid dɛkalkɛŋɔ Korowii ɡelo dɛ ka ja Devid nɛ.

¹³ Anomanta, o ɡelɔ Devid kaa tɔ o laa tena kaɡboŋ sie, dɛɛ la bane laa.

¹⁴ Korowii aa ja Devid nɛɛ nomanta, wobɛlbwa waa ɛ́ la, dɛ a maɡrɔ tɛo.

¹⁵ Kooro Sɔɔl aa naa kɛŋɔ o wobɛlbwa wer dɛɛ tɛo la, dɛ o dɛ ɔmɔ kɛrɛdɛ.

¹⁶ Kɛ dɛ Israel ne Juda tena bwa dɛ nyin Devid wa, waa tɔ ba sie dɛ kpɔ ba dɛɛ la laa a maɡre dɛɛ tɛɛ ba la wa.

¹⁷ Kooro Sɔɔl ŋɔ Devid be ŋɔ, “N lawɛ n bihanomoa baa dɛ yerɔ Merab dɛɛ tɛɛ hé mo. Dɛ hɛɛ dɛɛ tom mɛɛ, dɛ́ yo Korowii laa kasinteŋ ta dɛɛ tɛo tenaa.” Kooro Sɔɔl liiro kɛŋɔ anɔ taa aa ba cheɡa Filisti tena kpoo, kɛ o ɡbaɡba laa dɛ́ kpoo.

¹⁸ Ate, Devid ŋɔ o be ŋɔ, “Umee n ɡeɔ? Israel dejen besoo taa n le dɛ́ ɛ kooro hela ɔ?”

¹⁹ Aa baa tel kɛ ba kpɔ Kooro Sɔɔl bihaah Merab tɛ Devid ó mo la, ba kpɔɔ tɛ Adreɛl waa le Mehola.

²⁰ Dɛ Kooro Sɔɔl bihaah bɛl ɡe baa dɛ yerɔ Mikal dɛ nyin Devid. Baa bol Kooro Sɔɔl be a waa la, o sie lɛo.

²¹ Asɛ Kooro Sɔɔl lii ŋɔ, “Mɛɛ kpɔ Mikalee tɛo, dɛ́ kpɔ harɔ bel, ásɛ Filisti tena la dɔɔ kpo.” Anomanta, Kooro Sɔɔl ŋɔ Devid be ŋɔ, “He dɔ bɔr nɛɛtena name kɛ he ɛ n hela.”

²² Belaa Kooro Sɔɔl ŋɔ o nomonome be ŋɔ, “Hé yerɛ Devid le bokɛre dɛ́ ŋɔ o be ŋɔ, ‘Na, kooro sie dɛ lɛ he nɛ, o nomonome la bwa ɡe ɛɛ nyin he waa kɛŋɔ hé ɛ o hela.’ ”

²³ Ba kaa bol ɡɛ waa nɔ Devid be. Anee o ŋɔ, “Hé dɛ lii kɛ a ɛ wekokori kɛ nɛn ɛ kooro hela kɛɛ? Nyaaree men, n ɛ nɛŋɡwɛɡre.”

²⁴ Kooro Sɔɔl nomonome la aa kaa bol waa Devid aa bola o be la,

²⁵ o ŋɔ, “Hé ka ŋɔ Devid be ŋɔ kooro aa komɛlbwa nyin dɛ́ tɛ hanfale la ka ja Filisti tena lafa baa serewa pena tɔne, dɛ́ kpɔ bɔ ba kem.” Kooro Sɔɔl ɛ ɡɛ ásɛ Filisti tena la dɔ Devid kpo.

²⁶ Nomonome la aa baa bol Devid be la, o sie lɛo kɛ ó ɛ kooro hela. Anomanta, mɔɔ hanfalwaa la tel la,

²⁷ Devid ne o laa tena leɔ kaa dɛ ka kpoo Filisti tena lafraanɛ. O ba nɛra pena tɔne kooro aa ŋɔa o dɛ nyin la ne, ɡɛ aa ɛ ásɛ o ɛ kooro hela. Ate, Kooro Sɔɔl lawɛ o bihaah Mikal tɛo o mo.

²⁸ Kooro Sɔɔl aa naa kɛŋɔ Korowii ja Devid nɛɛ, asɛ o bihaah la ɡe ɛɛ nyinu la,

²⁹ dɛ name kwaraa Kooro Sɔɔl ɛɛ ɔmɔ kohona. O kpɔ Devid ɛ o dɔm o soɡa bini bwa.

³⁰ Filisti laa nomonome teŋɔ kpɔ ba laa tena dɛɛ la laa, kɛ saŋ bɛlbwa ba ne Devid aa yo la, o dɛ pɔ ba nɛ. Devid lɛ sɔn kohona, dɛkalkɛ Kooro Sɔɔl laa nomonome bwa bini la, dɛ onee yo laa dɛ kpoo nɛra kohona.