1 Samoɛl 15 - mzwDBL

Korowii vɛɛh waa vɛh Sɔɔl kɛ kooro

¹ Samoɛl ŋɔ Kooro Sɔɔl be ŋɔ, “Menee Korowii tomɛ n fuɡe noo do he nyu ta, dɛ cheɡe kooro tɛ o nɛra Israel tena. Berɛ no waa aa le Korowii be taraken.

² Nemenɛ Korowii ŋɔ, ‘Mɛɛ tɛr Amalɛk tena deŋnee, dɛkalkɛŋɔ ba naawa teŋe Israel tena ŋwɛnɛ, ɡɛ saŋ baa le Ijipt dɛɛ ba la.

³ Hé kaa taraken dɛ́ ka yo Amalɛk tena la, dɛ́ chɔɡ kwaa baa dɔa bwa kwaraa. He bɛ ba sum na, hé kpoo baala ne haahna, ne bechale ne bechasɔɔhne, ne nae ne peera dɛ ba nyoɡmare ne keeɡore bwa.’ ”

⁴ Anomanta, Kooro Sɔɔl yerɛ o laa tena la cheme Telaim dɛ kur ba. Ba lɔ nɛra kaɡboŋa lafraanɛ dɛ le Israel harɛ, asɛ kaɡboŋa fi ɡe le Juda harɛ ta.

⁵ Kooro Sɔɔl ne o laa tena la Amalɛk tena bwɛjen bɛl ta, dɛ ka sɔh chɔ fɛlembɔjen bɛl bini bar bwɛɛ la.

⁶ O kah Ken tena ba ne baa soɡa la ŋɔ, “Hé le Amalɛk tena la bini kaa, ásɛ n bɛ pɛ kpo he ne ban. Israel tena aa le Ijipt harɛ ta dɛɛ ba la, hé nyin ba wa.” Asɛ Ken tena la le ba bini kaa.

⁷ Asɛ Kooro Sɔɔl yo Amalɛk tena la le Havila harɛ ta ka tel Suur, o lɔ Ijipt wee leebɔr.

⁸ O lawɛ Amalɛk tena Kooro Aɡaɡ nɔn ne, dɛ kpoo o nɛra baa kaa la bwa ɡe.

⁹ Kooro Sɔɔl ne o laa tena la ɡel Kooro Aɡaɡ ne o peera ne nae ne nabali aa wera kohona, ne pebali ne nae bii dɛ koŋkwaa aa wera la te bwa. Kwaa aa wera dɛ dɔ tɔnɔ la te, ba ɡela, kɛ anɔ la aa wola were la, ba chɔɡa.

¹⁰ Anee Korowii ŋɔ Samoɛl be ŋɔ,

¹¹ “A dɛ we n nɛɛ kɛ maa cheɡ Sɔɔl kooro, dɛkalkɛŋɔ o ta n waa ta teŋɛ dɛ vɛɛh mɛ.” Samoɛl liire chɔɡ ɡɛ waa nɔ waa kɛrɛdɛ, asɛ o wi no Korowii awola jwaana la bwa.

¹² Tɔ aa pera chɔmbibi la, Samoɛl iro la ka ɡaaɡe Kooro Sɔɔl bɔr, asɛ ba ŋɔ o be ŋɔ, “Ó kaa Kaamɛl. Asɛ o ma kon cheɡ bela o sɔn ta, dɛ kpɔ dɛɛ lii laa waa yoa dɛ pɔ nɛra nɛɛ la wa, dɛ berɛ kaa Gelɡal.”

¹³ Samoɛl aa tel o be la, Kooro Sɔɔl ŋɔ, “Korowii swee andɛɛɡa tɛɛ! N ɛ waa Korowii aa do mɛ ŋɔ ń ɛ la.”

¹⁴ Anee Samoɛl ŋɔ, “Bɔkwa ɡe peera ne nae sii mɛɛ no ken?”

¹⁵ Anee Kooro Sɔɔl chaŋe ŋɔ, “Laa tena laanee le ane Amalɛk tena be ba. Ba ɡel peera aa wera kohona ne nae, dɛ́ ba kpoora ɛ saraha tɛ Korowii haa dɛ tomɔ la. Kɛ kwaa aa wola were la te, ba kpoo a bwa sekwaraa.”

¹⁶ Ate, Samoɛl ŋɔ o be ŋɔ, “Gel, ásɛ n baɡle waa Korowii aa bol n be dɛ jwaana ne.” Anee Kooro Sɔɔl ŋɔ, “Bol ń no.”

¹⁷ Samoɛl ŋɔ, “A lole kɛ he dɛ lii he te nɛnjeɡa, he laa bera ba ɛ Israel deene bwa nyu te nɔ naa? Korowii fuɡe noo do he nyu ta, dɛ cheɡe kora ta Israel.

¹⁸ Waane le Korowii be ba he be kɛŋɔ, ‘Kaa dɛ́ ka chɔɡ Amalɛk nyubinikpeɡ tena la bwa sekwaraa. Yoo ba ka tel kɛŋɔ haa he ba bwa.’

¹⁹ Ɛrɛɛ haa wola Korowii waa noɔ? Ɛrɛɛ he la ka kam kwaa baa paa laa ta dɛ ɛ wechɔɡa Korowii sie ken?”

²⁰ Kooro Sɔɔl ŋɔ, “N teŋɛ Korowii waa la ta. Waa waa do mɛ a ta la, n ɛa. N chɔɡ Amalɛk tena la bwa kwaraa. Hale dɛ lawɛ ba Kooro Aɡaɡ nɔn ne, dɛ ba o ne.

²¹ Laa tena la larawe ba peera ne nae aa wera kohona, dɛ lea cheɡ tɛ Korowii laa la ta, dɛ́ ba a ne Gelɡal, dɛ́ kpoora ɛ saraha tɛ Korowii haa dɛ tomɔ la.”

²² Kɛ Samoɛl chaŋo ŋɔ, “Korowii sie dɛ lɛ saraha baa fuah ne kwaa baa kpoora, ɡwaa kɛ haa no o deŋna wa aa? Korowii deŋna waa noe wer ɡwaa kɛ haa kpo pedɛɛɡe ɛ saraha tɛo.

²³ Dɛ he ɛ Korowii deŋnekpeɡ aa, a do kɛŋɔ haa dɛ tomɛ voɡa ken, bambikpeɡ ɡe do kɛŋɔ voɡa toma. Haa vɛh Korowii waa la nomanta, o ɡe vɛɛh kooro.”

²⁴ Anee Kooro Sɔɔl ŋɔ Samoɛl be ŋɔ, “N ɛ wechɔɡa, n vɛh Korowii waa waa do mɛ a ta, ne waa haa ŋɔa n ɛ la. Ɔmaa n ɔmɛ nɛra la waa n teŋɛ waa baa dɛ nyin ta.

²⁵ Taraken n dɛ soŋe kɛ he kpɔ n wechɔɡa kɛ mɛ, ásɛ n ne he berɛ kaa, ń kaa tomɛ Korowii.”

²⁶ Asɛ Samoɛl ŋɔ o be ŋɔ, “N ne haa berɛ kaa. He vɛh waa Korowii aa bola he be, asɛ o vɛɛh kɛŋɔ he ɛ kooro Israel tena nɛ.”

²⁷ Samoɛl aa bera dɛɛ ba kaala la, Kooro Sɔɔl tao lawɛ o batakaare nyoa asɛ o kɛɛ.

²⁸ Anee Samoɛl ŋɔ o be ŋɔ, “Korowii chɔɡ Israel kora la kɛŋɔ batakaare nɔ dɛ le he nɔn ta fini, dɛ kpɔ tɛ he dɔŋ o wa aa wera ɡwaale.

²⁹ Korowii Israel tena aa dɛ tomɔ la dɔ jirima, waa nyosone teŋe, waa o liire ɡe charɛ. Nɛwɛnyini laa on ó charɛ o liire.”

³⁰ Ate, Kooro Sɔɔl chaŋe ŋɔ, “N ɛ wechɔɡa te, kɛ ɡel ń dɔ duure Israel tena bwa ne ba nomonome sie. Gel n ne he kaa, ásɛ n kaa tomɛ Korowii haa dɛ tomɔ la.”

³¹ Gɛɛ a do Samoɛl ne Kooro Sɔɔl berɛ kaa o kaa tomɛ Korowii.

³² Samoɛl ŋɔ, “Hé ka kpɔ Amalɛk tena Kooro Aɡaɡ ba tɛ mɛ.” Anee Aɡaɡ lɔ bambile dɛ ba o be, dɛɛ lii ŋɔ, “N jemɔ taraken kɛ baa men kpo kpa.”

³³ Ate, Samoɛl berɛ ŋɔ, “Gɛ haa kpoo bechale ba nyare paŋɛ bii la, ɡɛɛ he nya ɡe ɛɛ ba bie paŋa.” Asɛ Samoɛl kpo Kooro Aɡaɡ Korowii sie Gelɡal bela.

³⁴ Ate, Samoɛl le bela dɛ kaa Rama, kɛ Kooro Sɔɔl te berɔ kaa o bwɛ Gebea.

³⁵ Samoɛl ta Kooro Sɔɔl nae kpa, dɛ ka tel o serewe wee. Dɛ o wio dɛɛ tɛo te. A we Korowii nɛɛ kɛ waa cheɡo kora Israel.