1 Koranar 13 - mzwDBL

Korowii keame bɛl waa le Juda harɛ

¹ Awola bɛl, Korowii ɡelɔ o keame bɛl le Juda harɛ dɛ kaa Bɛtel. Dɛ Kooro Jɛroboam lɔ kon baa ɛ saraha o ta la bɔr dɛɛ ba saraha ɛɛ.

² Korowii keame la cheɡɛ Korowii waa ta dɛ kpɔ takpeɡ ŋɔ, “Korowii tom mɛ ŋɔ ń ba bol kon baa dɛ ɛ saraha o ta nɔ wa. O ŋɔ, ‘Baa lolɛ bibaalee ó ɛ Kooro Devid naa baa yerɔ Josia. He taa wɛɛ ba ó kpoo kerekpoŋra baa soɡe voɡa baa cheɡa deŋɡarere ta dɛɛ ɛ sarahare, dɛ́ fuh ba hoɡa he ta.’ ”

³ Awola tenten, keame la baɡle waane aa dɛ ba ɛɛ dɛ ŋɔ, “Kon baa dɛ ɛ saraha o ta nɔ bini ɛɛ peroo anɛ, ásɛ tɔɔ aa dawɛ o ta la fuɡe he jemɛ kɛŋɔ Korowiirii cheɡɛ n nɛɛ dɛɛ bol.”

⁴ Kooro Jɛroboam aa no waa Korowii keame la aa bola la, o cheɡɛ kon la bɔr dɛ tɛr o nɔn pa Korowii keame la nɛɛ dɛ ŋɔ, “Hé lawɔ.” Buɡ la ta, nɔn waa tɛra pa Korowii keame la nɛɛ la ka ɡɛ, o ta wone ba o ne harɛ kpa.

⁵ Saraha kon la ɡe pero tɔɔ aa dawɛ o ta la fuɡe ɡɛ Korowii aa cheɡɛ o keame la nɛɛ dɛ bol la.

⁶ Asɛ kooro la ŋɔ Korowii keame la be ŋɔ, “N poori, soŋe Korowii haa dɛ tomɔ la tɛ mɛ ásɛ o chah n nɔn nɔ!” Ate, Korowii keame la soŋe Korowii, asɛ kooro nɔn la berɛ do ɡɛ o fa aa doa wubwa la.

⁷ Ate, Kooro Jɛroboam ŋɔ Korowii keame la be ŋɔ, “Ba ya kaa dem he ka di kwa, ásɛ n berɛ kɛɛ kwa waa haa ɛa nɔ wa.”

⁸ Anee Korowii keame la chaŋe ŋɔ, “Hale hɛɛ tɛ mɛ he kondɔɔh pera kwaraa yaa, n ne haa la á ba ɛ kɛŋɔ mɛɛ di kwaa dɛ nyɔ nee bonɔ.

⁹ Korowii do mɛ ŋɔ, ‘Bɛ kwaa di, bɛ nee nyɔ. Bɛ ŋwɛnɛ haa kpɔ o ta kaa la ta kpɔ ba.’ ”

¹⁰ Anomanta, ŋwɛnɛfale taa o kpɔ kaa, o ta berɛ kpɔ ŋwɛnɛ waa kpɔ o ta kaa Bɛtel la ta kpa.

Korowii keame banjena bɛl waa lɔ Bɛtel wa

¹¹ Dɛ Korowii keame banjena bɛl soɡe Bɛtel. O bibaala kaa taa waa Korowii keame la aa baa ɛ awola, dɛ berɛ bol waa waa bol kooro ɡe be la.

¹² Asɛ Korowii keame banjena la bɔɔ o bii la ŋɔ, “Ŋwɛnɛ besoo taa o kpɔ kaalɔ?” Bii la baɡlo ŋwɛnɛ Korowii keame waa le Juda la aa kpɔ o ta kaa.

¹³ Asɛ o ŋɔ bii la be ŋɔ, “Hé kpɔ kwaa pa keeɡo nɛɛ tɛ mɛ.” Ba pa kwaa pa o nɛ asɛ o ka so o ta,

¹⁴ dɛ lawɛ ŋwɛnɛ Korowii keame la aa kpɔ o ta kaa la ta, dɛ ka puu dɛ o soɡe dajen bɛl mun. Anee o bɔɔro ŋɔ, “Henee Korowii keame haa le Juda harɛ ba la aa?” O ŋɔ, “Menee.”

¹⁵ Anee o ŋɔ Korowii keame la be ŋɔ, “Ba ya kaa dem he ka di kwa.”

¹⁶ Korowii keame la ɡe chaŋo ŋɔ, “Maa won berɛ la mun ta kpa, maa won di kwaa kɛɛ dɛ́ nyɔ nee kwaraa bonɔ,

¹⁷ dɛkalkɛŋɔ, Korowii ŋɔ n be ŋɔ n bɛ komɛlbwa di kɛɛ dɛ́ nyɔ ne, dɛ bɛ ŋwɛnɛ maa kpɔ o ta kaa la ɡe ta kpɔ ba.”

¹⁸ Ate, Korowii keame banjena la chaŋe ŋɔ, “N ɡe ɛ Korowii keame kɛ hen. Korowii ɡelɔ nyundua torome ba ŋɔ n be ŋɔ ń ba kpɔe kaa dem, dɛ ka tɛɛ kondikwaa ne nee he nyɔ.” Kɛ dɛ neɡraa wɛɛ neɡro.

¹⁹ Anomanta, o laa berɛ dɛ teŋɛ o nɛɛ ba dem, dɛ ba di kwaa dɛ nyɔ ne.

²⁰ Baa soɡa dɛɛ di kwaa la, Korowii bol waa banjena la waa kaa kpɔɔ ba la be.

²¹ Asɛ o kpɔ takpeɡ bol waa o dɔŋ waa le Juda harɛ la be ŋɔ, “Korowii ŋɔ, ‘He ta waa maa bola la noɛ, dɛ vɛh waa maa doe a ta la.

²² He berɔ ba di kwaa dɛ nyɔ nee bela maa ŋɔa, bɛ kwaa bela di, bɛ nee ɡe nyɔ la. Gɛ nomanta, haa he naawa hoɡa taa chɔ.’ ”

²³ Waa di kwaa dɛ nyɔ nee la tonɛ la, keame banjena la waa kaa berɔ dɛ kpɔɔ ba la pa kwaa pa keeɡo la ta dɛ tɛo.

²⁴ Waa chiɡ ŋwɛnɛ ta dɛɛ kaa la, o ne nyujente kaa cheme asɛ nyujente la kpoo. O lale chɔ ŋwɛnɛ baah ta bela o keeɡo la che bela nyujente la ɡe che lale la jwɛh.

²⁵ Nɛra bane ba dɛ kaa dɛ na kɛŋɔ waa sewa chɔ bela, asɛ nyujente che o jwɛh, ate ba la dɛ ka bol Bɛtel tena be, bela Korowii keame banjena la aa soɡa la.

²⁶ Korowii keame waa kaa berɔ dɛ kpɔɔ ba la aa noa la, o ŋɔ, “Korowii keame waa vɛh Korowii waa laanee. Korowiirii kpɔɔ tɛ nyujente o kpoo ɡɛ waa ŋɔa la.”

²⁷ Bela Korowii keame banjena la ŋɔ o bibaala be ŋɔ, “Hé pa kwaa dawɛ n keeɡo ta tɛ mɛ.” Asɛ ba ɛ ɡɛ.

²⁸ O lawɛ ŋwɛnɛ dɛ ka na kɛŋɔ o chɔɔ, keeɡo la ne nyujente la che o jwɛh. Nyujente la ta on chwee, o ta keeɡo la ɡe kpoe.

²⁹ Ate, o kpɔɔ dawɛ o keeɡo la ta, dɛ ba o ne Bɛtel, dɛ ba ɛ o lwe dɛ huɡo.

³⁰ O huɡo o ɡbaɡba lalbɔɔ waa kwiu bini dɛ wi tɛo dɛ ŋɔ, “Bwɛɛlɛ n dɔŋ, bwɛɛlɛ ne seo.”

³¹ Waa huɡo tonɛ la, o ŋɔ o bibaala be ŋɔ, “Dɛ n baa sewaa, hé huɡ mɛ bela baa huɡe Korowii keame nɔ. Hé kpɔ o hoɡa bil n kwaa jwɛh.

³² Korowii waa waa bola saraha kon baa kpo kwaa o ta dɛɛ fuah Bɛtel bonɔ, ne voɡare aa lɔ deŋɡarere ta Samaria bwɛɛre ta bwa waa la ɛɛ chiɡuu kpela.”

³³ Ane a bwa, Israel Kooro Jɛroboam ta charɛ le o wechɔɡa ŋwɛnɛre la ta, dɛ teŋɛ le sɔfore bwa soo siwi baa lɔ bela dɛ ɛɛ ba kerekpoŋra voɡare aa lɔ deŋɡarere la ta. Nomɛlbwa waa dɛ nyin o kpoŋe voɡ kere la, dɛ o cheɡo.

³⁴ Gɛ wechɔɡa nɔɔ ba Kooro Jɛroboam dem ne o kora chɔɡa ne harɛ nɔ ta.