Filimon 1 - Nyaa Shɔɔ Ɓɔɔ Laa a Ɓɛɛ

¹ Labeenang keɓe nɛɛ bii mɛɛ, nkɔ Bulu, ɓɔɔ zang mã m ka sãa, ka ruu ɓɔɔ, n pàlɛ́ Yeesɔ Kirisi shonang ɓɛɛ, a ɓɔɔ Timoti ɓɔɔ nwang kaa naa jaa nàá ɓuru ka ruu danggn ɓɔɔ ruu shing nɛɛ wu gbete ɓɛɛ. Ruu bee Filimon wusang shonang ɓuru, ɓɔɔ ruu kasɛ mɔɔ dɔɔli ɓɛɛ.

² Ruu bee mɔɔ labeenang keɓe, nɛɛ zang ɓɔɔ ri dũng Laa ɓɔɔ ri kpálɛ̀ yuu ka gãa ɓaaɓɛ ɓɛɛ. A ɓɔɔ kaa maanaa ɓuru Afiya nɛɛ Akipu ɓɔɔ pàlɛ́ Laa doo shonang kɔ naa rukɔ ɓɛɛ.

³ N gaa Daa ɓuru Laa nɛɛ Kpanti ɓuru Yeesɔ Kirisi, ri pàlɛ̀ nɔɔ tɔ̃ɔ, ri shingnɛ, nɔɔ tãa tĩnang, nɔɔ nwang ka nyaa zɔɔ.

Naa ɓɔɔ Filimon kasɛ zang nɛɛ danggn ɓɔɔ wu shing ɓɛɛ

⁴ Filimon, n zãa Laa mɛɛ diki diki ka ruu ɓaaɓɛ, n nɛɛ ɓaa nung ɓaaɓɛ tɔ, ka ɓɔɔ n gaa Laa ɓɛɛ.

⁵ Ka ruu ɓɔɔ, n tãa nyaa danggn ɓɔɔ mɔɔ shing ka bii Kpanti ɓuru Yeesɔ Kirisi, a ɓɔɔ ti naa ɓɔɔ mɔɔ kàsɛ̀ rɛɛ zang Laa ɓɛɛ.

⁶ N gaa Laa nɛɛ mɔɔ yi tĩng ka ɓɔɔ mɔɔ kɔɔrɔ zang ruu ka yuu danggn ɓɔɔ mɔɔ shing ka bii Laa ɓɛɛ. Laa wu ti tusu mɔɔ vuu ɓɔɔ kagn ka yeti tɔ̃ɔ piti, ɓɔɔ ɓi ɓɔɔ ɓuru ɓɔɔ ruu zang Kirisi ɓɛɛ.

⁷ Masang, naa ɓɔɔ mɔɔ kasɛ zang ɓɛɛ, shing m̌ tɔ, n tãa tĩnang, ti mã m danggn tɔ gbãng gbãng. Mɔ̀ɔ ti shing tɔ yeti zang Laa valɛ tɔ.

Bulu gaa Filimon ka ruu Onesimu

⁸ Ka ruu nɔngkɔ, ka wee mɔɔ nwàng kaa naa jaa nàá mɛɛ, ka ruu ɓɔɔ, ruu ɓakɛ zɔɔ tɔ nɛɛ Kirisi ɓee, n kɔɔ mɔɔ katɔ dɔ̃ɔ gbete, mɔɔ palɛ vuu ɓɔɔ daa naa palɛnang katɔ ɓɛɛ.

⁹ Ka ruu ɓɔɔ, ruu kasɛ zɔɔ katɔ ɓɛɛ, n gaa mɔɔ katɔ kɔ jong. N gaa mɔɔ ka ruu ɓɔɔ n m zang nyaa shonang Yeesɔ Kirisi ɓɛɛ, a zang ti mã m ka sãa ka ruu ɓiɓɛ ɓɛɛ.

¹⁰ N gaa mɔɔ ka ruu Onesimu ɓɔɔ nwang kaa naa jaa mɛɛ, ka wee zang mã m ka sãa ɓee.

¹¹ Bɛ̀ɛ́ ɓeleng nwáng naa vuu ɓɔɔ shi kpang ɓɛɛ ka bii ɓaaɓɛ, kãntang keɓe raa zang tɔ̃ɔ tɔ, ka bii mɛɛ nɛɛ bii ɓaaɓɛ.

¹² Wee n dɔ̃ mɔɔ wu ɓee, nwang naa ɓɔɔ n dɔ̃ mɔɔ suru bii mɛɛ ɓɛɛ.

¹³ Bɛ̀ɛ́ n kasɛ n tɔɔ wu nwang nɛɛ n ka nihn, wu pàlɛ̀ m shonang ka nung ɓɔɔ mɔɔ nɛɛ pàlɛ̀ m ɓɛɛ. Ka wee n nwang ka sãa ka ruu Ruu Tɔ̃ɔ Laa ɓɔɔ n kɔɔrɔ ɓɛɛ ɓee.

¹⁴ A n kasɛ kaa tɔ̀ɔ́ n palɛ vuu ɓɔɔ n kɔɔ mɔɔ nyaa kagn kpàng, kpang. N kasɛ tɔ̃ɔ ɓɔɔ mɔɔ pàlɛ́ m, wu nwang nɛɛ yeti ɓaaɓɛ, wu vuu ɓɔɔ nwang naa zang shing mɔɔ nɛɛ gbãng gbãng ning, mɔɔ pálɛ́ ɓɛɛ kpang.

¹⁵ Vuu ɓɔɔ shingnɛ nɔɔ yáa zɔɔ ka gbongkarɛ tɔkɔlɔng ɓɛɛ kɔ. Nɛɛ tɔ̀ɔ, wu naa nwang ɓɔɔ ɓaaɓɛ kaa tɔkn dòndòng.

¹⁶ Kãntang keɓe ɓi tɔ̀ɔ́ jaafoo waati kpang, ɓa jaafoo ɓi kaa tɔ. Ɓi kaa manzung ɓuru ka gbalang Yeesɔ Kirisi. Ɓi zang tɔ̃ɔ ka bii mɛɛ. Nwǎng mɔɔ tɔ̃ɔ ditɔ jong gbãng gbãng, wu naa jaafoo kɔ shɛ̃ɛning kpang, naa ɓaazung ka gbalang Kpanti ɓuru.

¹⁷ Mɔɔ nɛ́ɛ zi m nɛɛ, n ɓaa sang ka ruu Kirisi, ta Onesimu naa ɓɔɔ mɔɔ nɛ̀ɛ́ tà m ɓɛɛ.

¹⁸ Nɛɛ palɛ mɔɔ vuu shi kpang ɓɔɔ kagn, naa mɔɔ nɛɛ dũng wu nyaa kɔ́pɔ́, nkɔ naa shurɛ.

¹⁹ Vuu keɓe n bèe nɛɛ naa mɛɛ. Nkɔ Bulu n shurɛ. Danggn wu ning mɔɔ kpang, n dũng mɔɔ suru bii ɓaaɓɛ.

²⁰ Masang ɓɔɔ n kasɛ mɔɔ dɔɔli ɓɛɛ, n gaa Laa, mɔɔ palɛ m tɔ̃ɔ keɓe jong, ka ruu kpanti ɓuru. Shing m yeti mɛɛ wu valɛ, ka ruu ɓɔɔ, mɔɔ manzung ka ruu danggn ɓɔɔ ruu shing ka bii Yeesɔ ɓɛɛ.

²¹ N zi tɔ, mɔɔ palɛ vuu ɓɔɔ n kɔɔ mɔɔ ɓɛɛ katɔ. Mɔɔ ti palɛ ɓa katɔ.

²² Shĩli m yeti gãa katɔ gbete, ka ruu ɓɔɔ, n shing gn mɔ̀ɔ kɔɔ nɛɛ Laa kàsɛ́ nɔɔ nyaa ɓɔɔ nɔɔ gaa wu katɔ. Wu a nɔɔ n tɔkn.

Bulu hangsɛ nyaa nɛɛ nyaa jeenang

²³ Epafara, masang ɓɔɔ zang mã m nɛɛ wu ka ruu Yeesɔ Kirisi ɓɛɛ, jee mɔɔ nyaa.

²⁴ Maraku, nɛɛ Arisitaku, nɛɛ Dema, nɛɛ Luka zang ɓɔɔ ruu palɛ shonang nɛɛ ri ɓɛɛ, ri jee mɔɔ nyaa jong.

²⁵ N gaa Kpanti ɓuru Yeesɔ Kirisi, wu pálɛ̀ nɔɔ tɔ̃ɔ nandon.